វិទ្យុអាស៊ីសេរី៖ លោក ជុន ច័ន្ទបុត្រ មិនបានប្រព្រឹត្តបទល្មើសឡើយ

ជាតិ

នយោបាយជាតិ

វិទ្យុអាស៊ីសេរី៖ លោក ជុន ច័ន្ទបុត្រ មិនបានប្រព្រឹត្តបទល្មើសឡើយ

27, Apr 2017 , 12:30 pm

រូបភាព

រូបភាពពីហ្វេប៊ុកឈ្មោះ Chun Chanboth Vuthy Huot

ដោយ: ម៉ៅ សុផា

ភ្នំពេញ៖ វិទ្យុអាស៊ីសេរី អះអាងថា លោក ជុន ច័ន្ទបុត្រ មិនបានធ្វើខុសនឹងផ្លូវច្បាប់ ដោយសារតែការចូលទៅជួបមន្ត្រីនិងសកម្មជនបក្សប្រឆាំងក្នុងពន្ធនាគារព្រៃស នោះទេ។ ប៉ុន្តែ សម្រាប់តុលាការ លោក ជុន ច័ន្ទបុត្រ បានក្លាយជាជនសង្ស័យ បាត់ទៅហើយ នៅក្នុងសំណុំរឿងដ៏រសើបមួយនេះ។

ខណៈតុលាការ កំពុងតែដំណើរការនីតិវិធីលើរឿងក្តីរបស់លោក ហួត ឃីនវុទ្ធី ហៅ ជុន ច័ន្ទបុត្រ អនុប្រធានវិទ្យុអាស៊ីសេរីផ្នែកខេមរភាសា ដែលបានអមដំណើរជាមួយនឹងតំណាងរាស្ត្រគណបក្សសង្គ្រោះជាតិ ចូលទៅសួរសុខទុក្ខអ្នកជាប់ឃុំក្នុងពន្ធនាគារព្រៃស កាលពីបុន្មានថ្ងៃមុន វិទ្យុអាស៊ីសេរី ក៏បានចេញសេចក្តីថ្លែងការណ៍មួយ ដើម្បីបំភ្លឺជុំវិញបញ្ហានេះ។ សេចក្តីថ្លែងការណ៍ ដែលមានត្រឹមតែជាសារ ដោយមិនមានលិខិតផ្លូវការ ហើយត្រូវបានបង្ហោះនៅលើទំព័រហ្វេសប៊ុករបស់វិទ្យុអាស៊ីសេរី នៅថ្ងៃទី២៧ ខែមេសា ឆ្នាំ២០១៧នេះ បានលើកឡើងថា សកម្មភាពរបស់លោក ជុន ច័ន្ទបុត្រ ដែលធ្វើដំណើរជាមួយតំណាងរាស្ត្រគណបក្សសង្គ្រោះជាតិ ក្នុងការចូលទៅជួបអ្នកជាប់ឃុំក្នុងពន្ធនាគារព្រៃស មិនមែនជាការបន្លំខ្លួន ដូចការចោទប្រកាន់របស់សមត្ថកិច្ច ឬតុលាការ នោះទេ។

សេចក្តីថ្លែងការណ៍នោះ បានសរសេរដូច្នេះថា៖«លោក ជុន ច័ន្ទបុត្រ មិនបានប្រព្រឹត្តបទល្មើសព្រហ្មទណ្ឌណាមួយ ឡើយ។ […..] យើងខ្ញុំនៅអាស៊ីសេរី ចាត់ទុកការគំរាមកំហែងបែបនេះ ជាករណីធ្ងន់ធ្ងរ»។

