សម្ដេច ហ៊ុន សែន ក្រើនជាថ្មីឲ្យអាជ្ញាធរចាប់វាយខ្នោះ អ្នកនយោបាយឃោសនាលុបបំណុលពលរដ្ឋ

ជាតិ

សម្ដេច ហ៊ុន សែន ក្រើនជាថ្មីឲ្យអាជ្ញាធរចាប់វាយខ្នោះ អ្នកនយោបាយឃោសនាលុបបំណុលពលរដ្ឋ

08, Feb 2017 , 10:05 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរចាប់វាយខ្នោះភ្លាមៗ ចំពោះបុគ្គលនយោបាយណាដែលដើរឃោសនាតាមមូលដ្ឋាន ដោយសន្យាថា ពួកគេនឹងលុបបំណុលជូនពលរដ្ឋ ដែលជំពាក់មីក្រូហិរញ្ញវត្ថុ និងធនាគារ នៅពេលដែលគណបក្សពួកគេជាប់ឆ្នោតនោះ។ សម្ដេច ហ៊ុន សែន ចាត់ទុកការឃោសនារបស់បុគ្គលទាំងនោះ គឺជាការសន្យាបោកប្រាស់ពលរដ្ឋ ដើម្បីកេងចំណេញនយោបាយ ដែលជារឿងមិនអាចទៅរួចឡើយ។

ថ្លែងក្នុងពិធីបញ្ចុះខណ្ឌសីមា ពុទ្ធាភិសេភ និងឆ្លងសមិទ្ធផល ក្នុងវត្តព្រែកប្រា នៅព្រឹកនេះ នាយករដ្ឋមន្ត្រី ហ៊ុន សែន បានចំអកចំពោះគោលនយោបាយនោះវិញថា បើសិនជាពួកគេចង់លុបបំណុលជូនពលរដ្ឋនៅពេលពួកគេកាន់អំណាចមែននោះ ទាល់តែបុគ្គលទាំងនោះធ្វើបដិវត្តរំលាយរបបរាជានិយម បង្កើតរបបមួយថ្មីដូចជារបប ប៉ុល ពត វិញ ដែលគ្មានអ្នកជំពាក់បំណុលគេ។

ជាមួយគ្នានេះសម្ដេច ហ៊ុន សែន ក៏បានអំពាវនាវឲ្យគ្រឹះស្ថានមីក្រូហិរញ្ញវត្ថុ និងធនាគារទាំងអស់ ត្រូវពន្យាសងដល់ប្រជាពលរដ្ឋ ដែលជាកូនបំណុលខ្លួន ដោយមិនត្រូវរឹបអូសទ្រព្យសម្បត្តិរបស់ពួកគេ នៅពេលដែលខ្វះលទ្ធភាពសងត្រឡប់វិញឡើយ។ ត្រង់ចំណុចនេះសម្ដេច ហ៊ុន សែន ក៏បញ្ជាឲ្យអាជ្ញាធរចាត់វិធានការលើមីក្រូហិរញ្ញវត្ថុ ដែលរឹបអូសទ្រព្យសម្បត្តិពលរដ្ឋនេះដែរ។ ហើយពលរដ្ឋក៏មិនត្រូវ ចេះតែខ្ចីបំណុលធនាគារ ដោយមិនប៉ាន់ប្រមាណពីសមត្ថភាពខ្លួនសងត្រឡប់វិញ ។

ក្រៅពីនេះប្រមុខរដ្ឋាភិបាល ក៏បង្គាប់ឲ្យគ្រឹះស្ថានមីក្រូហិរញ្ញវត្ថុទាំងអស់ គប្បីដាក់ស្លាកជាគ្រឹះស្ថានឯកជន ដើម្បីកុំឲ្យពលរដ្ឋយល់ច្រឡំថា មីក្រូហិរញ្ញវត្ថុទាំងនោះ ជារបស់រដ្ឋ ដែលនាំឲ្យពួកគេចេះតែខឹងមកលើរដ្ឋាភិបាលថា គ្មានដំណោះស្រាយ និងយោគយល់ដល់ពលរដ្ឋក្រីក្រទៀត៕