ក្រៅពីវៀតណាម និងហ្វីលីពីន លោក ត្រាំ ក៏អញ្ជើញមេដឹកនាំថៃ និងសិង្ហបុរី ទៅលេងសេតវិមានដែរ

អន្តរជាតិ

ក្រៅពីវៀតណាម និងហ្វីលីពីន លោក ត្រាំ ក៏អញ្ជើញមេដឹកនាំថៃ និងសិង្ហបុរី ទៅលេងសេតវិមានដែរ

01, May 2017 , 9:19 pm

រូបភាព

ដោយ: តន ចាន់រិទ្ធារ៉ា

ថ្មីៗនេះ អាមេរិក បានស្វះស្វែងរកការគាំទ្រពីសម្ព័ន្ធមិត្តក្នុងតំបន់អាស៊ី ដើម្បីជួយដោះស្រាយវិបត្តិកូរ៉េខាងជើង។ ប្រធានាធិបតី ដូណាល់ ត្រាំ បានជជែកទូរសព្ទជាមួយមេដឹកនាំធំៗនៅអាស៊ីជាញឹកញាប់មានប្រធានាធិបតីចិន ស៊ី ជីនភីង និងនាយករដ្ឋមន្ត្រីជប៉ុន ស៊ីនហ្សូ អាបេ ជាដើម។ ចុងក្រោយនេះ លោក ត្រាំ ក៏បានជជែកតាមទូរសព្ទជាមួយសម្ព័ន្ធមិត្តនៅអាស៊ីអាគ្នេយ៍ ហើយក៏ឆ្លៀតអញ្ជើញពួកគេទស្សនកិច្ចនៅអាមេរិកដែរ។

នៅចុងសប្ដាហ៍មុននេះ ប្រធានាធិបតីអាមេរិក ដូណាល់ ត្រាំ បាននិយាយទូរសព្ទជាមួយមេដឹកនាំអាស៊ានជាបន្តបន្ទាប់ ហើយបើតាមមន្ត្រីអាមេរិក ប្រធានបទសំខាន់នៃការសន្ទនានេះ គឺទំនាក់ទំនងទ្វេភាគី និងបញ្ហានុយក្លេអ៊ែរកូរ៉េខាងជើងតែម្ដង។ នៅយប់ថ្ងៃទី២៩ ខែមេសា លោក ត្រាំ បាននិយាយទូរសព្ទជាមួយប្រធានាធិបតីហ្វីលីពីន Rodrigo Duterte ហើយនៅថ្ងៃទី៣០ លោកក៏ជួបជជែកជាមួយនាយករដ្ឋមន្ត្រីសិង្ហបុរី និងថៃជាបន្តបន្ទាប់។

សេចក្ដីប្រកាសរបស់សេតវិមានបញ្ជាក់ថា លោក ត្រាំ បាននិយាយទូរសព្ទជាមួយ លោក លី សៀនឡុង និងលោក ប្រាយុទ្ធ ចន្ទអូចា ដើម្បីពិភាក្សារកផ្លូវដាក់សម្ពាធបន្ថែមទៀតលើកូរ៉េខាងជើង ទាំងទណ្ឌកម្មសេដ្ឋកិច្ច និងតាមផ្លូវការទូត។ នេះ ក៏ព្រោះតែទង្វើរបស់កូរ៉េខាងជើងនាពេលកន្លងមក ក្លាយជាការគំរាមកំហែងធំបំផុតសម្រាប់ស្ថិរភាព និងសន្តិភាពក្នុងតំបន់ ក៏ដូចជាពិភពលោកទាំងមូលផងដែរ។

មន្ត្រីសេតវិមានបានប្រាប់សារព័ត៌មាន The New York Times ថា ការជជែកតាមទូរសព្ទនេះ ត្រូវបានរៀបចំ ខណៈប្រធានាធិបតី ត្រាំ ទំនងចង់ស្វែងរកកិច្ចសហប្រតិបត្តិការអន្តរជាតិមួយដើម្បីប្រឆាំងកូរ៉េខាងជើង ព្រោះអាមេរិកមិនចង់ធ្វើសកម្មភាពដោយឯកតោភាគីពេកដែរ។ នៅមុននេះ អាមេរិក ផ្ដោតខ្លាំងលើចិន ជប៉ុន ដែលជាប្រទេសធំៗក្នុងការទប់ទល់កូរ៉េខាងជើង តែពេលនេះ អាមេរិកក៏ងាកមកកាន់តំបន់អាស៊ានទៀត សំដៅប្រមូលការគាំទ្រឲ្យច្រើនក្នុងការដាក់សម្ពាធលើកូរ៉េខាងជើង។

ចំណែកឯប្រធានផ្នែកបុគ្គលិកសេតវិមាន Reince Priebus ក៏និយាយដែរថា អាមេរិកត្រូវការការសហការនៅកម្រិតណាមួយពីសំណាក់ប្រទេសក្នុងតំបន់ ព្រោះបើមានហេតុការណ៍កើតឡើងនៅកូរ៉េខាងជើង វិធានការឆ្លើយតបរួមគ្នានឹងមានស្រាប់រួចជាស្រេច។ លោក Priebus បន្តថាទៀតថា ប្រទេសទាំងអស់ ក៏ត្រូវមានជំហរដូចគ្នាដែរ ដើម្បីងាយស្រួលទប់ទល់ការគំរាមកំហែងធ្ងន់ធ្ងរមកលើតំបន់ និងអាមេរិកផង។

ងាកមករឿងសន្ទនាតាមទូរសព្ទវិញ មេដឹកនាំអាមេរិក ថៃ និងសិង្ហបុរី សុទ្ធតែបង្ហាញជំហរស្របគ្នាលើការពង្រឹងទំនាក់ទំនងទ្វេភាគី។ ទំនាក់ទំនងរវាងអាមេរិក និងសិង្ហបុរី ស្ថិតលើផ្លូវប្រសើរក្នុងនាមជាសម្ព័ន្ធមិត្តដ៏ល្អ ប៉ុន្តែទំនាក់ទំនងអាមេរិក និងថៃ ធ្លាក់ចុះខ្លាំង ក្រោយរដ្ឋប្រហារយោធាឆ្នាំ២០១៤ ។ យ៉ាងណាក្ដី ប្រធានាធិបតី ត្រាំ ក៏បានអញ្ជើញទាំងនាយករដ្ឋមន្ត្រី លី និងនាយករដ្ឋមន្ត្រី ប្រាយុទ្ធ ទៅទស្សនកិច្ចនៅអាមេរិកដើម្បីរឹតចំណងមិត្តភាពឲ្យកាន់តែល្អូកល្អឺន៕