កីឡាអន្តរជាតិ
អន្តរជាតិ
ក្រុមអ្នកគាំទ្រចិន១០ម៉ឺននាក់ គ្រោងចាយ ២៥លានដុល្លារទៅមើល World Cup នៅរុស្ស៊ី
× ក្រុមអ្នកគាំទ្រកីឡាបាល់ទាត់ជាជនជាតិចិនប្រហែល១០ម៉ឺននាក់ ដែលមកពីប្រទេសចិន រួមទាំងកោះហុងកុង តៃវ៉ាន់ និងម៉ាកាវ ត្រូវបានគេរំពឹងថានឹងចំណាយក្នុងកញ្ចប់ប្រាក់រហូតដល់ ២៥លានដុល្លារអាមេរិក ដើម្បីធ្វើដំណើរទៅទស្សនាការប្រកួតពានរង្វាន់ពិភពលោក FIFA World Cup ឆ្នាំ២០១៨ នៅប្រទេសរុស្ស៊ី។
លោក Feng Tao នាយកប្រតិបត្តិក្រុមហ៊ុន Shankai Sports ដែលជាភ្នាក់ងារលក់ផ្តាច់មុខដើម្បីនាំអ្នកគាំទ្រទៅក្រៅប្រទេស រំពឹងថានឹងមានអ្នកគាំទ្រជាជនជាតិចិនច្រើនលើសលុបរហូតដល់រាប់ម៉ឺននាក់មានវត្តមាននៅក្នុងការប្រកួត World Cup នៅឆ្នាំក្រោយនេះ ខណៈដែលព្រឹត្តិការណ៍នៅប្រេស៊ីលកាលពីឆ្នាំ២០១៤ មានតែជាង៥ពាន់នាក់ប៉ុណ្ណោះ។
«នេះជាឱកាសដ៏អស្ចារ្យសម្រាប់អ្នកគាំទ្រចិនដើម្បីបានទៅទស្សនាផ្ទាល់នៃព្រឹត្តិការណ៍បាល់ទាត់ពិភពលោក World Cup»។ នេះជាការលើកឡើងរបស់លោក Feng Tao ដែលធ្លាប់ទិញសិទ្ធិផ្តាច់មុននាំអ្នកគាំទ្រទៅទស្សនាការប្រកួតនៅប្រេស៊ីលកាលពីឆ្នាំ២០១៤ និងនៅអាហ្វ្រិកខាងត្បូងកាលពីឆ្នាំ២០១០ផងដែរ។
តាមការផ្សាយរបស់ Today Online លោកបានបន្ថែមថា៖« រដ្ឋាភិបាលចិនបានដាក់ការវិនិយោគជាច្រើនក្នុងការអភិវឌ្ឍវិស័យឧស្សាហកម្មកីឡា ជាពិសេសកីឡាបាល់ទាត់ដែលកំពុងមានការចាប់អារម្មណ៍ច្រើន នៃទីផ្សានៅក្នុងប្រទេសចិន។ មានប្រជាជនច្រើនណាស់ចង់ទស្សនាការប្រកួតបាល់ទាត់ពិភពលោកនេះ ហើយយើងអាចបង្កើតឱកាសសម្រាប់អ្នកគាំទ្រចិន ដើម្បីបានទៅមើល World Cup នៅរុស្ស៊ី»។
សូមបញ្ជាក់ថាការប្រកួតពីរជើងចុងក្រោយរបស់ក្រុមបាល់ទាត់ជម្រើសជាតិចិនបានយកជ័យជម្នះលើក្រុមជម្រើសជាតិកូរ៉េខាងត្បូង ១-០ និងចាញ់ក្រុមជម្រើសជាតិអ៊ីរ៉ង់១-០ នាការប្រកួតវគ្គជម្រុះជុំចុងក្រោយពូល A នៃពានរង្វាន់ពិភពលោក World Cup ២០១៨ នៅប្រទេសរុស្ស៊ី៕
Tag:
បាល់ទាត
World Cup
ចិន
© រក្សាសិទ្ធិដោយ thmeythmey.com