អន្តរជាតិ
ត្រាំ ដឹងរឿងទីប្រឹក្សាខ្លួននិយាយទូរសព្ទជាមួយទូតរុស្ស៊ីតាំងពីយូរ តែមិនអើពើព្រោះចង់ការពារ
× អ្នកនាំពាក្យសេតវិមាន Sean Spicer បាននិយាយថា ប្រធានាធិបតី ដូណាល់ ត្រាំ បានដឹងរឿងទីប្រឹក្សាសន្តិសុខជាតិ Michael Flynn និយាយកុហករឿងនិយាយទូរសព្ទជាមួយទូតរុស្ស៊ីយូរមកហើយ។ បើទោះជាដឹងថា លោក Michael Flynn និយាយមិនត្រង់ និមិនប្រាប់អនុប្រធានាធិបតី Mike Pence ពីរឿងលម្អិតក្តី ក៏លោកប្រធានាធិបតី ត្រាំ មិនបានចាត់វិធានការអ្វីដែរ ឬក៏បញ្ឈប់លោក Flynn តែទុកឲ្យលាលែងដោយខ្លួនឯងទៅវិញ។
កិច្ចសន្ទនាតាមទូរសព្ទរវាងទីប្រឹក្សាសន្តិសុខជាតិ Michael Flynn និងអគ្គរដ្ឋទូតរុស្ស៊ី បង្កជាការព្រួយបារម្ភយ៉ាងខ្លាំងលើបញ្ហាសន្តិសុខជាតិរបស់អាមេរិក។ លោក Flynn បាននិយាយទូរសព្ទជាមួយលោក Sergei Kislyak តាំងតែពីពេលលោក ដូណាល់ ត្រាំ ស្បថចូលកាន់តំណែងទៅទៀត ហើយគេជឿថា ការសន្ទនាតាមទូរសព្ទនេះ មានលើកឡើងពីបញ្ហាទណ្ឌកម្មរបស់អាមេរិកដាក់លើរុស្ស៊ីជំនាន់រដ្ឋបាលលោក បារ៉ាក់ អូបាម៉ា ។
អ្វីកាន់តែធ្ងន់ធ្ងរនោះគឺ ទីប្រឹក្សាសន្តិសុខជាតិរូបនេះ បែរជាធ្វើឲ្យលោក Pence ច្រឡំ ព្រោះមិនបានផ្ដល់ព័ត៌មានជាក់លាក់ពីកិច្ចសន្ទនានេះទេ។ ឯអនុប្រធានាធិបតី Pence វិញ បន្ទាប់ពីលឺព័ត៌មានពាក់ព័ន្ធការនិយាយទូរសព្ទនេះ លោកក៏ចេញមុខការពារលោកឧត្តមសេនីយ៍ចូលនិវត្តន៍ Flynn ដោយលោកជឿជាក់លើសម្ដីរបស់ទីប្រឹក្សាសន្តិសុខនេះ។ អ្នកនាំពាក្យរបស់លោក Pence និយាយថា លោកអនុប្រធានាធិបតីផ្ទាល់ ក៏ទើបដឹងរឿងលោក Flynn និយាយកុហកលោកកាលពីសប្ដាហ៍មុននេះដែរ។
អ្នកនាំពាក្យសេតវិមាន Sean Spicer នៅថ្ងៃទី១៤ ខែកុម្ភៈ បាននិយាយ លោកប្រធានាធិបតី ត្រាំ ទទួលបានដំណឹងពីរឿងឧត្តមសេនីយ៍ Flynn កុហកលោក Pence សន្ទនាតាមទូរសព្ទតាំងពីចុងខែមករា។ ប៉ុន្តែប្រធានាធិបតីរូបនេះ មិនមានចំណាត់ការអ្វីលើលោក Flynn ឡើយ ខណៈដែលអ្នកនយោបាយក្នុងស្រុកជាច្រើន ជាពិសេសក្រុមបក្សប្រជាធិបតេយ្យ បានវាយប្រហារខ្លាំងៗ និងទាមទារឲ្យបើកការស៊ើបអង្កេតទ្រង់ទ្រាយធំលើរឿងនេះទៀត។
