ជាតិ
រដ្ឋបាល ដូណាល់ ត្រាំ ផ្ញើសារជូនពរពលរដ្ឋកម្ពុជានាឱកាសបុណ្យចូលឆ្នាំប្រពៃណីខ្មែរ
× «តាងនាមឲ្យរដ្ឋបាលអាមេរិក ខ្ញុំជូនពរប្រជាពលរដ្ឋកម្ពុជាក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែរ»។ នេះជាសារជូនពររបស់រដ្ឋមន្ត្រីការបរទេសអាមេរិកលោក Rex Tillerson ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។
រដ្ឋបាលអាមេរិករបស់លោក ដូណាល់ ត្រាំ បានផ្ញើសារជូនពរដល់ប្រជាជនកម្ពុជាក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរពីថ្ងៃ១៤, ១៥ និងថ្ងៃ ១៦ មេសា។ តាងនាមឲ្យរដ្ឋបាលអាមេរិក រដ្ឋមន្ត្រីការបរទេសបរទេសអាមេរិកលោក Rex Tillerson ជូនពរដល់ប្រជាជនកម្ពុជាគ្រប់ក្រុមគ្រួសារឲ្យជួបប្រទះតែសេចក្តីសុខ សន្តិភាព វិបុលសុខ និងសិរីមង្គលក្នុងឱកាសឆ្នាំថ្មីនេះ។
យោងតាមទំព័រហ្វេសប៊ុកផ្លូវការរបស់ស្ថានទូតអាមេរិកប្រចាំនៅកម្ពុជា លោក Rex Tillerson បានលើដូច្នេះ៖« បុណ្យចូលឆ្នាំប្រពៃណីខ្មែរនេះ ជាឱកាសដែលអាចឆ្លុះបញ្ចាំងពីភាពជាដៃគូប្រកបដោយផ្លែផ្ការវាងកម្ពុជានិងអាមេរិក។ យើងបានធ្វើការរួមគ្នាដើម្បីបង្កើនទំនាក់ទំនងពាណិជ្ជកម្ម, ពង្រឹងសមត្ថភាពអង្គការសង្គមស៊ីវិល, ធ្វើឲ្យវិស័យសុខាភិបាលប្រសើរឡើង និងការពារសម្បត្តិធម្មជាតិ និងមរតកវប្បធម៌ផងដែរ»។
លោក Tillerson បន្តថា៖«ខណៈដែលអ្នកជួបជុំគ្រួសារ មិត្តភក្តិ និងអ្នកជិតខាងដើម្បីប្រារព្ធពិធីបុណ្យប្រពៃណីជាតិនេះ អ្នកដឹងថា អាមេរិកនៅឈរជាមួយកម្ពុជាក្នុងនាមជាមិត្តនិងជាដៃគូ។ សូមអបអរសាទរនិងសូមឲ្យឆ្នាំថ្មីនេះនាំមកនូវសេចក្តីសុខ សន្តិភាព សិរីមង្គល វិបុលសុខ និងរីករាយឆ្នាំថ្មី»។
សូមបញ្ជាក់ថា សហរដ្ឋអាមេរិកនិងកម្ពុជាបានបង្កើតចំណងការទូតទ្វេភាគីពេញលេញនៅក្នុងឆ្នាំ ១៩៩៣ ហើយចំណងសេដ្ឋកិច្ចទ្វេភាគីត្រូវបានស្តារជាផ្លូវការនៅឆ្នាំ ១៩៩២។បច្ចុប្បន្ននេះអាមេរិកក្លាយជាប្រទេសដែលទទួលទិញផលិតផលកម្ពុជាច្រើនជាងគេផងដែរ៕
© រក្សាសិទ្ធិដោយ thmeythmey.com