អន្តរជាតិ
បញ្ជាលើកទី១ បរាជ័យ, ត្រាំ ត្រៀមចេញបញ្ជាថ្មីទៀតដើម្បីទប់ស្កាត់ជនអន្តោប្រវេសន៍
× ប្រធានាធិបតីអាមេរិក ដូណាល់ ត្រាំ បានរងបរាជ័យផ្ទួនៗក្នុងការអនុវត្តឡើងវិញបទបញ្ជាហាមឃាត់លំហូរជនអន្តោប្រវេសន៍ចូលមកទឹកដីអាមេរិក។ ដោយហេតុថា បទបញ្ជាលើកទី១ រងបរាជ័យ លោកប្រធានាធិបតី ត្រាំ កំពុងពិចារណាចេញបញ្ជាថ្មីដើម្បីហាមឃាត់ជនជាតិពីប្រទេសជាក់លាក់ណាមួយពីការចូលទឹកដីអាមេរិកតែម្ដង។ លោកបានប្រាប់អ្នកកាសែតនៅថ្ងៃទី១០ ខែកុម្ភៈថា បទបញ្ជាថ្មីនឹងចេញជារូបរាងនៅសប្ដាហ៍ក្រោយ។
ប្រធានាធិបតី ដូណាល់ ត្រាំ មិនសប្បាយចិត្តឡើយ ពេលបទបញ្ជារបស់ប្រធានាធិបតីដែលហាមឃាត់ប្រជាជនមកពីប្រទេសម៉ូស្លីម ៧ ចូលដីអាមេរិក ត្រូវបានតុលាការសហព័ន្ធព្យួរការអនុវត្តបណ្តោះអាសន្ន។ ប្រធានាធិបតីដែលអួតអាងថា វាជាវិធានការការពារសន្តិសុខអាមេរិកនោះ បានទិតៀនស្ថាប័នតុលាការអាមេរិកដែលប្រឆាំងចំណាត់ការលោក និងបានហៅការសម្រេចចិត្តរបស់តុលាការជារឿងនយោបាយទៀតផង។
ដោយមិនចេញចិត្តការសម្រេចរបស់តុលាការ ប្រធានាធិបតីអាមេរិករូបនេះ ក៏កំពុងលៃលកចេញបញ្ជាថ្មីហាមឃាត់ប្រជាជនមកពីប្រទេសដែលអាចបង្កការគំរាមកំហែង ជំនួសបទបញ្ជាចាស់ដែលត្រូវតុលាការព្យួរកាលពីសប្ដាហ៍មុន។ បើតាមទីភ្នាក់ងារព័ត៌មាន Reuters លោកប្រធានាធិបតី ត្រាំ និយាយថា បទបញ្ជាថ្មី អាចនឹងចេញនៅដើមសប្ដាហ៍ក្រោយតែម្ដង ព្រោះអាមេរិក កំពុងរងការគំរាមយ៉ាងខ្លាំង។
យ៉ាងណាក្ដី លោក ត្រាំ មិនបានបញ្ជាក់ឲ្យបានច្បាស់ពីព័ត៌មានលម្អិតនៃបទបញ្ជាឡើយ ដោយលោកគ្រាន់តែបញ្ជាក់ថា នឹងមានការកែប្រែពីបទបញ្ជាដើមខ្លះ។ បទបញ្ជាដើមរបស់លោក បានហាមឃាត់ការធ្វើដំណើរមកអាមេរិករយៈពេល៩០ថ្ងៃ សម្រាប់ប្រជាជនមកពីប្រទេសចំនួន៧ និង១២០ថ្ងៃសម្រាប់ជនអន្តោប្រវេសន៍។ បទបញ្ជានេះ ធ្វើឲ្យលោក ត្រាំ រងការរិះគន់យ៉ាងខ្លាំងពីសហគមន៍អន្តរជាតិ ជាពិសេសប្រទេសឥស្លាម ព្រោះពួកគេយល់ថា អាមេរិករើសអើសជនមូស្លីម។
អ្វីដែលគួរឲ្យកត់សម្គាល់នោះ មូលហេតុមួយ ដែលប្រធានាធិបតី ត្រាំ ចង់ចេញក្រិត្យថ្មី ព្រោះលោក ទំនងជាមិនប្ដឹងដល់តុលាការកំពូល ដើម្បីសម្រេចថា បទបញ្ជាចាស់របស់លោក អាចអនុវត្តឡើងវិញបានឬយ៉ាងណាដែរ។ នេះក៏ព្រោះតែបេក្ខជនចៅក្រមតុលាការកំពូលដែលលោកជ្រើសរើស នៅមិនទាន់ចូលកាន់តំណែងនៅឡើយ ហើយសព្វថ្ងៃនេះសំឡេងគាំទ្រលោកនៅតុលាការកំពូលមាន៤រូប និងប្រឆាំង៤រូប។ ដូច្នេះ លោកទំនងជាចេញបទបញ្ជាថ្មី ជាជាងចំណាយពេលនៅតុលាការកំពូល។
ម្យ៉ាងទៀត ការបន្តរិះគន់ឥតសំចៃមាត់លើស្ថាប័នតុលាការរបស់លោក ត្រាំ នេះ ត្រូវបានគេចាត់ទុកជាបំពានលើអំណាចតុលាការ ដែលជាអំណាចឯករាជ្យនោះ។ ហើយគេបារម្ភថា ប្រធានាធិបតីកំពុងធ្វើឲ្យប៉ះពាល់ដល់គោលការណ៍ត្រួតពិនិត្យអំណាចដែលមានវត្តមានក្នុងសង្គមអាមេរិក និងជាមូលដ្ឋានគ្រឹះនៃប្រជាធិបតេយ្យអាមេរិកយូរមកហើយនោះ៕
Tag:
អាមេរិក
ដូណាល់ ត្រាំ
អន្តោប្រវេសន៍
© រក្សាសិទ្ធិដោយ thmeythmey.com