ក្រុមហ៊ុនចិន គ្រោងវិនិយោគប្រាក់១០លានដុល្លារ លើផ្នែកវារីវប្បកម្មនៅកម្ពុជា

ជាតិ

ក្រុមហ៊ុនចិន គ្រោងវិនិយោគប្រាក់១០លានដុល្លារ លើផ្នែកវារីវប្បកម្មនៅកម្ពុជា

01, Feb 2017 , 9:19 pm

រូបភាព

ដោយ: សារព័ត៌មានថ្មីៗ

ភ្នំពេញ៖ ក្រុមហ៊ុនវិនិយោគចិនមួយ គ្រោងចំណាយប្រាក់១០លានដុល្លារ ដើម្បីទាញយកផលពីផ្នែកវារីវប្បកម្មនៅកម្ពុជា។ គម្រោងវិនិយោគនេះ ត្រូវបានចុះហត្ថលេខាដោយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុនជីនយូតាំង (ចិន) កាលពីថ្ងៃទី៣១ ខែមករា នៅទីស្តីការគណៈរដ្ឋមន្ត្រី ។

រដ្ឋមន្ត្រីក្រសួងកសិកម្ម លោក វេង សាខុន បាននិយាយថា គោលដៅវិនិយោគរបស់ក្រុមហ៊ុនចិននេះ គឺជួយពង្រីកវិស័យវារីវប្បកម្មនៅតាមបណ្តាខេត្តជុំវិញបឹងទន្លេសាប ទន្លេមេគង្គ និងនៅខេត្តជាប់សមុទ្រ គឺខេត្ដព្រះសីហនុតែម្តង ។ លោក វេង សាខុន បន្ថែមថា ក្រុមហ៊ុនចិនមានគម្រោងចិញ្ចឹមត្រីទឹកសាប, ត្រីទឹកប្រៃ និងបង្កើតជាកន្លែងផលិតម្សៅត្រី ដើម្បីធ្វើជាចំណីត្រីជាដើម។ ក្រុមហ៊ុនចិននេះ ក៏មានគំនិតផលិតសាច់ត្រីជាប្រហិត ឬជាសាច់ត្រីចៀរជាបន្ទះក្លាស្សេ នាំចេញទៅតៃវ៉ាន់ ហុងកុង ប្រទេសសិង្ហបុរីផងដែរ។

លោក វេង សាខុន អត្ថាធិប្បាយយ៉ាងដូច្នេះថា៖«គម្រោងវិនិយោគនេះ ក្រោយពីចុះហត្ថលេខានេះតទៅ ក្រុមហ៊ុនចិននឹងត្រឡប់មកម្តងទៀត ដោយបញ្ជូនក្រុមការងាររបស់គេមក សិក្សាជាក់ស្តែងអំពីបញ្ហានេះ ដោយក្រុមហ៊ុនបានបញ្ជាក់ថា គេមានបំណងដាក់ទុនក្នុងឆ្នាំដំបូងរហូតដល់១០លានដុល្លារ ដើម្បីពង្រីក មុខរបរផ្នែកវារីវប្បកម្ម រួមទាំងបង្កើត ទីកន្លែងផលិតចំណីត្រីនៅកម្ពុជា»។

ក្រៅពីនេះក្រុមហ៊ុនចិន នឹងជាអ្នកទិញត្រីពីប្រជាពលរដ្ឋ ដែលប្រកបរបរចិញ្ចឹមត្រីផងដែរ ដើម្បីជួយលើកកម្ពស់ផលិតផលកសិកម្ម និងបង្កើនចំណូលបន្ថែមដល់ប្រជាកសិករមួយផ្នែកថែមទៀត។

កន្លងមកកម្ពុជាក៏បាននាំចេញត្រីទឹកសាប ប្រមាណជា១៤ពាន់តោន ទៅបណ្តាប្រទេសមួយចំនួន នៅក្នុងតំបន់អាស៊ីដូចជា ហុងកុង សិង្ហបុរី តៃវ៉ាន់ជាដើម។ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បាននិយាយថា កម្ពុជាគ្រោងបោះទុនចាប់ពី១០០ ទៅ ២០០លានដុល្លារ លើគម្រោងវារីវប្បកម្មក្នុងតំបន់ជុំវិញបឹងទន្លេសាប ទន្លេមេគង្គ និងខេត្តព្រះសីហនុ ។

ចំពោះកិច្ចសន្យាដែលភាគីទាំងពីរបានចុះហត្ថលេខានោះ រួមមាន ទី១. ការអភិវឌ្ឍវារីវប្បកម្ម រួមទាំងការបង្កើនផលស្តុកធនធានជលផលធម្មជាតិ ដើម្បីចូលរួមអភិវឌ្ឍន៍ និងគ្រប់គ្រងវិស័យជលផលឲ្យមាននិរន្តរភាព, ទី២. អភិវឌ្ឍន៍ និងស្រាវជ្រាវបច្ចេកវិទ្យាវារីវប្បកម្ម, ទី៣. ស្រាវជ្រាវ និងអភិវឌ្ឍន៍ ខ្សែសង្វាក់ផលិតកម្ម ជលផលនិងវារីវប្បកម្ម, ទី៤. អនាម័យ និងភូតគាមអនាម័យ ផលផលិតផល ជលផល, ទី៥. ការធ្វើពាណិជ្ជកម្ម និងទី៦. ការវិនិយោគលើការបង្កាត់ភ្ញាស់ ការចិញ្ចឹមយកសាច់ ការផលិតចំណីត្រី ការកែច្នៃផលិតផលជលផល និងធុរកិច្ចជលផល៕

ប្រភពពី AKP