អន្តរជាតិ
ហូឡង់ថា កាតព្វកិច្ចចុងក្រោយរបស់លោកគឺទប់កុំឲ្យ Le Pen ឈ្នះឆ្នោតប្រធានាធិបតី
× ប្រធានាធិបតីបារាំងជិតផុតអាណត្តិលោក ហ្វ្រង់ស្វ័រ ហូឡង់ បានរៀបរាប់ថា កាតព្វកិច្ចចុងក្រោយរបស់លោកក្នុងនាមជាប្រធានាធិបតីគឺ ទប់ស្កាត់លោកស្រី Marine Le Pen កុំឲ្យឈ្នះឆ្នោត។ សម្តីដ៏កម្រនេះធ្វើឡើងស្របពេលដែលបេក្ខជនប្រធានាធិបតីស្តាំនិយមជ្រុលលោកស្រី Le Pen បានទទួលសំឡេងគាំទ្រច្រើនមិនធ្លាប់មាន ខណៈការបោះឆ្នោតកាន់តែជិតមកដល់។
កាតព្វកិច្ចចុងក្រោយក្នុងនាមប្រធានាធិបតី គឺធានាថាបេក្ខជនប្រធានាធិបតីស្តាំនិយមជ្រុលលោកស្រី Marine Le Pen ឈ្នះឆ្នោត។ នេះជាការបញ្ជាក់របស់ប្រធានាធិបតីជិតផុតអាណត្តិ ហ្វ្រង់ស្វ័រ ហូឡង់ក្នុងបទសម្ភាសមួយជាមួយសារព័ត៌មានអឺរ៉ុបមួយចំនួនក្នុងនោះមានទាំង Le Monde ផងដែរ។
លោក ហូឡង់ បានថ្លែងដូច្នេះថា៖« កាតព្វកិច្ចចុងក្រោយបង្អស់របស់ខ្ញុំគឺធានាថា បក្សស្តាំនិយមជ្រុលមិនឈ្នះឆ្នោត។ ហើយបារាំងក៏មិនត្រូវទ្រាំទ្រចំពោះការទទួលខុសត្រូវធ្ងន់ធ្ងរបែបនោះដែរ»។
ប្រធានាធិបតីដែលមិនសូវមានប្រជាប្រិយភាពខ្ពស់នោះ បានបន្តថា រដ្ឋាភិបាលលោកមើលឃើញពីគ្រោះថ្នាក់ដែលអាចកើតឡើងដោយសារការគាំទ្របេក្ខជនស្តាំនិយមជ្រុលនេះនេះកើនឡើងខ្ពស់មិនធ្លាប់មានក្នុងរយៈពេល ៣ទសវត្សរ៍មកនេះ។
ក្នុងបទសម្ភាសដដែលនោះលោក ហូឡង់ បានលើកឡើងបន្តិចដែរពីការចាកចេញរបស់អង់គ្លេសពីសហភាពអឺរ៉ុបកន្លងមក។ លោកជឿជាក់ថា អង់គ្លេសជ្រើសរើសផ្លូវដ៏អាក្រក់មួយសម្រាប់ដើរខ្លួនឯង ហើយលោកព្រមានអង់គ្លេសជាថ្មីថា អង់គ្លេសមិនអាចចាកចេញហើយ នៅចាំទាញប្រយោជន៍ពីសហភាពអឺរ៉ុបឡើយ។ បើសម្រេចដើរចេញហើយ អង់គ្លេសក្លាយជាអ្នកក្រៅសុទ្ធសាធ។
សូមទាញការចាប់អារម្មណ៍បន្តិចដែរ បារាំងនឹងរៀបចំការបោះឆ្នោតប្រធានាធិបតីនៅថ្ងៃ ២៣ មេសាខាងមុខនេះ ហើយជុំទី ២នឹងត្រូវរៀបចំឡើងនៅថ្ងៃ ៧ ឧសភា។ ការបោះឆ្នោតជាប្រវត្តិសាស្ត្រនេះនឹងកំណត់ថា អ្នកណានឹងឡើងមកដឹកនាំបារាំង និងឈានទៅកំណត់ជោគវាសនាបារាំងក្នុងសហភាពអឺរ៉ុបផង។
លោកស្រី Marine Le Pen ត្រូវបានគេស្គាល់ថាជាប្រធានបក្សរណសិរ្សជាតិដែលជាបក្សនយោបាយស្តាំនិយមជ្រុល ហើយលោកស្រីរៀនសូត្របានច្រើនពីជ័យជម្នះរបស់ប្រធានាធិបតីដូណាល់ ត្រាំ នៅអាមេរិក។ ប្រើប្រាស់នយោបាយ ប្រជាឧបាយជាគោល លោកស្រី Le Pen បានរក្សាជំហរប្រឆាំងស្ថាប័នព្រុចសែល និងប្រឆាំងជនអន្តោប្រវេសន៍ផង។ លោកស្រីនឹងចរចាដណ្តើមយកអំណាចគ្រប់គ្រងព្រំដែនមកវិញ បើសិនជាលោកស្រី ជាប់ឆ្នោតជាប្រធានាធិបតីបារាំងមែននោះ។
អ្វីដែលគួរឲ្យចាប់អារម្មណ៍នោះ បេក្ខជនប្រធានាធិបតីបារាំងសុទ្ធតែរួបរឹតដោយរឿងអាស្រូវ ហើយប្រជាជនបារាំងហាក់សុញគំនិតមិនដឹងគួរបោះឆ្នោតឲ្យអ្នកណា។ បេក្ខជនបីនាក់ដែលមានលទ្ធភាពក្លាយជាប្រធានាធិបតីមានដូចជា លោកស្រី Marine Le Pen,លោក Francois Fillon និងលោក Emanuel Macron ។
ប៉ុន្តែតាមរបាយការណ៍ស្ទង់មតិកាលពីខែកុម្ភៈ សំឡេងគាំទ្រលោកស្រី Le Pen កើនឡើងច្រើនក្នុងចំណោមប្រជាជនបារាំង ហើយគេព្យាករណ៍ថា លោកស្រី អាចនឹងឈ្នះឆ្នោតនៅជុំទីមួយថែមទៀតផង។ បេក្ខជនស្ថិតនៅលេខរៀងបន្ទាប់គឺលោក Macron ហើយចុងក្រោយគឺលោក Fillon ។
Tag:
ហ្វ្រង់ស្វ័រ ហូឡង់
Marine Le Pen
បោះឆ្នោតប្រធានាធិបតីបារាំង
© រក្សាសិទ្ធិដោយ thmeythmey.com