ស្ពានថ្មចំនួន៣ឆ្លងស្ទឹងសៀមរាបគ្រោងដាក់ឲ្យដំណើរការមុនបុណ្យចូលឆ្នាំខ្មែរ

ជាតិ

ស្ពានថ្មចំនួន៣ឆ្លងស្ទឹងសៀមរាបគ្រោងដាក់ឲ្យដំណើរការមុនបុណ្យចូលឆ្នាំខ្មែរ

09, Mar 2017 , 4:43 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ក្រោយដំណើរការសាងសង់អស់រយៈពេលជាច្រើនខែមកនេះ ស្ពានថ្មថ្មីដែលសង់ឆ្លងកាត់ស្ទឹងសៀមរាប គ្រោងនឹងដាក់ឲ្យដំណើរការមុនពិធីបុណ្យចូលឆ្នាំប្រពៃណីខ្មែរ។ តាមគម្រោងស្ពាននេះ គ្រោងនឹងបញ្ចប់រួចរាល់នៅចុងខែឧសភា ឆ្នាំ២០១៧។

លោក កង ចាន់ត្រា អនុប្រធានមន្ទីរសាធារណការ និងដឹកជញ្ជូនខេត្តសៀមរាប បានឲ្យដឹងថា ស្ពានថ្មថ្មីចំនួន៣ដែលឆ្លងស្ទឹងសៀមរាប នឹងដាក់ឲ្យដំណើរការជាបណ្តោះអាសន្ននៅដើមខែមេសា ខាងមុខនេះ។ ការបើកឲ្យដំណើរនេះ ក៏ដោយសារតែក្តីបារម្ភចំពោះការកកស្ទះក្នុងពេលចូលឆ្នាំ ដែលជាទូទៅនៅខេត្តសៀមរាបនៅរាល់ពេលបុណ្យចូលឆ្នាំម្តងៗ មានប្រជាពលរដ្ឋច្រើនបានធ្វើដំណើរមកកម្សាន្ត ជាពិសេសចូលរួមក្នុងព្រឹត្តិការណ៍អង្គរសង្ក្រាន្ត។

តាមការបញ្ជាក់របស់លោក កង ចាន់ត្រា គម្រោងសាងសង់ស្ពានថ្មថ្មីនេះ គឺជាថវិការាជរដ្ឋាភិបាលក្នុងគម្រោងឥណទានឆ្នាំ២០១៦ និង២០១៧ ដែលមន្ទីរសាធារណការ និងដឹកជញ្ជូនខេត្តសៀមរាបជាអ្នកអនុវត្តន៍។ អ្វីដែលពិសេសនោះ លោក ចាន់ត្រាពន្យល់ថា គឺស្ពានថ្មទាំង៣ខាងលើនេះ សង់ទៅតាមរចនាប័ទ្មបុរាណខ្មែរសុទ្ធសាធ។

គួរបញ្ជាក់ថា ស្ពានថ្មទាំង៣ដែលគ្រោងដាក់ឲ្យដំណើរនាពេលខាងមុខនេះ ទីមួយមានទីតាំងនៅវត្តឥន្ទកោសា ទីពីរមុខវត្តពោធិ៍លង្ការ និងទីបី មុខព្រះរាជដំណាក់ គឺសង់ធ្វើជាស្ពានភ្លោះទៅមក ខណៈស្ពានថ្មចាស់ពីមុនដាក់ជាផ្លូវឯកទិសនោះ។ ស្ពាននេះបានបើកការដ្ឋាននៅដើមខែកញ្ញា ឆ្នាំ២០១៦ ហើយគ្រោងនឹងបញ្ចប់រយៈពេល៧ខែ៕