ពីនេះ ពីនោះ
ធ្វើជាមនុស្ស កុំ «ហុតទឹក សម្លឹងកាក» !
× ភ្នំពេញ៖ «ហុតទឹកសម្លឹងកាក» គឺជាសុភាសិតមួយរបស់ខ្មែរ ដែលបានបង្កប់ទាំងន័យត្រង់ និងន័យប្រៀបធៀប។ សុភាសិតនេះ គឺចង់រិះគន់បុគ្គលណាមួយ ដែលលាក់ពុតត្បុត ដើម្បីកេងចំណេញផលប្រយោជន៍ពីអ្នកដទៃ។
បើបកស្រាយពីន័យត្រង់ គឺងាយយល់ណាស់ចំពោះសុភាសិតនេះ។ ជាន័យត្រង់ «ហុតទឹក សម្លឹងកាក» ចង់សំដៅដល់អ្នកបរិភោគបាយ ដោយធ្វើជាហុតទឹកសម្ល តែភ្នែក បែរជារំពៃសម្លឹងមើលសាច់ទៅវិញ។ លុះពេលហុតទឹកសម្លរួចហើយ គេ នឹងចាប់យកដុំសាច់នោះមកទទួលទានបន្ដ។
ជាន័យប្រៀបធៀប «ហុតទឹក សម្លឹកកាក» គឺចង់សំដៅដល់បុគ្គលណាម្នាក់ ដែលបានចាប់ធ្វើអ្វីមួយ ដោយមានចិត្ដ រំពឹងគិតដល់ផលប្រយោជន៍ និងគោលដៅ នាថ្ងៃក្រោយ។ សេចក្ដីនេះលោកសំដៅ ដល់បុគ្គលពួកខ្លះ ដែលសម្រេចធ្វើអ្វីមួយ លុះត្រាតែសម្លឹងឃើញផលប្រយោជន៍ ជាមុនសិន។
ជាឧទាហរណ៍ បុរសម្នាក់ តែងតែទិញចំណីអាហារ យកទៅផ្គាប់ចិត្ដឪពុកម្ដាយរបស់នារីម្នាក់ដោយមានក្តីរំពឹងក្នុងចិត្តថា រូបគេ នឹងបាននារីនោះ ធ្វើជាភរិយា។ ជាសេចក្តីឧបមាមួយទៀត អ្នកនយោបាយខ្លះ ប្រឹងធ្វើពើជាស្រឡាញ់និងគិតគូរពីសុខទុក្ខរបស់ប្រជាពលរដ្ឋ ដោយរំពឹងថា នឹងទទួលបានការគាំទ្រ ពេលបោះឆ្នោត។
យ៉ាងណា បុរាណលោក មិនសរសើរឡើយ ចំពោះទង្វើណា ដែលមិនផុសចេញពីដួងចិត្ដពិតប្រាកដ។ នៅក្នុងសង្គម មនុស្សគ្រប់រូប គប្បីចេះជួយគ្នាដោយសុទ្ធចិត្ដ ពោលគឺមិនត្រូវប្រើកលល្បិច ដើម្បីលាភសក្ការៈ នោះទេ។
ការបកស្រាយនេះ គឺយោងទៅតាមសៀវភៅសុភាសិតខ្មែរ ដែលរៀបរៀងដោយ លោក លី ថៃលី៕
Tag:
សុភាសិតខ្មែរ
ហុតទឹក សម្លឹងកាក
© រក្សាសិទ្ធិដោយ thmeythmey.com