ព័ត៍មានសុខភាព
ចូរចាំណា!!! ផ្តាសាយរ៉ាំរ៉ៃត្រូវតែព្យាបាលព្រោះតែ...
× មនុស្សយើងភាគច្រើនតែងតែបន្ទោសទៅលើការប្រែប្រួលរបស់អាកាសធាតុភ្លាមៗដោយសារតែវាធ្វើឲ្យមានជំងឺផ្តាសាយ និងក្អករយៈពេលយូរ ហើយក៏បានព្យាយាមប្រើវិធីព្យាបាលតាមបែបធម្មជាតិជាច្រើនដើម្បីដោះស្រាយដែរ។ យ៉ាងណាមិញ បើសិនជាអ្នកឧស្សាហ៍ផ្តាសាយ ឬផ្តាសាយរ៉ាំរ៉ៃវិញ នោះវាអាចបញ្ជាក់ថា មានបញ្ហាអ្វីមួយនៅពីក្រោយហើយ ដែលត្រូវការព្យាបាលភ្លាម។
ខាងក្រោមនេះគឺជាមូលហេតុដែលអ្នកមិនគួរណាមិនខ្វល់មិនខ្វាយពេលមានជំងឺផ្តាសាយរ៉ាំរ៉ៃឡើយ៖
រលាកប្រហោងឆ្អឹងនៅមុខរ៉ាំរ៉ៃ
មែនហើយ នៅពេលអ្នកមានជំងឺផ្តាសាយ មានឱកាសច្រើនណាស់ដែលប្រហោងឆ្អឹងនៅមុខរង់ការស្ទះ ឬមានការបង្ករោគ។ បើសិនជាមិនបានព្យាបាលទេ វានឹងបង្កជាជំងឺរលាកប្រហោងឆ្អឹងនៅមុខរ៉ាំរ៉ៃបាន។
ការបង្ករោគ
មូលហេតុមួយដែលនាំឲ្យអ្នកត្រូវការព្យាបាលជំងឺផ្តាសាយគឺនៅពេលប្រព័ន្ធភាពស៊ាំចុះខ្សោយ។ ជាមួយគ្នានេះដែរ បើសិនជាប្រព័ន្ធភាពស៊ាំខ្សោយស្រាប់ អ្នកពិតជាងាយរងការបង្ករោគណាស់។ ដូច្នេះបើសិនជាអ្នកមិនខ្វល់អំពីជំងឺផ្តាសាយរ៉ាំរ៉ៃទៀត អ្នកអាចនឹងរងការបង្ករោគកាន់តែខ្លាំងបាន។
រលាកទងសួតរ៉ាំរ៉ៃ
បើសិនជាអ្នកមានជំងឺផ្តាសាយ យកល្អគួរតែពិគ្រោះជាមួយគ្រូពេទ្យដើម្បីទទួលបានការព្យាបាល ព្រោះកាលណាមានជំងឺនេះញឹកញាប់អាចបណ្តាលឲ្យរលាកនៅភ្នាសទងសួតបាន។ ដល់ពេលទុកវាកាន់តែយូរទៅ វានឹងទៅជាជំងឺរ៉ាំរ៉ៃតែម្តង។
រលាកស្រោមខួរក្បាល
បើសិនជាជំងឺផ្តាសាយបណ្តាលមកពីបាក់តេរី នោះមេរោគអាចនឹងរាលដាលចេញពីផ្លូវដង្ហើមចូលទៅខួរក្បាល និងប៉ះពាល់ដល់ស្រោមខួរក្បាលបាន។ ដូច្នេះស្ថិតក្នុងករណីជំងឺផ្តាសាយរ៉ាំរ៉ៃ ចូរពិគ្រោះជាមួយគ្រូពេទ្យដើម្បីយល់ដឹងអំពីមូលហេតុរបស់វាផងមុនពេលបាក់តេរីរាលដាលទៅកន្លែងផ្សេងៗទៀត។
រលាកក្រពេញអាមីដាស
ថ្វីបើវីរុសតែងតែជាមូលហេតុចំណបងនៃជំងឺរលាកក្រពេញអាមីដាសក៏ដោយ តែបាក់តែរីក៏ធ្វើឲ្យក្រពេញនេះរលាកបានដែរ។ ហើយការមានជំងឺផ្តាសាយរ៉ាំរ៉ៃក៏អាចជាសញ្ញាមួយនៃជំងឺរលាកក្រពេញអាមីដាសដែរ (អាចមាន ឬគ្មានការតឹងច្រមុះ ឬហៀរសម្បោ)។
ជំងឺរលាកសួត
ជំងឺផ្តាសាយរ៉ាំរ៉ៃអាចប៉ះពាល់ដល់សួត រហូតដល់ទៅជាជំងឺរលាកសួតបានបើសិនជាមិនបានព្យាបាល។ ថ្វីបើជំងឺរលាកសួតច្រើនកើតមានជាញឹកញាប់លើក្មេងៗក៏ដោយ តែមនុស្សចាស់ និងអ្នកមានប្រព័ន្ធភាពស៊ាំចុះខ្សោយក៏ប្រឈមនឹងជំងឺនេះដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com