ពាក្យ«ដ្បិត,ត្បិត»មានសូរដូចគ្នា តែមានអត្ថន័យមិនដូចគ្នាទេ!

ពីនេះ ពីនោះ

ពាក្យ«ដ្បិត,ត្បិត»មានសូរដូចគ្នា តែមានអត្ថន័យមិនដូចគ្នាទេ!

13, Mar 2017 , 7:19 am

រូបភាព

ដោយ: ថ្មីៗ

ភ្នំពេញ៖ ស្មេរជាច្រើន តែងសរសេរពាក្យ«ដ្បិត,ត្បិត» ខុសពីអត្ថន័យដើមរបស់ពាក្យនេះ។ ប្រយោគខ្លះ គេត្រូវសរសេរដោយភ្ជាប់ជាមួយពាក្យ«ត្បិត» តែស្មេរខ្លះ បែរជាយកពាក្យ«ដ្បិត»មកដាក់ទៅវិញ។ តាមពិតទៅ ពាក្យទាំងពីរមានអត្ថន័យមិនដូចគ្នាឡើយ បើទោះបីពួកវាមានសូរសំឡេងដូចគ្នាក៏ដោយ។

វចនានុក្រមសម្តេចសង្ឃរាជ ជួន ណាត បានពន្យល់ថា៖

ត្បិត(និ) ពាក្យបរិយាយដែលភ្ជាប់ជាមួយពាក្យ «រឹត» ដែលស្មើ «រឹតត្បិត»។ រឹតត្បិត គឺការប្រឹងរឹតខ្លាំង។
ឧទាហរណ៍៖ ពួកយើងកុំបណ្តែតបណ្តោយពេក ត្រូវតែរឹតត្បិតបន្តិចទៅ។ ខ្ញុំត្រូវចាយប្រាក់រឹតត្បិតបន្តិចហើយ ព្រោះប្រាក់ខែរបស់ខ្ញុំ មានចំនួនតិចណាស់។ សូមកុំរឹតត្បិតសេរីភាពនៃការបញ្ចេញមតិពេក បើអ្នកចង់ឲ្យប្រទេសនេះ មានប្រជាធិបតេយ្យ។

ចំណាំ៖ ពេកត្បិត មានស្មេរខ្លះ សរសេរដោយភ្ជាប់ជាមួយពាក្យ«ថ្វី»(ថ្វីត្បិត) ដែលនេះ គឺជាកំហុសឆ្គង។ តាមពិតទៅ ពាក្យថា«ថ្វី» គេប្រើតែជាមួយពាក្យថា«ដ្បិត»(ថ្វីដ្បិត)ប៉ុណ្ណោះ។

ដ្បិត (និ) មានន័យថា ផ្លូវ គន្លង, ហេតុ,ហេតុការណ៍។ ពាក្យនេះ ក៏មានន័យស្មើ ព្រោះតែ,ដ្បិតថា,ដ្បិតអ្វី។
ឧទាហរណ៍៖ ព្រឹកនេះ ខ្ញុំមិនបានទៅខេត្តកំពតទេ ដ្បិតខ្ញុំវិលមុខខ្លាំងណាស់។

សម្គាល់៖ ពាក្យនេះ ក៏គេប្រើដោយភ្ជាប់ជាមួយពាក្យ«ថ្វី»។ ថ្វី មានន័យថា ពាក្យសម្រាប់សួររកហេតុ,រកដំណើរ។ ឧទាហរណ៍៖ គេប្រើប្រយោគសំណួរ«ថ្វីបានឯងយំ?» ជំនួសឲ្យប្រយោគ«ហេតុអ្វីក៏ឯងយំ?។ ថ្វីដ្បិត ការសិក្សាមានការលំបាក និងប្រើពេលយូរ តែវានឹងផ្តល់អនាគតភ្លឺស្វាងដល់មនុស្ស៕