កាលពីចុងខែមករា ក្រសួងយុត្តិធម៌អាមេរិក ក៏ធ្លាប់បានព្រមានសេតវិមានម្ដងហើយជុំវិញការកុហករបស់លោក Flynn រឿងនិយាយទូរសព្ទនេះ ដោយលោកប្រាប់លោក Pence ថាមិនបាននិយាយរឿងទណ្ឌកម្មជាមួយទូតរុស្ស៊ីទេ។ បើតាមទីភ្នាក់ងារព័ត៌មាន Reuters មន្ត្រីអាមេរិកនិយាយថា កិច្ចសន្ទនារបស់លោក Flynn ត្រូវបានថតទុកដោយមន្ត្រីចារកម្ម ហើយសំឡេងថតទុកបង្ហាញថា លោក Flynn ពិតជាបាននិយាយរឿងទណ្ឌកម្មមែន។
ទាក់ទិនរឿងទណ្ឌកម្ម គេអាចចាំបានថា មុនចប់អាណត្តិប្រធានាធិបតី បារ៉ាក់ អូបាម៉ា បានសម្រេចបណ្ដេញចេញមន្ត្រីទូតរុស្ស៊ីជាច្រើននាក់ចេញពីទឹកដីអាមេរិក និងបានបិទទីតាំងអចលនទ្រព្យរបស់រុស្ស៊ីពីរកន្លែងទៀត។ ជាធម្មតា ប្រធានាធិបតីវ្ល៉ាឌីមៀ ពូទីន គួរតែខឹងខ្លាំង និងចាត់វិធានការភា្លមៗ ជាការឆ្លើយតបនឹងទណ្ឌកម្មនេះ ប៉ុន្តែលោកមិនបានធ្វើអ្វីសោះ និងប្រកាសថា រង់ចាំលោក ត្រាំ ចូលកាន់តំណែងសិន ចាំនិយាយរឿងទណ្ឌកម្មនេះ។
ដោយសាររឿងនេះ ទើបគេជឿថា កិច្ចសន្ទនារវាងឧត្តមសេនីយ៍ Flynn និងអគ្គរដ្ឋទូតរុស្ស៊ី ពិតជាបាននិយាយរឿងទណ្ឌកម្មមែន។ ឧត្តមសេនីយ៍ Flynn ទំនងជាបានសន្យាថា រដ្ឋបាលលោក ត្រាំ នឹងដកទណ្ឌកម្មចេញពេលកាន់តំណែង ទើបរុស្ស៊ីសម្រេចចិត្តនៅស្ងៀមមិនឆ្លើយតបនឹងវិធានការរបស់លោក អូបាម៉ា ដូចសព្វដងនោះ។ ជាការពិត លោក ត្រាំ ក៏តែងតែលើកឡើងថា លោកចង់បានទំនាក់ទំនងល្អជាមួយរុស្ស៊ី និងអាចពិចារណាដកទណ្ឌកម្មលើរុស្ស៊ីទៀតផង។
ងាកមករឿងឧត្តមសេនីយ៍ Flynn សមាជិករដ្ឋសភាមកពីបក្សប្រជាធិបតេយ្យ Adam Schiff បញ្ជាក់ថា លោកប្រធានាធិបតី ត្រាំ ស្នើឲ្យលោក Flynn លាលែង ក៏ព្រោះតែរឿងរ៉ាវបែកធ្លាយជាសាធារណៈទៅហើយ។ ទោះចង់ការពារមន្ត្រីខ្លួនក៏ដោយ លោក ត្រាំ ទំនងជាគ្មានជម្រើសអ្វីផ្សេងក្រៅពីប្រាប់ឲ្យលោក Flynn ចាកចេញពីតំណែងកាន់បានជិតមួយខែនេះ ដើម្បីចៀសវាងការប៉ះពាល់មុខមាត់រដ្ឋបាលថ្មី ដែលកំពុងរងការរិះគន់គ្រប់ទិសទីស្រាប់ហើយនោះ៕
Tag:
រុស្ស៊ី
អាមេរិក
ដូណាល់ ត្រាំ
Michael Flynn
© រក្សាសិទ្ធិដោយ thmeythmey.com