អន្តរជាតិ
ទូតអាមេរិកនៅក្រុងឡុងដ៍សង្ស័យទារក៣ខែម្នាក់ពាក់ព័ន្ធភេរវកម្ម តែតាមពិត...
× កុមារអាយុត្រឹម៣ខែម្នាក់ ត្រូវបាននាំទៅកាន់ស្ថានទូតអាមេរិកប្រចាំទីក្រុងឡុងដ៍ បន្ទាប់ពីជីតារបស់គេបានគូសច្រឡំលើពាក្យសុំទិដ្ឋាការ ដោយធ្វើឲ្យមន្ត្រីទូតគិតថា ក្មេងនោះជាប់ទាក់ទងនឹងអំពើភេរវកម្ម។ នេះបើតាមការផ្សាយរបស់កាសែត The Guardian កាលពីថ្ងៃទី១៦ ខែមេសា។
នៅលើពាក្យសុំទិដ្ឋាការទៅសហរដ្ឋអាមេរិក មានសំណួរមួយថា «តើលោកអ្នកស្វែងរកការចូលរួម ឬធ្លាប់ពាក់ព័ន្ធនឹងសកម្មភាពភេរវកម្ម ចារកម្ម ការបំផ្លិចបំផ្លាញដោយចេតនា ឬអំពើប្រល័យពូជសាសន៍ដែរឬទេ?» (Do you seek to engage in or have you ever engaged in terrorist activities, espionage, sabotage, or genocide?) ។ ដោយសារមិនបានយកចិត្តទុកដាក់ លោក Paul Kenyon ជនជាតិអង់គ្លេស អាយុ៦២ឆ្នាំ បានគូសច្រឡំលើចម្លើយ «Yes» នៅលើពាក្យសុំទិដ្ឋាការរបស់ចៅប្រុស។
តាមគម្រោងទារកអាយុ៣ខែឈ្មោះ Harvey Kenyon-Cairns គ្រោងធ្វើដំណើរទៅក្រៅប្រទេសលើកដំបូងពីទីក្រុងឡុងដ៍ ប្រទេសអង់គ្លេស ឆ្ពោះទៅក្រុង Orlando រដ្ឋហ្វ្លរីដា សហរដ្ឋអាមេរិក ជាលើកដំបូង ជាមួយឪពុកម្តាយ និងជីដូនជីតា។
លោក Paul Kenyon មិនបានដឹងថា ខ្លួនបង្កើតកំហុសនោះឡើយ ប៉ុន្តែលោកភ្ញាក់ផ្អើលនៅពេលដែលទិដ្ឋាការបស់ចៅប្រុសខ្លួន ត្រូវបានបដិសេធ។ លោកបានលើកឡើងប្រាប់ The Guardian ថា៖ «ខ្ញុំសឹងមិនជឿសោះថា វាជាកំហុសដ៏ធំមួយ ពីព្រោះទារកអាយុ៣ខែ មិនអាចធ្វើបាបអ្នកណាបាននោះឡើយ»។
ទារក Harvey និងជីតារបស់ខ្លួន ត្រូវបាននាំចេញពីផ្ទះខ្លួននៅតំបន់ Poynton, Cheshire ឆ្ពោះទៅកាន់ស្ថានទូតអាមេរិក ប្រចាំទីក្រុងឡុងដ៍ ដើម្បីឲ្យមន្ត្រីជំនាញសាកសួរ។ លោក Kenyon បានអះអាងថា វាគ្រាន់តែជាការភាន់ច្រឡំប៉ុណ្ណោះ។
ក្រោយសាកសួរអស់ជាច្រើនម៉ោង មន្ត្រីស្ថានទូត បានសម្រេចឲ្យ Harvey និងជីតាត្រឡប់ទៅផ្ទះវិញ។ ទោះបីជាយ៉ាងណាក៏ដោយ កំហុសអចេតនានេះ បានធ្វើឲ្យអ្នកទាំងពីរខកជើងហោះហើរ ដោយសមាជិកគ្រួសារផ្សេងទៀតបានធ្វើដំណើរទៅមុន។ បន្ថែមពីនេះ លោក Kenyon ត្រូវចំណាយប្រាក់៣០០០ផោន (៣៨០០ដុល្លារអាមេរិកបន្ថែមទៀត) ដើម្បីទិញសំបុត្រយន្តហោះថ្មី និងរៀបចំពាក្យសុំទិដ្ឋាកាឲ្យចៅឡើងវិញ។
លោក Kenyon បាននិយាយបែបកំប្លែងថា ចៅប្រុស Harvey ជាក្មេងល្អ ដោយរូបគេមិនបានស្រែកយំឡើយនៅពេលដែលមន្ត្រីស្ថានទូតសម្ភាស។ លោកបញ្ជាក់ថា៖ «Harvey មិនដែលចូលរួមក្នុងអំពើប្រល័យពូជសាសន៍ ឬចារកម្មអ្វីឡើយ ប៉ុន្តែគេបានធ្វើឲ្យប្រឡាក់កន្ទបទឹកនោមមួយចំនួននៅពេលសម្ភាស ករណីនេះ ខ្ញុំមិនបានរាយការណ៍ប្រាប់មន្ត្រីទូតអាមេរិកឡើយ»៕
© រក្សាសិទ្ធិដោយ thmeythmey.com