ក្រុមប្រឹក្សាធម្មនុញ្ញ ឯកភាពលើខ្លឹមសារថ្មីនៃច្បាប់ស្តីពីគណបក្សនយោបាយ

ជាតិ

ក្រុមប្រឹក្សាធម្មនុញ្ញ ឯកភាពលើខ្លឹមសារថ្មីនៃច្បាប់ស្តីពីគណបក្សនយោបាយ

03, Mar 2017 , 5:06 pm

រូបភាព

ដោយ: ថ្មីៗ

ភ្នំពេញ៖ ក្រុមប្រឹក្សាធម្មនុញ្ញ បានពិនិត្យខ្លឹមសារថ្មីនៃច្បាប់ស្តីពីគណបក្សនយោបាយ ចប់សព្វគ្រប់ហើយ។ ក្រោយពិនិត្យរួចរាល់ ក្រុមប្រឹក្សាធម្មនុញ្ញ បានឯកភាពទាំងស្រុងលើខ្លឹមសារថ្មីនៃច្បាប់នេះ។

ក្រុមប្រឹក្សាធម្មនុញ្ញ បានសេចក្តីសម្រចនៅថ្ងៃទី៣ មីនានេះ ដោយមិនជំទាស់អ្វីទាំងអស់ ចំពោះខ្លឹមសារថ្មីនៃច្បាប់ស្តីពីគណបក្សនយោបាយ ដែលរដ្ឋសភា បានអនុម័ត ហើយព្រឹទ្ធសភា ក៏បានពិនិត្យចប់សព្វគ្រប់ផងនេះ។ លោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានប្រកាសថា នេះជាសេចក្តីសម្រេចស្ថាពរ បិទផ្លូវតវ៉ា ហើយមានអានុភាពអនុវត្តទៅលើអំណាចទាំងអស់ដែលមានចែងក្នុងរដ្ឋធម្មនុញ្ញ និងត្រូវចុះផ្សាយក្នុងរាជកិច្ច។

លោក ឡេង ប៉េងឡុង បានប្រាប់សារព័ត៌មានថ្មីៗថា នៅពេលដែលក្រុមប្រឹក្សាធម្មនុញ្ញពិនិត្យចប់សព្វគ្រប់ ដោយមិនជំទាស់អ្វីនោះ រដ្ឋសភា នឹងបន្តដាក់ខ្លឹមសារនៃច្បាប់ស្តីពីគណបក្សនយោបាយ ទៅកាន់រដ្ឋាភិបាល។ អ្នកនាំពាក្យរដ្ឋសភារូបនេះ បានបន្តថា ក្រោយមកទៀត រដ្ឋាភិបាល នឹងបញ្ជូនសេចក្តីស្នើច្បាប់នេះ ទៅកាន់ព្រះមហាក្សត្រ ដើម្បីព្រះអង្គឡាយព្រះហស្ថ និងប្រកាសឲ្យប្រើប្រាស់ជាផ្លូវការ។ យ៉ាងណា លោកមិនទាន់បានបញ្ជាក់ទេ ថារដ្ឋសភា នឹងបញ្ជូនខ្លឹមសារថ្មីនៃច្បាប់នេះ ទៅកាន់រដ្ឋាភិបាលនៅពេលណានោះទេ។

សេចក្តីស្នើច្បាប់ខាងលើ ត្រូវបានស្នើឡើងដោយតំណាងរាស្ត្រពីគណបក្សប្រជាជនកម្ពុជា ដើម្បីឆ្លើយតបនឹងការចង់បានរបស់សម្តេច ហ៊ុន សែន។ ក្រោយមក រដ្ឋសភា ក៏បានអនុម័តសេចក្តីស្នើច្បាប់នេះ។

មុនទៅដល់ក្រុមប្រឹក្សាធម្មនុញ្ញ សេចក្តីស្នើច្បាប់នេះ ត្រូវបានរដ្ឋសភា បញ្ជូនឲ្យព្រឹទ្ធសភាពិនិត្យរួចរាល់ហើយ។ ព្រឹទ្ធសភា ក៏បបានឯកភាពទាំងស្រុងទៅលើសេចក្តីស្នើច្បាប់នេះ ដូចនឹងក្រុមប្រឹក្សាធម្មនុញ្ញ ដែរ។

តំណាងរាស្ត្របក្សកាន់អំណាច បានចាត់ទុកការកែប្រែច្បាប់ខាងលើ ថាជាការប្រញាប់។ ម្យ៉ាងទៀត បក្សកាន់អំណាច យល់ថា ការកែប្រែច្បាប់នេះ គឺដើម្បីឆ្លើយតបសភាពការណ៍ចាំបាច់ របស់ប្រទេសជាតិ នាពេលបច្ចុប្បន្ន។

យ៉ាងណា ក្រុមអ្នកវិភាគ និងបក្សប្រឆាំង មើលឃើញចំណុចអវិជ្ជមានច្រើនជាងវិជ្ជមាន ក្នុងការធ្វើវិសោធនកម្មលើច្បាប់នេះ។ ពួកគេ អះអាងថា ច្បាប់នេះ នឹងក្លាយជាសម្ពាធសម្រាប់បក្សប្រឆាំង។

មាត្រាថ្មីមួយចំនួន ត្រូវបានបញ្ចូលទៅក្នុងច្បាប់ស្តីពីគណបក្សនយោបាយ។ យោងតាមមាត្រាថ្មីទាំងនោះ ទណ្ឌិត មិនត្រូវបានអនុញ្ញាតឲ្យធ្វើជាប្រធាននិងអនុប្រធានគណបក្ស នោះទេ។ ម្យ៉ាងទៀត ទណ្ឌិត ក៏មិនត្រូវអនុញ្ញាត ឲ្យធ្វើជាសមាជិកគណៈកម្មាធិការអចិន្ត្រៃយ៍ ឬគណៈកម្មាធិការនាយកនៃគណបក្សណាមួយដែរ។ លើសពីនេះ គណបក្សណាមួយដែលប្រព្រឹត្តខុសច្បាប់ធ្ងន់ធ្ងរ នឹងត្រូវរំលាយចោលតែម្តង។

ក្រោយសេចក្តីស្នើច្បាប់នេះ ត្រូវបានតាក់តែងឡើង ដោយមិនទាន់ចូលជាធរមានផងនោះ ឯកឧត្តម សម រង្ស៊ី ក៏បានលាលែងពីតំណែងជាប្រធានគណបក្សសង្គ្រជាតិ បាត់ទៅហើយ កាលពីខែកុម្ភៈ ឆ្នាំ២០១៧។ ក្រោយមក មន្ត្រីជាន់ខ្ពស់ពីររូប គឺលោក អ៊ុំ សំអាន និងលោក មាជ សុវណ្ណារ៉ា ដែលកំពុងជាប់ពន្ធនាគារ បានប្រកាសលាលែងពីសមាជិកគណៈកម្មាធិការនាយកនៃគណបក្សសង្គ្រោះជាតិ។ ជាងនេះទៀត សមាជិកព្រឹទ្ធសភាពីគណបក្ស សម រង្ស៊ី ពីររូបទៀត គឺលោក ហុង សុខហួរ ដែលកំពុងជាប់ពន្ធនាគារ និងលោកស្រី ថាក់ ឡានី ដែលនិរទេសខ្លួនទៅរស់នៅឯបរទេស ក៏បានប្រកាសលាលែងពីសមាជិកគណៈកម្មាធិការនាយកនៃគណបក្ស សម រង្ស៊ី ផងដែរ៕