ស៊ី ជិនពីង ប្រាប់មន្ត្រីឲ្យស្តាប់អនុសាសន៍ក្រុមបញ្ញវន្តដើម្បីអនុវត្តគោលនយោបាយជោគជ័យ

អន្តរជាតិ

ស៊ី ជិនពីង ប្រាប់មន្ត្រីឲ្យស្តាប់អនុសាសន៍ក្រុមបញ្ញវន្តដើម្បីអនុវត្តគោលនយោបាយជោគជ័យ

07, Mar 2017 , 9:19 am

រូបភាព

ដោយ: ថ្មីៗ

ប្រធានាធិបតីចិនលោក ស៊ី ជិនពីង បានអំពាវនាវឲ្យបញ្ញវន្តចិនបន្តប្រឹងប្រែងប្រើប្រាស់ចំណេះដឹងឲ្យបានច្រើនជាងមុនដើម្បីចូលរួមចំណែកបម្រើនិងអភិវឌ្ឍសង្គមជាតិ។ ហើយប្រមុខរដ្ឋចិនរូបនេះប្រាប់ឲ្យអាជ្ញាធរថ្នាក់ក្រោមជឿជាក់ និងស្តាប់ការណែនាំរបស់បញ្ញាវន្តដើម្បីឲ្យការអនុវត្តគោលនយោបាយនិងការងារស្នូលរបស់ជាតិទទួលបានជោគជ័យជាដើម។

«ចិនត្រូវការក្រុមបញ្ញាវន្តខ្លាំងពេលណាទាំងអស់ដើម្បីរក្សាវិបុលភាពនិងលើស្ទួយជីវភាពរស់នៅរបស់ប្រជាជន ស្របពេលប្រទេសនេះស្ថិតនៅលើផ្លូវនៃការអភិឌ្ឍនោះ»។ នេះជាសារកម្រមួយដែលប្រមុខរដ្ឋចិនលោក ស៊ី ជិនពីង ផ្ញើទៅកាន់បញ្ញាវ័ន្តចិន ក្នុងពេលដែលលោកជួបពិភាក្សាជាមួយបណ្តាទីប្រឹក្សានយោបាយនៃគណបក្សមិនមែនកុម្មុយនីស្តកាលពីចុងសប្តាហ៍នេះ។

ក្នុងនាមជាអគ្គលេខាធិការនៃគណៈកម្មការមជ្ឈិមនៃបក្សកុម្មុយនីស្តចិន និងប្រធានគណៈកម្មាធិការយោធាមជ្ឈិម លោក ស៊ី ជិនពីង បានលើកឡើងក្នុងជំនួបពិភាក្សាជាមួយទីប្រឹក្សានយោបាយ៩នាក់ ថា បណ្តាបញ្ញាវន្តទូទាំងគួរតែចូលរួមទទួលខុសត្រូវ និងប្រឹងប្រែងប្រកបដោយការយកចិត្តទុកដាក់ក្នុងកសាងចូលរួមកសាងប្រទេសជាតិនិងប្រែក្លាយប្រទេសចិនឲ្យទៅជាសង្គមប្រកបដោយវិបុលភាពនិងក្លាយជាមហាអំណាចវិទ្យាសាស្ត្រនិងបច្ចេកវិទ្យានៅពេលខាងមុខ។

យោងតាមទីភ្នាក់ងារព័ត៌មានចិន Xinhua លោក ស៊ី ជិនពីង បន្តថា គណបក្សរបស់លោកតែងតែងចាត់ទុកបញ្ញាវន្តជាសរសរស្តម្ភនៃប្រទេសជាតិដែលមិនអាចខ្វះបានឡើយ។ លោក ស៊ី ជិនពីងបានថ្លែងដូច្នេះ៖ «គណបក្សកុម្មុយនីស្តចិនតែងតែឲ្យតម្លៃបញ្ញាវ័ន្ត ដែលពួកគេជាអភិជននៃសង្គម, ជាសរសរស្តម្ភនៃប្រទេសជាតិ និងជាមោទនភាពនៃប្រជាជនចិន រួមទាំងជាធនធានដែលមិនអាចកាត់ថ្លៃបានដែរ»។

ក្រៅពីបញ្ជាក់ថាបក្សលោកឲ្យតម្លៃអ្នកចេះដឹង លោក ស៊ី ជិនពីង បានអំពាវនាវបន្ថែមឲ្យសង្គមចិនទាំងមូលគោរពបញ្ញាវន្ត និងឲ្យតម្លៃលើចំណេះដឹងរបស់ពួកគេផង។ អ្វីដែលគួរឲ្យកត់សម្គាល់លោក ស៊ី ជិនពីង បានប្រាប់ឲ្យអាជ្ញាធរចិនគ្រប់ជាន់ថ្នាក់ ត្រូវជឿជាក់លើអ្នកចេះដឹង និងស្វែងរកការណែនាំនិងអនុសាសន៍ពីបញ្ញាវ័ន្តទាំងនោះដើម្បីអនុវត្តគោលនយោបាយនិងការងារធំៗរបស់រដ្ឋឲ្យបានជោគជ័យផង។

លោក ស៊ី ក៏បានឆ្លៀតឱកាសនោះអំពាវនាវទៅកាន់បញ្ញវន្តចិនផងដែរ ដោយលោករំពឹងថា ពួកគេនឹងចូលរួមចំណែកក្នុងការអនុវត្តតម្លៃស្នូលនៃគោលការណ៍សង្គមនិយមរបស់ចិន និងរក្សាឲ្យបាននូវគោលការណ៍តម្កល់ប្រយោជន៍របស់ជាតិនិងប្រជាជនជាធំនោះ។

ស្របពេលដែលចិនកំពុងប្រឹងប្រែងអភិវឌ្ឍសង្គមជាតិក៏ដូចជាអនុវត្តគោលនយោបាយកំណែទម្រង់ទូទាំងប្រទេសនោះ លោក ស៊ី ជិនពីង បានស្នើសុំចំៗឲ្យបណ្តាបញ្ញាវន្តបន្តសិក្សានិងការស្រាវជ្រាវឲ្យបានស៊ីជម្រៅ ហើយបន្តផ្តល់អនុសាសន៍នានាដែលមានប្រយោជន៍និងស្របតាមការអនុវត្តជាក់ស្តែងដើម្បីជួយគាំទ្ររដ្ឋាភិបាលបន្តរក្សាស្ថិរភាពនៃការអភិវឌ្ឍសេដ្ឋកិច្ច និងស្ថិរភាពនៃសង្គមផងដែរ៕