អន្តរជាតិ
មិនត្រឹមតែមិនខ្លាច កូរ៉េខាងជើង ថែមទាំងគំរាមកម្ទេចអាមេរិកឲ្យក្លាយជាផេះ មេដឹកនាំកូរ៉េខាងជើង គីម ជុងអ៊ុន និងមន្ត្រីយោធាជាន់ខ្ពស់ជាច្រើនរូប (រូបថត Xinhua)
× ស្ថានការណ៍នៅឧបទ្វីបកូរ៉េ ហាក់តានតឹងខ្លាំងនាពេលចុងក្រោយ ដោយមានការឆ្លើយឆ្លង និងការគំរាមកំហែងគ្នាទៅវិញទៅមករវាងកូរ៉េខាងជើង និងអាមេរិក។ រដ្ឋមន្ត្រីការបរទេសអាមេរិក Rex Tillerson អំឡុងទស្សនកិច្ចនៅអាស៊ី បានលើកឡើងពីលទ្ធភាពដែលអាមេរិកប្រើកម្លាំងយោធាវាយប្រហារមុនលើកូរ៉េខាងជើង។ ប៉ុន្តែកូរ៉េខាងជើង មិនព្រឹសម្បុរព្រោះការគំរាមនេះឡើយ តែរដ្ឋនេះគំរាមវាយអាមេរិក និងកូរ៉េខាងត្បូងឲ្យក្លាយជាផេះ បើហ៊ានបំពានទឹកដីខ្លួននោះ។
កូរ៉េខាងជើង នៅថ្ងៃទី២០ ខែមីនា បានព្រលះធ្ងន់ៗលើការព្រមានរបស់ប្រមុខការទូតអាមេរិក Rex Tillerson ដែលចង់ប្រើទណ្ឌកម្ម ឬក៏ដល់ថ្នាក់ប្រើទ័ពបង្ខំឲ្យខ្លួនបញ្ឈប់ការអភិវឌ្ឍកម្មវិធីនុយក្លេអ៊ែរបន្តទៀត។ កូរ៉េខាងជើងនិយាយថា ខ្លួនមិនខ្លាចការគំរាមរបស់អាមេរិកឡើយ ហើយកងទ័ពប្រជាជនកូរ៉េ ក៏ត្រៀមខ្លួនរួចរាល់ដែរដើម្បីវាយបកលើបច្ចាមិត្តទាំងឡាយ ដែលបំពានអធិបតេយ្យខ្លួន។
មិនតែប៉ុណ្ណោះ កូរ៉េខាងជើង ក៏គំរាមវាយកម្ទេចអាមេរិក និងកូរ៉េខាងត្បូងឲ្យក្លាយជាផេះផង់ទៀតផង បើប្រទេសទាំងនេះហ៊ានវាយប្រហារខ្លួនមុននោះ។ ការគំរាមនេះ ធ្វើឡើងបន្ទាប់ពីកូរ៉េខាងត្បូងព្រមានថា កូរ៉េខាងជើងបានទទួលជោគជ័យក្នុងការសាកល្បងម៉ាស៊ីនបាញ់រ៉ុក្កែត ដែលអាចបាញ់មីស៊ីលបាន។ បើតាមសារព័ត៌មាន Daily Express ក្រសួងការបរទេសកូរ៉េខាងជើង បានចេញសេចក្ដីថ្លែងការណ៍មួយគំរាមកម្ទេចមូលដ្ឋាននៃការឈ្លានពាន ដើម្បីការពារសេចក្ដីសុខរបស់ប្រជាជនកូរ៉េខាងជើង។
ដោយមិននិយាយចំឈ្មោះអាមេរិក និងកូរ៉េខាងត្បូង សេចក្ដីថ្លែងការណ៍ដដែលបញ្ជាក់ថា ពួកបច្ចាមិត្ត នឹងត្រូវកម្ទេចដោយមីស៊ីលដ៏មានឥទ្ធិពលបំពាក់ក្បាលនុយក្លេអ៊ែរ។ បើទោះគេតែងឃើញកូរ៉េខាងជើង គំរាមគេឯងជាញឹកញាប់ក្ដី លើកនេះកូរ៉េខាងជើងហាក់ប្រើសម្ដីខ្លាំងជាងមុន ដោយហ៊ានគំរាមថាទាំងអាមេរិក ទាំងកូរ៉េខាងត្បូង អាចរាបដល់ដីទាំងមិនទាន់បានវាយកូរ៉េខាងជើងផង។
រដ្ឋមន្ត្រីការបរទេស Rex Tillerson ទើបតែបញ្ចប់ទស្សនកិច្ចលើកដំបូងនៅអាស៊ី ដោយលោកបានទៅទស្សនកិច្ចនៅ ជប៉ុន និងកូរ៉េខាងត្បូង មុននឹងហោះទៅកាន់ក្រុងប៉េកាំង ជាសម្ព័ន្ធមិត្តជិតស្និទ្ធរបស់កូរ៉េខាងជើង។ នៅកូរ៉េខាងត្បូង ប្រមុខការបរទេសអាមេរិកនិយាយច្បាស់ៗថា នយោបាយនៃការអត់ធ្មត់បានបញ្ចប់ហើយ។ អាមេរិកកំពុងសិក្សាវិធានការផ្សេងទៀតដើម្បីដាក់សម្ពាធលើកូរ៉េខាងជើង រួមទាំងការប្រើប្រាស់កម្លាំងទ័ពដែរ។
ជាការឆ្លើយតបនោះ អ្នកនាំពាក្យក្រសួងការបរទេសកូរ៉េខាងជើង បែរជាស្នើឲ្យអាមេរិកទទួលស្គាល់កូរ៉េខាងជើង ជារដ្ឋនុយក្លេអ៊ែរដែលមានឆន្ទៈ និងសមត្ថភាពពេញលេញក្នុងការតបតសង្គ្រាមដែលអាមេរិកបញ្ឆេះឡើង។ មិនតែប៉ុណ្ណោះ កូរ៉េខាងជើង ក៏ត្រៀមបញ្ជាក់ថា យុទ្ធសាស្ត្ររបស់អាមេរិក ពិតជាមិនអាចបន្លាចកូរ៉េខាងជើងបានឡើយ ហើយថែមទាំងអាចរងការសងសឹកពីអាវុធដ៏មានឥទ្ធិពលរបស់កងទ័ពកូរ៉េទៀតផង៕
Tag:
កូរ៉េខាងជើង
អាមេរិក
ឧបទ្វីបកូរ៉េ
© រក្សាសិទ្ធិដោយ thmeythmey.com