ជាតិ
៣ ថ្ងៃ៖ថៃ ចាប់បញ្ជូនពលករខ្មែរជាង ១ ពាន់នាក់ ដែលលួចទៅរកការងារធ្វើនៅថៃ មកកម្ពុជាវិញ រូបពលករខ្មែរ ដែលត្រូវអាជ្ញាធរថៃបញ្ជូនមកកម្ពុជាវិញតាមច្រកអន្តរជាតិដូង កាលពីចុងឆ្នាំ ២០១៦
×
ពលករខ្មែរដែលទៅធ្វើការនៅក្នុងប្រទេសថៃប្រមាណជាង ១៣០៨ នាក់ ត្រូវបានរដ្ឋាភិបាលថៃបញ្ជូនមកកាន់កម្ពុជាវិញ បន្ទាប់ពីពួកគេបានលួចឆ្លងដែនខុសច្បាប់ ចូលទៅរកការងារធ្វើនៅក្នុងទឹកដីថៃ។
ក្នុងរយៈពេលតែ ៣ ថ្ងៃអាជ្ញាធរថៃ បានចាប់ខ្លួនពលករខ្មែរដែលលួចទៅរកការងារធ្វើនៅប្រទេសថៃដោយខុសច្បាប់ចំនួន ១៣០៨ នាក់ បញ្ជូនមកកម្ពុជាវិញ។ បើតាមការចុះផ្សាយរបស់គេហទំព័រអគ្គស្នងការនគរបាលជាតិ អាជ្ញាធរថៃបានបញ្ជូន ពលករខ្មែរចំនួន ៥៣៣នាក់ ក្នុងនោះស្រីមានចំនួន ១៧៥នាក់ តាមច្រកអន្តរជាតិដូង ស្ថិតក្នុងស្រុកកំរៀងខេត្តបាត់ដំបង នៅថ្ងៃទី ៣ មីនា ។ ហើយនៅថ្ងៃ ទី ៤ ខែមីនា ឆ្នាំ២០១៧ ភាគីថៃ បានបញ្ជូនពលករខ្មែរខុសច្បាប់ចំនួន ២៥៨នាក់ ទៀត ក្នុងនោះស្រីមានចំនួន ៨៥នាក់ តាមច្រកអន្រជាតិដូងដដែល។
គេហទំព័រមួយនេះ ក៏រម្លឹកផងដែរថា កាលពី ថ្ងៃទី ២ ខែមីនា ឆ្នាំ២០១៧ ភាគីថៃ ក៏បានបញ្ជូនពលករខ្មែរដែលលបចូលទៅធ្វើការខុសច្បាប់តាមច្រករបៀងនានា នៃខ្សែបន្ទាត់ព្រំដែន កម្ពុជា ថៃ ឲ្យត្រឡប់ទៅកាន់ស្រុកកំណើតរបស់ខ្លួនវិញតាមច្រកអន្តរជាតិដូងក្នុងទឹកដី ស្រុកកំរៀង ខេត្តបាត់ដំបង ដែលមានចំនួនសរុប ៥១៧នាក់ ក្នុងនោះស្រីមាន ចំនួន ២២៩នាក់ និងអនីតិជនមានចំនួន ៣៩នាក់ ។
នៅពេលពលករទាំងនោះ មកដល់កម្ពុជា គេហទំព័រប៉ូលិស បានស្រង់សម្តីសមត្ថកិច្ចកម្ពុជា ដែលបានណែនាំដល់ក្រុមពលករទាំងអស់នោះ ដោយសមត្ថកិច្ចប្រាប់ពលករ ឲ្យបំពេញបែបបទឲ្យបានត្រឹមត្រូវ ដើម្បីសុវត្ថិភាពពេលទៅបំពេញការងារនៅក្នុងប្រទេសថៃ៕
Tag:
ពលករខ្មែរ
ថៃ
ច្រកព្រំដែនកម្ពុជា-ថៃ
© រក្សាសិទ្ធិដោយ thmeythmey.com