អន្តរជាតិ
កងទ័ពបារាំងក្នុងប្រតិបត្តិការនៅម៉ាលី (រូបភាព AFP)
×![]()
ដោយ: តន ចាន់រិទ្ធារ៉ា
ការចាកចេញរបស់ចក្រភពអង់គ្លេសពីសហភាពអឺរ៉ុប មិនត្រឹមតែប៉ះពាល់លើវិស័យនយោបាយ និងសេដ្ឋកិច្ចទេ តែក៏ប៉ះពាល់ឥទ្ធិពលយោធារបស់អឺរ៉ុបដែរ។ ចក្រភពអង់គ្លេស គឺជាមហាអំណាចយោធាដ៏ធំប្រចាំអឺរ៉ុប ដែលចាយលុយច្រើនសម្រាប់ការចំណាយរបស់សម្ព័ន្ធយោធាណាតូ។ ជាមួយការចាកចេញរបស់អង់គ្លេស និងការទាមទាររបស់អាមេរិកឲ្យអឺរ៉ុបបង្កើនថ្លៃចំណាយ អម្រែកហិរញ្ញវត្ថុដ៏ធ្ងន់នេះ នឹងធ្លាក់លើស្មារបស់បារាំង ដែលជាមហាអំណាចយោធាប្រចាំអឺរ៉ុបមួយដែរ។
ចក្រភពអង់គ្លេស គឺជាមហាអំណាចយោធាដ៏ធំ ដែលមានកម្លាំងច្រើន ហើយខ្លាំង និងតែងចាប់ដៃជាមួយអាមេរិកក្នុងប្រតិបត្តិការយោធាជុំវិញពិភពលោក។ ការចាកចេញរបស់ចក្រភពអង់គ្លេស ក៏ជាការចាកចេញកងម្លាំងទ័ពធំដែរ ហើយក៏ជាការចាកចេញរបស់រដ្ឋសមាជិកដែលមានគ្រាប់នុយក្លេអ៊ែរដែរ។ ក្រៅពីអង់គ្លេស មានតែបារាំងប៉ុណ្ណោះ ដែលមាននុយក្លេអ៊ែរក្នុងឃ្លាំងអាវុធរបស់ខ្លួន ហើយបារាំងនឹងត្រូវទទួលបន្ទុកសន្តិសុខអឺរ៉ុប ជំនួសអ្វីដែលអង់គ្លេសធ្លាប់ធ្វើមិនខាន។
ក្នុងចំណោមរដ្ឋសមាជិកណាតូមកពីតំបន់អឺរ៉ុប បារាំងជាអ្នកចំណាយលុយច្រើនជាងគេ បន្ទាប់ពីអង់គ្លេស។ ក្រោយអង់គ្លេសចាកចេញ បារាំង នឹងក្លាយជាអ្នកចូលរួមមវិភាគទានឲ្យណាតូច្រើនជាងគេវិញម្ដង ហើយចំណាយច្រើនជាងអាល្លឺម៉ង់ទៅទៀត។ អាមេរិក គឺជាអ្នកចេញថ្លៃចំណាយរបស់ណាតូច្រើនជាងគេ ហើយក៏បានទទូចឲ្យសមាជិកណាតូផ្សេងទៀត ជួយចេញថ្លៃចំណាយឲ្យបាន២ភាគរយតាមការសន្យាទៀតផង។
តាមការផ្សាយរបស់សារព័ត៌មាន France 24 ការចំណាយប្រចាំឆ្នាំ២០១៦របស់ណាតូបង្ហាញថា ចក្រភពអង់គ្លេស ចាយប្រាក់ចំនួន៤៩.៣លានអឺរ៉ូ, បារាំងចំនួន៣៩.៨លានអឺរ៉ុប ចំណែកអាល្លឺម៉ង់ចេញ៣៧.១លានអឺរ៉ុប។ បើគិតជាភាគរយវិញ អង់គ្លេស ចេញថ្លៃចំណាយសម្រាប់ណាតូ លើសពីការកំណត់នៃការសន្យា ២ភាគរយ។ ប៉ុន្តែបារាំង និងអាល្លឺម៉ង់ មិនទាន់អាចចេញប្រាក់ដូចការកំណត់ទេ ដោយថ្លៃចំណាយបារាំងមានតែ១.៨ភាគរយ ហើយអាល្លឺម៉ង់មានតែ១.២ភាគរយ។
យ៉ាងណាក្ដី ក្នុងនាមជាមហាអំណាចពិភពលោក និងជាសមាជិកអចិន្ត្រៃយ៍ក្រុមប្រឹក្សាសន្តិសុខ បារាំងក៏ត្រូវតែចេញមុខមាត់ឲ្យបានច្រើន សក្តិសមជាឈ្មោះមហាអំណាចរបស់ខ្លួន។ បារាំង បានធ្វើប្រតិបត្តិការយោធាជាច្រើននារយៈពេលចុងក្រោយ ជាពិសេសតំបន់អាហ្វ្រិក។ ទាហានបារាំងកំពុងចូលរួមប្រតិបត្តិការរក្សាសន្តិភាពនៅម៉ាលី និងសាធារណរដ្ឋអាហ្វ្រិកកណ្ដាល។ បារាំងក៏ជាសមាជិកសម្ព័ន្ធភាពប្រឆាំងក្រុមរដ្ឋឥស្លាមនៅស៊ីរី និងអ៊ីរ៉ាក់ដែរ។
ជាមួយបន្ទុកដ៏ធ្ងន់ក្រោយការចាកចេញរបស់អង់គ្លេស បារាំង ទំនងជាចាប់ដៃជាមួយអាល្លឺម៉ង់ ដើម្បីបំពេញចន្លោះបន្សល់ទុកដោយការចាកចេញនេះ។ នារយៈពេលចុងក្រោយ ក្រុងបែរឡាំង និងក្រុងប៉ារីស ក៏បាននិងកំពុងដើរតួសំខាន់ក្នុងការរក្សាសសណ្ដាប់ធ្នាប់នៅអឺរ៉ុប ចំពេលការគំរាមកំហែងលើតំបន់នេះ ក៏កំពុងកើនឡើងដូចគ្នា។ ការវាយប្រហារភេរវកម្ម និងលំហូរជនភៀសខ្លួន សុទ្ធតែជាបញ្ហាឈឺក្បាលសម្រាប់អឺរ៉ុប ដែលត្រូវរកដំណោះស្រាយបន្ទាន់ផងដែរ៕
Tag:
បារាំង
អង់គ្លេស
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
