លោក Pence ថាដំណោះស្រាយសន្តិភាពនៅតែមាន ទោះអាមេរិកគំរាមប្រើទ័ពដាក់កូរ៉េខាងជើង

អន្តរជាតិ

លោក Pence ថាដំណោះស្រាយសន្តិភាពនៅតែមាន ទោះអាមេរិកគំរាមប្រើទ័ពដាក់កូរ៉េខាងជើង

22, Apr 2017 , 3:47 pm

រូបភាព

ដោយ: តន ចាន់រិទ្ធារ៉ា

អនុប្រធានាធិបតីអាមេរិក Mike Pence បានបង្ហាញគំនិតសុទិដ្ឋិនិយមក្នុងការសម្រេចបានដំណោះស្រាយសន្តិភាពសម្រាប់បញ្ហានុយក្លេអ៊ែរកូរ៉េខាងជើង បើទោះជាអាមេរិកអស់ការអត់ធ្មត់នឹងទង្វើរបស់កូរ៉េខាងជើងក្ដី។ បើតាមលោក Pence ការលុបបំបាត់នុយក្លេអ៊ែរពីឧបទ្វីបកូរ៉េអាចធ្វើបានដោយគ្មានសង្គ្រាម ព្រោះពេលនេះអាមេរិក កំពុងធ្វើការជាមួយចិន ដើម្បីដោះស្រាយបញ្ហានេះដោយមិនចាំបាច់ប្រឈមមុខគ្នាអ្វីឡើយ។

នារយៈពេលចុងក្រោយ ស្ថានការណ៍ឧបទ្វីបកូរ៉េនៅតែតានតឹងខ្លាំងដោយសារមហិច្ឆតានុយក្លេអ៊ែរកូរ៉េខាងជើង។ អាមេរិក គំរាមកម្លាំងដោះស្រាយដើម្បីដោះស្រាយបញ្ហានេះ ព្រោះការចរចាគ្មានបានផលអ្វីឡើយ។ ទាំងកូរ៉េខាងជើង ទាំងអាមេរិក និងសម្ព័ន្ធមិត្តសុទ្ធស្ថិតក្នុងស្ថានភាពប្រុងជើងការខ្ពស់។ ប៉ុន្តែរដ្ឋបាលក្រុងវ៉ាស៊ីនតោន ក៏នៅតែមានជំនឿថា បញ្ហានុយក្លេអ៊ែរកូរ៉េខាងជើង អាចដោះស្រាយបានតាមផ្លូវសន្តិភាព។

ថ្លែងពីអូស្ត្រាលីនៅថ្ងៃទី២២ ខែមេសា អនុប្រធានាធិបតីអាមេរិក Mike Pence និយាយថា ការធ្វើឲ្យឧបទ្វីបកូរ៉េជាតំបន់គ្មាននុយក្លេអ៊ែរ អាចសម្រេចបានតាមមធ្យោបាយសន្តិភាព ដោយសារកិច្ចសហប្រតិបត្តិការថ្មីរវាងអាមេរិក និងចិន។ បើតាមទីភ្នាក់ងារព័ត៌មាន Reuters លោក Pence ជឿថា ជាមួយនឹងការដាក់សម្ពាធខ្លាំងពីសំណាក់ប្រទេសក្នុងតំបន់មានចិនជាដើម ឱកាសនៅតែមានក្នុងលុបបំបាត់នុយក្លេអ៊ែរពីឧបទ្វីបកូរ៉េ។

ចំពោះមុខនាយករដ្ឋមន្ត្រីអូស្ត្រាលី Malcolm Turnbull អនុប្រធានាធិបតីអាមេរិករូបនេះ ក៏បានសរសើរចំណាត់ការរបស់ចិននាពេលថ្មីៗនេះ។ លោក Pence ទំនងចង់សំដៅដល់ការបង្ហាញការព្រួយបារម្ភរបស់ចិនជុំវិញទង្វើរបស់កូរ៉េខាងជើង និងការផ្អាកការនាំចូលធ្យូងថ្មជាដើម។ សកម្មភាពថ្មីៗទាំងនេះ ក៏ទទួលបានការសរសើរច្រើនពីសំណាក់ប្រធានាធិបតី ដូណាល់ ត្រាំ ដែរ ដោយលោកចាត់ទុកជាទង្វើដែលមិនធម្មតា។

ក្រុងវ៉ាស៊ីនតោន បានទទូចឲ្យក្រុងប៉េកាំងបញ្ចេញចំណាត់ការបានខ្លាំងតាមអាចធ្វើបាន ដើម្បីបង្ខំឲ្យរបបក្រុងព្យុងយ៉ាងបោះបង់មហិច្ឆតាអភិវឌ្ឍនុយក្លេអ៊ែរចោល។ វ៉ាស៊ីនតោន ជឿថា ជាសម្ព័ន្ធមិត្តចាក់ទឹកមិនលិច និងជាអ្នកជិតខាងមួយ ប៉េកាំងពិតជាឥទ្ធិពលខ្លាំងលើរបបដឹកនាំព្យុងយ៉ាង។ លើសពីនោះ រដ្ឋបាលក្រុងវ៉ាស៊ីនតោន ថែមទាំងយករឿងពាណិជ្ជកម្ម មកធ្វើជាថ្នូរឲ្យក្រុងប៉េកាំងជួយដោះស្រាយបញ្ហាសាំញាំនេះផងដែរ។

យ៉ាងណាក្ដី ទឹកមាត់របស់ចិន ទំនងលែងប្រៃដូចមុនហើយចំពោះមេដឹកនាំកូរ៉េខាងជើង គីម ជុងអ៊ុន ។ ការព្រួយបារម្ភ និងការឈប់នាំចូលធ្យូងថ្មដែលអនុវត្តតាមសេចក្ដីសម្រេចរបស់ក្រុមប្រឹក្សាសន្តិសុខ ធ្វើឲ្យទំនាក់ទំងនងទ្វេភាគីចិន និងកូរ៉េខាងជើង រអាក់រអួលខ្លាំង។ មេដឹកនាំវ័យក្មេង គីម ជុងអ៊ុន ក៏មិនស្ដាប់ការព្រួយបារម្ភនេះដែរ ហើយថែមទាំងគំរាមវាយបកលើទាហាននៅកូរ៉េខាងត្បូង ជប៉ុន និងគោលដៅអាមេរិកដីគោកទៅទៀត៕