កីឡាជាតិ
ជាតិ
បឹងកេត, ស្វាយរៀង, ប៉ូលិស, អគ្គិសនីកម្ពុជាបាន១ពិន្ទុដូចគ្នា រីឯអាស៊ីអឺរ៉ុបបាន៣ពិន្ទុជាលើកដំបូង
×
ការប្រកួតសប្តាហ៍ទី២នៃពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧ នៅថ្ងៃទី២៦ ខែកុម្ភៈ ម្សិលមិញ ក្រុមចំនូន៤រួមមានបឹងកេតអង្គរ, ព្រះខ័នរាជស្វាយរៀង, អគ្គស្នងការនគរបាលជាតិ(ប៉ូលិស) និងអគ្គិសនីកម្ពុជាបានត្រឹមចែកគ្នា១ពិន្ទុក្រោយរក្សាលទ្ធផលស្មីដូចគ្នា។ ចំណែកអាស៊ីអឺរ៉ុបទទួលបាន៣ពិន្ទុជាលើកដំបូង ក្រោយលត់ក្រុមមជ្ឈមណ្ឌលកំចាត់មីនកម្ពុជា ៤-២។
ក្រុមការពារតំណែងជើងឯកបឹងកេតអង្គរ បានត្រឹមចែកគ្នាម្ខាងម្នាក់១ពិន្ទុជាមួយ ព្រះខ័នរាជស្វាយរៀងក្នុងជំនួបថ្ងៃដំបូង ក្រោយរក្សាលទ្ធផលស្មើ ២-២ ជាមួយស្វាយរៀងក្នុងសប្តាហ៍ទី២នៃពានរង្វាន់ក្របខណ្ឌលីកកំពូលកម្ពុជា កាលពីថ្ងៃទី២៦ ខែកុម្ភៈ ម្សិលមិញ។
ក្នុងជំនូបយ៉ាងស្វិតស្វាញនៅពហុកីឡដ្ឋានជាតិ ខ្សែប្រយុទ្ធនីហ្សេរីយ៉ា Chigozie Nwaokorie បានរកគ្រាប់បាល់នាំមុខ ១-០ ក្នុងវគ្គទី១ឲ្យព្រះខ័នរាជស្វាយរៀងនៅនាទី១៦។ ក្នុងវគ្គនេះដែរ ប្រធានក្រុមបឹងកេត ឃួន ឡាបូរ៉ាវី មានឱកាសទាត់បាល់១គ្រាប់ក្នុងប្រអប់គ្រោះថ្នាក់របស់ក្រុមស្វាយរៀងតែធ្វើមិនបានសម្រេច ក្រោយទាត់បាល់ទៅប៉ះនឹងបង្គោលទី។
ការប្រកួតដំណើរការបានប្រមាណជា១០នាទីក្នុងវគ្គទី២កីឡាករប្រេស៊ីល Maycon Calijuri រកគ្រាប់បាល់តាមស្មើ ១-១ ឲ្យបឹងកេងអង្គរនៅនាទី៥៥។ ក្រោយមកខ្សែការពារ សឿយ វិសាល បានបន្តរកគ្រាប់នាំ ២-១ សម្រាប់ព្រះខ័នរាជស្វាយរៀងនៅនាទី៦៤។ ការនាំមុខនេះ ធ្វើឲ្យក្រុមការពារតំណែងជើងឯកបឹងកេតអង្គរ បានបង្កើនការវាយសម្រុកយ៉ាងខ្លាំងមកលើព្រះខ័នរាជស្វាយ។ នៅនាទី៩០ខ្សែប្រយុទ្ធប្រធានក្រុម ឃួន ឡាបូរ៉ាវី បានតែតបាល់បញ្ចូលទីដើម្បីតាមស្មើ ២-២ សម្រាប់បឹងកេតអង្គរ។
ដោយឡែក ការប្រកួតនៅកីឡដ្ឋានខេត្តស្វាយរៀងក្រុមឈរកំពូលតារាងក្នុងសប្តាហ៍ទី១ អគ្គស្នងការនគរបាលជាតិបានត្រឹមចែកគ្នាម្ខាង១ពិន្ទុជាមួយក្រុមអគ្គិសនីកម្ពុជា។ បន្ទាប់ពីក្រុមនេះបានត្រឹមរក្សាលទ្ធផលស្មើ ០-០ ជាមួយក្រុមដែលប្រើប្រាស់ធនធានកីឡាករខ្មែរសុទ្ធអគ្គិសនីកម្ពុជាក្នុងសប្តាហ៍ទី២កាលពីម្សិលមិញ។ លទ្ធផលនេះបានធ្វើឲ្យក្រុមអគ្គស្នងការនគរបាល់ជាតិ ធ្លាក់មកឈរលំដាប់ទី២ក្នុងតារាងដោយមាន៤ពិន្ទុ បន្ទាប់ពីភ្នំពេញក្រោនដែលមាន៦ពិន្ទុ។
ចំណែក ការប្រកួតនៅកីឡដ្ឋានកងយោធពលខេមរភូមិន្ទ ក្រុមអាស៊ីអឺរ៉ុបយូណាយធីតក្រោយរងភាពសៅហ្មងក្រោមថ្វីជើងរបស់ភ្នំពេញក្រោនតាមរយៈការចាញ់ ៣-០ កាលពីសប្តាហ៍ទី១ បានស្តារមុខមាត់ឡើងវិញដោយបានលត់ក្រុមមជ្ឈមណ្ឌលកំចាត់មីនកម្ពុជា(ស៊ីម៉ាក់) ៤-២ ដើម្បីទទួលបាន៣ពិន្ទុជាលើកដំបូងក្នុងសប្តាហ៍ទី២៕
Tag:
បាល់ទាត់
Cambodian League 2017
© រក្សាសិទ្ធិដោយ thmeythmey.com