ពីនេះ ពីនោះ
ពាក្យ«អីវិន» មានន័យថា«ជាដើម, ល ឬ…»
× ភ្នំពេញ៖ «អីវិន» គឺជាពាក្យគ្រាមភាសា ដែលពលរដ្ឋខ្មែរជាច្រើននៅភាគខាងត្បូងនៃប្រទេសកម្ពុជា តែងតែនិយាយយ៉ាងរត់មាត់។ តើពាក្យនេះ មានអត្ថន័យដូចម្តេច?
បើគេផ្អែកលើសំណង់ប្រយោគរបស់ពលរដ្ឋ ដែលតែងនិយាយពាក្យ«អីវិន» នៅខាងចុងប្រយោគ ឬឃ្លា គឺគេអាចសន្និដ្ឋានបានថា ពាក្យ«អីវិន» ស្មើនិងពាក្យ «ជាដើម, ល , …»។
ឧទាហរណ៍៖
១)រត់តុ រត់ម៉ូតូឌុប និងលក់កាសែតជាដើម គឺខ្ញុំធ្លាប់ធ្វើអស់ហើយ កាលរៀននៅមហាវិទ្យាល័យ។
២) លែងគប់វង់យកស្មៅ លេងឈូសទ្រនាប់ជើង លេងអុក លេងខ្លាស៊ីគោអីវិន គឺជាល្បែងដែលខ្ញុំចូលចិត្តណាស់ កាលខ្ញុំឃ្វាលគោនៅស្រុកកំណើត។
៣) សត្វគោ មាន់ និងទាអីវិន អ្នកស្រុកខ្ញុំឥឡូវនាំគ្នាចិញ្ចឹមច្រើនណាស់។
៤) ការគេយប់មិញ រាំបានពីរបទ ដឹងអាណាវ៉ៃគ្នាពេញហ្នឹង ហើយអញ អាភ័ក្រ អាចយ អាឆែត អាតឿអីវិន រត់បាតជើងសព្រាត។
ជាទូទៅ ពាក្យថា អីវិន គឺគេច្រើនឮពលរដ្ឋដែលមានស្រុកកំណើតនៅខេត្តតាកែវ និងកំពត ជាអ្នកនិយាយ ដើម្បីបញ្ជាក់ពីការរៀបរាប់អ្វីមួយដែលសល់បន្តទៀត។ ប្រសិនបើ គេមិនប្រើពាក្យ«អីវិន» ដោយជំនួសពាក្យ«ជាដើម,ល ឬ…» ក៏ឃ្លា ឬប្រយោគទាំងនោះ មានន័យដូចគ្នាផងដែរ។
ឧទាហរណ៍៖
១) រត់តុ រត់ម៉ូតូឌុប និងលក់កាសែតជាដើម គឺខ្ញុំធ្លាប់ធ្វើអស់ហើយ កាលរៀននៅមហាវិទ្យាល័យ។
២) លែងគប់វង់យកស្មៅ លេងអុក លេងខ្លាស៊ីគោ ល ជាល្បែងដែលខ្ញុំចូលចិត្តលេងណាស់ កាលឃ្វាលគោនៅស្រុកកំណើត។
៣)សត្វគោ មាន់ ទា…អ្នកស្រុកខ្ញុំឥឡូវនាំគ្នាចិញ្ចឹមច្រើនណាស់៕
© រក្សាសិទ្ធិដោយ thmeythmey.com