តាមរយៈសេចក្តីថ្លែងការណ៍របស់ខ្លួន ដែលមានទាំងភាសាខ្មែរនិងភាសាអង់គ្លេស វិទ្យុអាស៊ីសេរី បានហៅចំណាត់ការរបស់សមត្ថកិច្ចនិងតុលាការ ទៅលើលោក ជុន ច័ន្ទបុត្រ ថាជារឿងហួសហេតុ និងជាការធ្វើទុក្ខបុកម្នេញដល់អ្នកសារព័ត៌មាន ដែលបម្រើការងារនៅក្នុងស្ថាប័នរបស់ខ្លួន ជាពិសេសស្ថិតក្នុងកាលៈទេសៈ ដែលការបោះឆ្នោត កាន់តែខិតជិតមកដល់។

ចំណាត់ការរបស់តុលាការ ទៅលើលោក ជុន ច័ន្ទបុត្រ មិនអាចរំខានឬរារាំងអ្នកសារព័ត៌មានរបស់វិទ្យុអាស៊ីសេរី ក្នុងការបំពេញការងារនោះទេ ទោះជាមានរឿងបែបនេះ កើតឡើង ក៏ដោយ។ នេះ បើតាមសេចក្តីថ្លែងការណ៍របស់វិទ្យុអាស៊ីសេរីខាងលើ ដដែល។

យ៉ាងណា ទង្វើរបស់លោក ជុន ច័ន្ទបុត្រ បានក្លាយជាអង្គហេតុ ដែលព្រះរាជអាជ្ញានៃសាលាដំបូងរាជធានីភ្នំពេញ ចាប់ផ្តើបស៊ើបអង្កេតបាត់ទៅហើយ។ ព្រះរាជអាជ្ញា បានចេញដីកា កោះហៅលោក ជុន ច័ន្ធបុត្រ ឲ្យចូលទៅបំភ្លឺពីសំណុំរឿងនេះ នៅថ្ងៃទី២ ខែឧសភា ឆ្នាំ២០១៧។ នៅក្នុងដីកាកោះ ព្រះរាជអាជ្ញា បានចាត់ទុកលោក ជុន ច័ន្ទបុត្រ ថាជាបុគ្គល ដែលជាប់ពាក់ព័ន្ធនឹង «ដំណើររឿង ផ្តល់សេចក្តីប្រកាសដោយភូតកុហក បន្លំខ្លួនចូលពន្ធាគារ»។

មាត្រា៦៣៣ នៃក្រមព្រហ្មទណ្ឌ បានចែងថា អំពើផ្តល់សេចក្តីប្រកាសដោយភូតកុហកដល់រាជការសាធារណៈ ដើម្បីទទួលបានវិភាជន៍ ការបើកប្រាក់ ឬ អត្ថប្រយោជម៍ដោយខុសច្បាប់ ត្រូវផ្តន្ទាទោសដាក់ពន្ទនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល។

នៅថ្ងៃទី២៧ ខែមេសា ឆ្នាំ២០១៧នេះ លោក ឡុង រី តំណាងរាស្ត្រគណបក្សសង្គ្រោះជាតិ បានចូលទៅបំភ្លឺនៅចំពោះមុខព្រះរាជអាជ្ញា ក្នុងនាមជាសាក្សី ជុំវិញសំណុំរឿងខាងលើ។ ចំណែកឯ លោកស្រី មូរ សុខហួរ តំណាងរាស្ត្រនិងជាអនុប្រធានគណបក្សសង្គ្រោះជាតិ ក៏ត្រូវបានព្រះរាជអាជ្ញា ចេញដីកាកោះ ឲ្យចូលបំភ្លឺក្នុងនាមជាសាក្សីផងដែរ នៅថ្ងៃទី២៨ ខែមេសា ឆ្នាំ២០១៧។ តំណាងរាស្ត្រទាំង២រូបនេះ បានអនុញ្ញតឲ្យលោក ជុន ច័ន្ទបុត្រ ចូលទៅជួបមន្ត្រី និងសកម្មជនគណបក្សសង្គ្រោះជាតិ ក្នុងពន្ធនាគារព្រៃកាលពីថ្ងៃទី១៩ ខែមេសា កន្លងទៅ៕