កីឡាជាតិ
កូនលោក ប្រាក់ សុវណ្ណារ៉ា បាក់ឆ្អឹងដៃពីរកំណាត់ក្រោយប៉ះទង្គិចជាមួយកីឡាករ ទូច រ៉ូម៉ា
×
ខ្សែការពាររបស់ព្រះខ័នរាជស្វាយរៀង ប្រាក់ សុវណ្ណពិសិដ្ឋ ដែលជាកូនប្រុសបង្កើតរបស់លោក ប្រាក់ សុវណ្ណារ៉ា បានរងរបួសបាក់ឆ្អឹងដៃស្តាំជាពីរកំណាត់ក្រោយប៉ះទង្កិចជាមួយកីឡាកររបស់ក្រសួងការពារជាតិ។ ការរងរបួសនេះកើតឡើងក្នុងជំនួបដណ្តើមពានរង្វាន់Asia Club Pre-Season Championship 2017 នៅពហុកីឡដ្ឋានជាតិកាលពីល្ងាចថ្ងៃទី៣ ខែកុម្ភៈ។
ខ្សែការពារព្រះខ័នរាជស្វាយរៀង ប្រាក់ សុវណ្ណពិសិដ្ឋ កូនប្រុសបង្កើតរបស់លោក ប្រាក់ សុវណ្ណារ៉ា បានបាក់ឆ្នឹងដៃស្តាំជាពីរកំណាត់ក្រោយប៉ះទង្កិតជាមួយខ្សែបម្រើរបស់ក្រសួងការពារជាតិ ទូច រ៉ូម៉ា ពេលដំណើមបាល់គ្នា។ អតីតគ្រូបង្វឹកបឹងកេតអង្គរ លោក ប្រាក់ សុវណ្ណារ៉ា ដែលជាឱពុកបង្កើតរបស់កីឡាកររងគ្រោះបានរៀបរាប់ថា មូលហេតុនៃការបាក់ដៃនេះដោយសារ កីឡាករ ពិសិដ្ឋ ដួលខុសទំនងក្រោយព្យាយាមដណ្តើមបាល់ជាមួយកីឡាករ ទូច រ៉ូម៉ា។ ម្យ៉ាងវិញទៀត ដោយសារឆ្អឹងកូនប្រុសរបស់លោកកំពុងស្ថិតនៅក្នុងដំណាក់កាលលូតលាស់ខ្លាំង ជាពិសេសខ្វះជាតិកាល់ស្យូម ព្រោះបច្ចុប្បន្ន ពិសិដ្ឋ ទើបតែមានអាយុ១៧ឆ្នាំប៉ុណ្ណោះ។
ទោះបីជាយ៉ាងនេះក្តី លោក សុវណ្ណរ៉ា ឲ្យដឹងថា ស្ថានភាពរបួសរបស់ ពិសិដ្ឋ ពេលនេះមានស្ថានភាពធូរស្រាលវិញហើយ ក្រោយគ្រូពេទ្យរបស់គ្លីនិកចំរើន វះកាត់ដាក់ដែកអបរួច។ លោកបានបញ្ជាក់ទៀតថា របួសបាក់ដៃរបស់ ពិសិដ្ឋ ត្រូវចំណាយពេលយ៉ាងតិច២ខែក្នុងការព្យាបាលឲ្យជាសះស្បើយ។
គួរបញ្ជាក់ថា ក្នុងជំនួបកាលពីម្សិលមិញបើទោះជា កីឡាករ ប្រាក់ សុវណ្ណពិសិដ្ឋ រងបួសបាក់ដៃក្តី ក៏ក្រុមព្រះខ័នរាជស្វាយរៀងបានយកឈ្នះក្រុមក្រសួងការពារជាតិក្នុងលទ្ធផល ១-០ ដើម្បីឡើងឈរកំពូលតារាងនៃវគ្គជម្រុះពានរង្វាន់ Asia Club Pre-Season Championship 2017 ។ ជ័យជម្នះនេះសម្រេចដោយខ្សែប្រយុទ្ធនីហ្សេរីយ៉ា Chigozie Nwaokorie៕
Tag:
បាល់ទាត់
ប្រាក់ សុវណ្ណារ៉ា
ប្រាក់ សុវណ្ណពិសិដ្ឋ
© រក្សាសិទ្ធិដោយ thmeythmey.com