រដ្ឋាភិបាលនឹងចំណាយថវិកា១២លានដុល្លារសង់សាលាវិចិត្រសិល្បៈថ្មីនៅជ្រោយចង្វារ

ជាតិ

រដ្ឋាភិបាលនឹងចំណាយថវិកា១២លានដុល្លារសង់សាលាវិចិត្រសិល្បៈថ្មីនៅជ្រោយចង្វារ

03, Mar 2017 , 5:48 pm

រូបភាព

ដោយ:

ភ្នំពេញ៖ ថ្លែងក្នុងទិវាវប្បធម៌ជាតិលើកទី១៩ នៅថ្ងៃទី៣ ខែមីនានេះ សម្តេចនាយករដ្ឋមន្ត្រី ហ៊ុន សែន បានឆ្លៀតបង្ហើបពីគម្រោងសង់សាកលវិទ្យាល័យភូមិន្ទ និងវិចិត្រសិល្បៈថ្មីសង់លើផ្ទៃដី ៤ហិកតា និងគ្រោងចំណាយថវិកាប្រមាណ ១២លានដុល្លារអាមេរិក ក្នុងទីក្រុងជ្រោយចង្វា។

សម្តេច ហ៊ុន សែន បានថ្លែងឲ្យដឹងថា សម្តេចបានឯកភាពឲ្យអាជ្ញារធរ និងក្រសួងពាក់ព័ន្ធអនុវត្តគម្រោងនេះរួចរាល់រយៈពេល ៣ឆ្នាំហើយ ដើម្បីពង្រឹង និងពង្រីកគុណភាពអប់រំផ្នែកវប្បធម៌ និងវិចិត្រសិល្បៈកម្ពុជាឲ្យកាន់តែល្អប្រសើរ ថែមទៀត។ បន្ថែមលើសពី សម្តេចបានសន្យាថា នឹងស្វែងយល់ជំនួយពីប្រទេសជំនួយអន្តរជាតិថែមទៀត ដើម្បីពន្លឿនគម្រោងសាងសង់សាលាថ្មីនេះ។

តាមប្រសាសន៍ប្រមុខរដ្ឋាភិបាល តាមគម្រោងសាកលវិទ្យាល័យភូមិន្ទ និងវិចិត្រសិល្បៈថ្មីដែលនឹងមានទំហំធំទូលាយនោះ នឹងសង់ជាដំណាក់កាលម្តងៗ ក្នុងនោះ មានការសង់អគារ និវេសនដ្ឋាននិស្សិតធំទូលាយ រោងសៀក និងអគារសិក្សាសិល្បៈខ្មែរដទៃទៀត។

គួររម្លឹកថា កាលពីដំបូង សាលាភូមិន្ទសិល្បៈ ត្រូវបានសាងសង់ឡើងក្នុងឆ្នាំ១៩១៨ រួច ត្រូវបានប្តូរឈ្មោះជាសាកលវិទ្យាល័យភូមិន្ទវិចិត្រសិល្បៈ ក្នុងឆ្នាំ១៩៦៥ ។ គ្រឹះស្ថានឧត្តមសិក្សាសាធារណៈ ដែលមានទីតាំងក្បែរសារៈមន្ទីរជាតិមួយនេះ មានបណ្តុះបណ្តាលផ្នែកចម្លាក់ បុរាណវិទ្យា ស្ថាបត្យកម្ម តុបតែងលំអ សៀក របាំ ភ្លេង ល្ខោន និងនគរូបនីយវិទ្យា ជាដើម។

សាកលវិទ្យាល័យបានបិទទ្វារក្នុងរបបកម្ពុជាប្រជាធិបតេយ្យពីឆ្នាំ១៩៧៥ ដល់ ១៩៧៩ ហើយបើកទ្វារវិញពីឆ្នាំ១៩៨០ រហូតដល់បច្ចុប្បន្ន។ តាមគម្រោងកន្លងមក រដ្ឋាភិបាលសម្រេចប្តូរទីតាំងសាលាទៅទីក្រុងរណបជ្រោយចង្វា ក្នុងគោលបំណងយកដីទីតាំងសាលា បច្ចុប្បន្ននេះ សម្រាប់ពង្រីកសារមន្ទីរជាតិ៕