ពាក្យ ដែលមាន «សុ» នៅខាងដើម តែងបង្កប់អត្ថន័យល្អ ឬវិជ្ជមាន

ពីនេះ ពីនោះ

ពាក្យ ដែលមាន «សុ» នៅខាងដើម តែងបង្កប់អត្ថន័យល្អ ឬវិជ្ជមាន

03, Apr 2017 , 7:30 am

រូបភាព

ដោយ: សារព័ត៌មានថ្មីៗ

ភ្នំពេញ៖ «សុ» គឺជានិបាតសព្ទ ដែលត្រូវបានប្រើប្រាស់នៅខាងដើមនៃពាក្យណាមួយ។ ជាទូទៅ ពាក្យណា ដែលផ្សំដោយ «សុ» នៅខាងដើម ពាក្យនោះ តែងមានអត្ថន័យល្អ ឬសេចក្តីបែបវិជ្ជមាន។

«សុ» អាចប្រែបានច្រើនយ៉ាង ដូចជា ល្អ, ប្រពៃ, ត្រឹមត្រូវ, ប្រសើរ, ក្រអូប, ស្អាត, ពីរោះ, ស្រួល និង ស្រណុក ជាដើម។

ពាក្យដែលមាន «សុ» នៅខាងដើម មានដូចជា សុក្រឹតភាព (ភាពនៃវត្ថុដែលគេធ្វើហើយដោយប្រពៃ), សុគតិ (ដំណើរដ៏ល្អ), សុគន្ធ (ក្លិនក្រអួប), សុចរិត (ការប្រព្រឹត្តល្អ), សុច្ឆន្ទៈ (បំណងល្អ, ឆន្ទៈល្អ), សុជីវធម៌ (ការរស់នៅដោយល្អ), សុទិដ្ឋិនិយម (ការយល់ឃើញបែបវិជ្ជមានចំពោះអ្វីមួយ ឬ ការយល់ឃើញថាអ្វីៗក្នុងលោកសុទ្ធតែល្អ និង ប្រសើរសុខស្រួល), សុផល (ផលល្អ, ផ្លែល្អ), សុភាព (ភាវៈល្អ), សុភាសិត (ពាក្យពីរោះ, ពាក្យត្រឹមត្រូវ, ឱវាទត្រឹមត្រូវ), សុយាត្រា (ការទៅដោយស្រួល, ដំណើរទៅស្រួល), សុរក្សា (ការរក្សាដោយប្រពៃ), សុរូប (រូបល្អ), សុលក្ខណៈ (លក្ខណៈល្អ), សុវិជ្ជា (វិជ្ជាល្អ), សុវិសុទ្ធិ (បរិសុទ្ធិល្អ), សុវោហារ (វោហារល្អ), ។ល។

ការបកប្រែ និបាតសព្ទ «សុ» ខាងលើ ត្រូវឲ្យសមស្របទៅតាមលក្ខណៈនៃវត្ថុ ឬ សភាវៈអ្វីមួយ។ ជារួម «សុ» អាចប្រែយ៉ាងណាក៏បាន ឲ្យតែសិ្ថតក្នុងអត្ថន័យបែបវិជ្ជមាន។

ការបកស្រាយនេះ គឺយោងទៅតាមវចនានុក្រម សម្តេច ជួន ណាត៕