កីឡាជាតិ
ជាតិ
ទោះបីកីឡាករ Global មានរបួសច្រើនតែបឹងកេតនៅតែព្រួយបារម្ភពីទម្រង់លេងដ៏ល្អ
× ទោះបីគ្រូបង្វឹកក្រុម Global FC លោក Toshiaki Imai បានបញ្ជាក់ថាកូនក្រុមរបស់ខ្លួនមានរបួសច្រើនយ៉ាងណាក៏ដោយ ប៉ុន្តែគ្រូបង្វឹកបឹងកេតអង្គរនៅតែមានការព្រួយបារម្ភចំពោះទម្រង់លេងដ៏ល្អរបស់ Global ក្នុងជំនួបនៅពហុកីឡដ្ឋានជាតិនាល្ងាចថ្ងៃទី៧ ខែមីនា នេះ។
គ្រូបង្វឹកក្រុមបឹងកេតអង្គរ លោក John McGlynn នៅតែមានការព្រួយបារម្ភចំពោះទម្រង់លេងដ៏ល្អរបស់ក្រុម Global FC ទោះបីគ្រូបង្វឹករបស់ក្រុមនេះបានអះអាងថា កីឡាកររបស់ខ្លួនមានរបួសច្រើនក៏ដោយ។ តែយ៉ាងណាលោកប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពដើម្បីបាន៣ពិន្ទុក្នុងនាមជាម្ចាស់ផ្ទះ។
ក្នុងសន្និសីទសារព័ត៌មានមុនការប្រកួតកាលពីម្សិលមិញលោកគ្រូបង្វឹករូបបានបញ្ជាក់ថា៖«ការប្រកួតក្នុងទឹកដីនៅថ្ងៃនេះជាផលចំណេញរបស់យើង ប៉ុន្តែអ្វីដែលសំខាន់យើងត្រូវព្យាយាមរក៣ពិន្ទុឲ្យក្នុងជំនួបល្ងាចនេះ ហើយធ្វើយ៉ាងប្រឹងឲ្យអស់ពីសមត្ថភាពទប់កុំឲ្យមានការស៊ុតបញ្ចូលទីពីក្រុមហ្វីលីពីន»។
ការចូលរួមលេងក្នុងពានរង្វាន់លំដាប់អន្តរជាតិ AFC Cup 2017 របស់បឹងកេត លោក John McGlynn ចាត់ទុកថា វាជាមុខមាត់ថ្មីមួយសម្រាប់បឹងកេតអង្គរ និងសម្រាប់កម្ពុជាទាំងមូល។ ដូច្នេះក្នុងជំនួបតទល់ជាមួយក្រុម Global នឹងបង្ហាញឲ្យពីមោទកភាពរបស់កម្ពុជានៅថ្ងៃនេះ។
«ជារឿងមួយដ៏ល្អរបស់កម្ពុជាដែលបានចូលរួមលេងក្នុងពានរង្វាន់លំដាប់អន្តរជាតិ វាជារឿងមួយដ៏រំភើបសម្រាប់បឹងកេតអង្គរ និងកម្ពុជាទាំងមូល។ អ្វីដែលសំខាន់ខ្ញុំនឹងឲ្យតំណាងកម្ពុជាមួយនេះមានមោទនភាពនៅថ្ងៃនេះ»។ នេះជាការលើកឡើងរបស់លោក John McGlynn គ្រូបង្វឹករបស់បឹងកេតអង្គរ។
គួរបញ្ជាក់ថា ក្រុមបឹងកេតអង្គរត្រូវជួបប្រកួតជាមួយក្រុម Global FC របស់ហ្វីលីពីនក្នុងវគ្គសន្សំពិន្ទុពូល F នៃពានរង្វាន់ AFC Cup 2017 ជើងទី២នាវេលាម៉ោង៦ល្ងាចនេះនៅពហុកីដ្ឋានជាតិ។ ការប្រកួតនេះមានការផ្សាយបន្តផ្ទាល់ពីស្ថានីយទូទស្សន៍ BTV ផងដែរ៕
Tag:
បាល់ទាត់
AFC Cup 2017
ឃួន ឡាបូរ៉ាវី
© រក្សាសិទ្ធិដោយ thmeythmey.com