កីឡាជាតិ
ជាតិ
ចិនជួយសង់កីឡដ្ឋានមរតកតេជោដំណាក់កាលទី២ ដែលគ្រោងចំណាយ១៥៧លានដុល្លារ
×![]()
ដោយ: ទេព ពិទូរ្យ
កីឡដ្ឋានធំ ឬកីឡដ្ឋានបាល់ទាត់ នៃពហុកីឡដ្ឋានមរតកតេជោ បានចាប់ផ្តើមសាងសង់នៅថ្ងៃទី៤ ខែមេសានេះ។ ជាការសាងសង់ដំណាក់កាលទី២ ដែលគ្រោងចំណាយទឹកប្រាក់ចំនួន១៥៧លានដុល្លារ ជាជំនួយឥតសំណងរបស់រដ្ឋាភិបាលចិន។
សម្តេច ហ៊ុន សែន ថ្លែងក្នុងពិធីសម្ពោធសមិទ្ធផលដំណាក់កាលទី១ និងបើកការដ្ឋានសាងសង់កីឡដ្ឋានដំណាក់កាលទី២ នៅពហុកីឡដ្ឋានជាតិមរតកតេជោ នៅថ្ងៃទី៤ ខែមេសាថា ការសាងសង់នឹងបញ្ចប់ក្នុងរយៈពេល៤០ខែ ពោលគឺនៅឆ្នាំ២០២០ ឬ២០២១ខាងមុខ។
កីឡដ្ឋានបាល់ទាត់ថ្មីនេះ អាចផ្ទុកមនុស្សបានរហូតប្រមាណ ៥ម៉ឺន ៥ពាន់នាក់ និងកន្លែងបម្រុង ៥ពាន់កន្លែង ដែលបំពាក់ដោយប្រព័ន្ធសង្គ្រោះបានរហ័ស ការពារបញ្ហាកើតឡើងជាយថាហេតុណាមួយ។
សមិទ្ធផលមួយចំនួន នៃពហុកីឡដ្ឋានមរតកតេជោ ដែលជាការសាងសង់ដំណាក់កាល ទី១ ត្រូវបានសម្ពោធឲ្យប្រើប្រាស់នៅថ្ងៃទី៤ ខែមេសានេះ ក្រោមវត្តមាន សម្តេច នាយករដ្ឋមន្ត្រីហ៊ុន សែន។ សមិទ្ធផលទាំងនោះរួមមាន អាងហែលទឹកកម្រិតអន្តរជាតិ និងសាលសម្រាប់ប្រកួតកីឡា។
អាងហែលទឹកចំនួន ៣ គឺអាងកំដៅសាច់ដុំ អាងសម្រាប់ហែលប្រកួត និងអាងលោតទឹក។ កន្លែងអង្គុយទស្សនាការហែលទឹក មានចំណុះ ៣ពាន់នាក់។ ចំពោះអគារសម្រាប់ប្រកួតកីឡាក្នុងសាល មានកន្លែងសម្រាប់ប្រកួតកីឡាប្រយុទ្ធ និងកីឡាផ្សេងៗទៀត ដូចជាបាល់ទះ វាយសី វាយកូនឃ្លីលើតុ បាល់បោះ និងប្រភេទកីឡានានាជាច្រើនទៀត។
សូមបញ្ជាក់ថា ពហុកីឡដ្ឋានថ្មី«មរតកតេជោ» ត្រូវសាងសង់លើផ្ទៃដីទំហំ ៨៥ហិតតា នៅតាមបណ្តោយផ្លូវលោកឧកញ៉ា លី យ៉ុងផាត់៕
Tag:
កីឡដ្ឋានធំ
ពហុកីឡដ្ឋានមរតកតេជោ
© រក្សាសិទ្ធិដោយ thmeythmey.com
