កីឡាអន្តរជាតិ
អន្តរជាតិ
Sir Ferguson ជាមនុស្សដំបូងបំផុតដែលណែនាំ Ronaldo ឲ្យពាក់លេខ៧
× Cristiano Ronaldo ជាកីឡាករបាល់ទាត់ល្បីល្បាញលើលោកនាពេលបច្ចុប្បន្ននេះ និងតែងតែពាក់អាវលេខ៧រាល់ការប្រកួតសម្រាប់ក្រុមជម្រើសជាតិ និងក្លិបដែលខ្លួនប្រកបអាជីព។
អាវលេខ៧ ដែលខ្សែប្រយុទ្ធអន្តរជាតិព័រទុយហ្គាល់ចាប់ផ្តើមពាក់គឺចាប់តាំងពីរូបគេបានផ្លាស់ពីក្លិប Sporting Lisbon មកកាន់ទឹកដី Old Trafford កាលពីឆ្នាំ២០០៣។ លោក Sir Alex Ferguson អតីតអ្នកចាត់ការទូទៅក្រុម Manchester United ជាអ្នកណែនាំ Cristiano Ronaldo ឲ្យពាក់អាវលេខ៧នេះ ដោយសារអតីតអ្នកចាត់ការសញ្ជាតិស្កុតឡែនមើលឃើញថា Ronaldo ជាកីឡាករល្អ ហើយកីឡាករល្អៗរបស់ Man Utd តែងតែពាក់អាវលេខ៧។
«ខ្ញុំចង់ឲ្យអ្នកពាក់អាវលេខ៧» នេះជាសម្តីរបស់លោក Ferguson ប្រាប់ទៅ Ronaldo ដែលចូលលេងឲ្យ Man utd លើកដំបូងដែលមានវ័យទើប១៨ឆ្នាំប៉ុណ្ណោះ។
«ខ្ញុំមានអារម្មណ៍រំភើបយ៉ាងខ្លាំងនៅពេលគាត់ឲ្យខ្ញុំពាក់លេខ៧ ពីព្រោះខ្ញុំដឹងថាកីឡាករល្បីៗនៅទីនេះសុទ្ធតែធ្លាប់ពាក់អាវលេខ៧»។ នេះជាការលើកឡើងរបស់ Cristiano Ronaldo។
បើតាមការចុះផ្សាយរបស់ Goal.com ម្ចាស់ពាន Ballon d’Or ៤ដង ជាប់ចិត្តនឹងអាវលេខ៧នេះរហូតផ្លាស់ទៅ Real Madrid ក៏នៅតែពាក់លេខនេះដដែល ហើយមកទល់នឹងបច្ចុប្បន្នក៏បានបង្កើតម៉ាកផលិតផលផ្ទាល់ខ្លួន CR7 ដ៏ល្បីឈ្មោះថែមទៀតផង៕
Tag:
បាល់ទាត់
Alex Ferguson
Cristiano Ronaldo
© រក្សាសិទ្ធិដោយ thmeythmey.com