រដ្ឋាភិបាល បញ្ឈប់ដំណើរការក្រុមហ៊ុនទឹកដោះគោអាមេរិក ដែលទិញទឹកដោះស្ត្រីខ្មែរទៅផលិត

ជាតិ

រដ្ឋាភិបាល បញ្ឈប់ដំណើរការក្រុមហ៊ុនទឹកដោះគោអាមេរិក ដែលទិញទឹកដោះស្ត្រីខ្មែរទៅផលិត

28, Mar 2017 , 4:16 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋាភិបាល បានសម្រេចបញ្ឈប់ដំណើការរបស់ក្រុមហ៊ុន «គុណមាតា» ដែលជាសាខាក្រុមហ៊ុន Ambrosia របស់អាមេរិក ដែលបានទិញទឹកដោះស្ត្រីខ្មែរ យកទៅផលិតជាទឹកដោះគោ ឬជារបបអាហារសម្រាប់កុមារ នៅក្នុងទីផ្សារសហរដ្ឋអាមេរិក។

ក្រុមហ៊ុន Ambrosia ដែលមានមូលដ្ឋាននៅរដ្ឋ Utah សហរដ្ឋអាមេរិក បានចាប់ផ្ដើមដំណើការ នាំចេញទឹកដោះមនុស្ស ទៅលក់នៅទីផ្សារអាមេរិកដំបូងគេបង្អស់ សម្រាប់មាតាដែលត្រូវការទឹកដោះ ជំនួសរបបអាហាររបស់កូនពួកគេ ជាពិសេសស្ត្រីដែលខ្វះទឹកដោះ។ ក្រុមហ៊ុននេះ បានដើរប្រមូលទិញទឹកដោះនៅក្នុងប្រទេសកម្ពុជា ជាងមួយឆ្នាំហើយ ដោយយកទៅក្លាស្សេឲ្យបានល្អ មុននឹងនាំចេញទៅលក់ក្នុងទីផ្សារអាមេរិក ជាទីដែលទឹកដោះត្រូវយកទៅកម្ចាត់មេរោគ ហើយលក់ក្នុងតម្លៃ២០ដុល្លារ ក្នុងមួយកញ្ចប់ ដែលមានរង្វាស់១៤៧មីល្លីលីត្រ។

ក្រោយពីពិនិត្យលើសំណើសុំបន្តដំណើការទិញទឹកដោះពីស្ត្រីខ្មែររួចមក រដ្ឋាភិបាល ក៏បានចេញសេចក្ដីសម្រេច មិនអនុញ្ញាតឲ្យក្រុមហ៊ុន «គុណមាតា» ដែលមានឈ្មោះក្នុងបញ្ជីពាណិជ្ជកម្មហៅថា Ambrosia Labs នេះ នាំចេញទឹកដោះស្ត្រីខ្មែរទៅផលិតជារបបអាហារលក់ក្នុងទីផ្សារអាមេរិកឡើយ។

លិខិតសម្រេចរបស់ទីស្តីការគណៈរដ្ឋមន្ត្រី ចុះថ្ងៃទី២៨ មីនានេះ បានទៅប្រាប់ទៅរដ្ឋមន្ត្រីក្រសួងសុខាភិបាលដូច្នេះថា៖«ត្រូវចាត់ការទប់ស្កាត់ជាបន្ទាន់ ចំពោះការប្រមូលទិញ និងនាំចេញទឹកដោះម្ដាយពីកម្ពុជា។ បើទោះជាកម្ពុជាក្រលំបាកយ៉ាងណា ក៏មិនដល់កម្រិតលក់ទឹកដោះម្ដាយដែរ»។

កន្លងមកមូលនិធិសង្គ្រោះកុមារអន្តរជាតិរបស់អង្គការសហប្រជាជាតិ UNICEF ក៏បានចេញមុខថ្គោលទោសចំពោះក្រុមហ៊ុន Ambrosia ដែលមានមូលដ្ឋាននៅរដ្ឋ Utah សហរដ្ឋអាមេរិកមួយនេះ ដោយស្នើឲ្យរដ្ឋាភិបាលកម្ពុជា ចុះអន្តរាគមន៍ទប់ស្កាត់បញ្ហានេះផងដែរ។ មន្ត្រីអង្គការ UNICEF ប្រចាំកម្ពុជា បានបញ្ជាក់ដូច្នេះថា៖«ក្រុមហ៊ុនផលិតទឹកដោះនេះ មិនគួរឲ្យមានដំណើការប្រមូលទិញទឹកដោះពីស្ត្រីខ្មែរទេ ព្រោះវាជាជំនួញដែលបឺតជញ្ជក់ញើសឈាមរបស់ស្ត្រីក្រីក្រ ដើម្បីផលចំណេញរបស់ពួកគេនោះទេ។ ពីព្រោះទឹកដោះ គឺជាកោសិការបស់មនុស្ស ដូចជានឹងសរសៃឈាមដែរ ដូច្នេះជំនួញបែបនេះ គួរតែត្រូវបានហាមឃាត់»។

ទាក់ទងនឹងការនាំចេញទឹកដោះស្រស់របស់មនុស្ស ទៅលក់នៅទីផ្សារអាមេរិកនេះ ស្ថាបនិកក្រុមហ៊ុន Ambrosia លោក Bronzson Woods ដែលមានគំនិតបង្កើតគម្រោងនេះឡើង បានអះអាងការពារមុខជំនួញនេះថា វាមិនបានធ្វើឲ្យប៉ះពាល់ដល់ស្ត្រីនោះទេ តែផ្ទុយទៅវិញ វាគឺជាការជំរុញឲ្យស្ត្រីដែលរស់នៅតំបន់ក្រីក្រ អាចមានលទ្ធភាពរកប្រាក់ចិញ្ចឹមកូន តាមរយៈការលក់ទឹកដោះ។ លោក Bronzson Woods ធ្លាប់បានបង្ហោះវីដេអូតាមបណ្ដាញ YouTube ដោយស្នើឲ្យរដ្ឋាភិបាល អនុញ្ញាតឲ្យលោក បន្តការនាំចេញផលិតផលទឹកដោះស្រស់របស់មនុស្ស ទៅលក់នៅអាមេរិកនេះផងដែរ៕