កីឡាអន្តរជាតិ
អន្តរជាតិ
ក្រោយលាលែងពីតំណែង លោក Kiatisuk រិះគន់សហព័ន្ធកីឡាបាល់ទាត់ថៃយ៉ាងចាស់ដៃ
× អតីតគ្រូបង្វឹកកីឡាបាល់ទាត់ជម្រើសជាតិថៃ លោក Kiatisuk Senamuang ដែលគេនិយមហៅថា «Zico»បានរិះគន់សហព័ន្ធកីឡាបា ល់ ទាត់ថៃ (FAT) ធ្ងន់ៗ ដោយលោកបានអះអាងថា ការកំណត់មហិច្ឆតា ខ្ពស់ពេកក្នុងការប្រកួត World Cup ជាដើមចមដែលនាំឲ្យលោកចាកចេញពីតំណែង។ នេះបើតាមការផ្សាយរបស់កាសែតបាងកកប៉ុស្តិ៍។
Kiatisuk Senamuang បានលាលែងពីតំណែងជាគ្រូបង្វឹកក្រុមបាល់ទាត់ជម្រើសជាតិថៃ កាលពីថ្ងៃសុក្រសប្តាហ៍មុន ក្រោយដឹកនាំក្រុមថៃចាញ់ អារ៉ាបីសាអូឌីត ៣-០ និងចាញ់ក្រុមជប៉ុន ៤-០ ក្នុងវគ្គជម្រុះជុំទី៣ World Cup ២០១៨ នៅរុស្ស៊ី។ ការចាញ់ផ្ទួនៗគ្នានេះបានធ្វើឲ្យប្រធានសហព័ន្ធកីឡាបាល់ទាត់ថៃលោក Somyot Poompunmuang រិះគន់ថាជាបរាជ័យដ៏អាម៉ាស និងខ្មាសគេបំផុត។
៧ប្រកួតក្រោមការដឹកនាំរបស់ Zico ក្នុងព្រឹត្តិការណ៍ជម្រុះវគ្គទី៣ក្នុងតំបន់អាស៊ីនេះ ថៃដែលស្ថិតក្នុងពូលB រកបានតែមួយពិន្ទុប៉ុណ្ណោះ ក្នុងចំណោម៧ប្រកួត ដោយស្មើម្តង និងចាញ់៦ដង ហើយធ្លាក់ចេញពីព្រឹត្តិការណ៍ពិភពលោកនេះដោយស្វ័យប្រវត្តិតែម្តង បើទោះសល់៣ប្រកួតក្នុងដៃទៀតក៏ដោយ។
«ខ្ញុំលាលែងពីតំណែងគ្រូបង្វឹកជម្រើសជាតិថៃកាលពីថ្ងៃទី៣១ ខែមេសា ដើម្បីឲ្យ FAT រីកចម្រើនទៅមុខទៀត។ ខ្ញុំសូមទោស ដែលខ្ញុំមិនអាចនាំក្រុមជម្រើសជាតិថៃឆ្ពោះទៅលេង World Cup នៅរុស្ស៊ីឆ្នាំក្រោយនេះ»។ នេះជាការលើកឡើងរបស់អតីតអ្នកចាត់ការវ័យ៤៣ឆ្នាំក្នុងបទសម្ភាសន៍លើកដំបូងកាលពីលោកលាលែងពីតំណែង។
លោកបានបន្ថែមទៀតថា៖« អ្វីដែលអ្នកទាំងអស់គ្នាចង់បានគឺខ្ពស់ពេកហើយដូច្នេះខ្ញុំត្រូវតែចាកចេញ ដើម្បីទុកផ្លូវឲ្យអ្នកថ្មីមកជំនួសតំណែងនេះ។ វាពិបាកណាស់ដើម្បីសម្រេចគោលដៅមួយនេះ។ ឈ្នះចាញ់ ឬស្មើ ជាការប្រកួតក្នុងកីឡាប៉ុណ្ណោះ យើងមិនអាចឈ្នះរហូតបានឡើយ។ យើងចាញ់ក្នុងការប្រកួត ប៉ុន្តែយើងឈ្នះទឹកចិត្តអ្នកគាំទ្រ។ ប៉ុន្តែទាំងអស់ខាងលើនេះ ជាអ្វីដែលប្រធានសហព័ន្ធកីឡាបាល់ទាត់ថៃ និងគណៈគ្រប់គ្រង ចង់ឲ្យខ្ញុំធ្វើវាឲ្យបាន»។
អតីតកីឡាករ Huddersfield Town ធ្លាប់ដឹកនាំក្រុមដំរីសង្គ្រាមឈ្នះពាន Suzuki Cup ២ដង មេដាយមាសស៊ីហ្គេមម្តង និងជួយថៃក្លាយជាក្រុមតែមួយគត់របស់អាស៊ានដែលបានឈានទៅប្រកួតក្នុងវគ្គជម្រុះជុំចុងក្រោយដើម្បីឈានទៅវគ្គផ្តាច់ព្រ័ត្រពានលំដាប់ពិភពលោក World Cup ឆ្នាំ២០១៨ នៅប្រទេសរុស្ស៊ី៕
Tag:
បាល់ទាត់
Zico
World Cup
Kiatisuk Senamuang
© រក្សាសិទ្ធិដោយ thmeythmey.com