ភ្នំពេញ៖ ឪពុកម្តាយ និង កូនប្រុសស្រី ហើយស្វាមី និង ភរិយា ត្រូវមានសង្គហធម៌ចំពោះគ្នាទៅវិញទៅមក។ សង្គហធម៌ គឺសំដៅដល់ ធម៌សម្រាប់សង្គ្រោះគ្នារវាង ឪពុកម្តាយនិងកូនប្រុសស្រី ស្វាមីនិងភរិយា គ្រូបាចារ្យនិងសិស្ស ចៅហ្វាយនាយនិងកម្មករ ជាដើម។ សារព័ត៌មានថ្មីៗ សូមរៀបរាប់ តែសង្គហធម៌រវាង ឪពុកម្តាយនិងកូនប្រុសស្រី ហើយស្វាមីនិង ភរិយា ប៉ុណ្ណោះ។
សង្គហធម៌៥យ៉ាង ដែលឪពុកម្តាយ ត្រូវមានចំពោះកូនប្រុសស្រី ដូចខាងក្រោម៖
១- ហាមឃាត់កូនមិនឲ្យប្រព្រឹត្តអំពើអាក្រក់
២- ឲ្យកូនប្រព្រឹត្តតែអំពើល្អ
៣- ឲ្យកូនរៀនសូត្រ
៤- រៀបចំគ្រួសារឲ្យកូន
៥- ចែកទ្រព្យឲ្យកូន
សង្គហធម៌៥យ៉ាង ដែលកូនប្រុសស្រី ត្រូវមានចំពោះឪពុកម្តាយ គឺ
១- គប្បីចិញ្ចឹមថែរក្សាឪពុកម្តាយវិញ
២- គប្បីជួយធ្វើការងារឪពុកម្តាយ
៣-គប្បីថែរក្សាវង្សត្រកូលឲ្យបានល្អ
៤- គប្បីគោរពប្រតិបត្តិឪពុកម្តាយ ឲ្យបានល្អ
៥- ត្រូវធ្វើបុណ្យជូនឪពុកម្តាយ ពេលពួកគាត់ ធ្វើមរណកាល
សង្គហធម៌៥យ៉ាង ដែលស្វាមី ត្រូវមានចំពោះភរិយា គឺ
១- ស្រឡាញ់ភរិយា ដោយស្មោះ
២- មិនមើលងាយ ភរិយាដូចជាខ្ញុំកំដរ
៣- មិនក្បត់ភរិយា ទៅមានស្រីផ្សេង
៤- ប្រគល់អំណាចជាធំ ឲ្យភរិយា ធ្វើជាស្ត្រីមេផ្ទះ
៥- គប្បីរៀបចំឲ្យមានគ្រឿងអលង្ការដល់ភរិយា
សង្គហធម៌៥យ៉ាង ដែលភរិយា ត្រូវមានចំពោះស្វាមី គឺ
១- គប្បីចាត់ចែងម្ហូបអាហារ ជូនស្វាមី
២- គប្បីសង្គ្រោះញាតិខាងស្វាមី និងញាតិខាងខ្លួន ដោយប្រពៃ
៣- មិនត្រូវក្បត់ចិត្តស្វាមី ទៅមានប្រុសផ្សេង
៤- គប្បីថែទាំទ្រព្យសម្បត្តិ ដែលស្វាមីរកបាន
៥- គប្បីឈ្លាសវៃក្នុងការងារផ្សេងៗ
ប្រភព៖ សៀវភៅ «អាមិសទាន និង ធម្មទាន» ដែលរៀបរៀងដោយលោក ឈុន គឹមអៀត និងគេហរទំព័រ ៥០០០ ឆ្នាំ