កូរ៉េខាងត្បូងថា បើអាមេរិកចង់ចរចារឿងបង់ថ្លៃខែលការពារមីស៊ីល ក៏ត្រូវចរចារឿងវត្តមានទ័ពអាមេរិកនៅកូរ៉េដែរ

អន្តរជាតិ

កូរ៉េខាងត្បូងថា បើអាមេរិកចង់ចរចារឿងបង់ថ្លៃខែលការពារមីស៊ីល ក៏ត្រូវចរចារឿងវត្តមានទ័ពអាមេរិកនៅកូរ៉េដែរ

01, May 2017 , 9:59 pm

រូបភាព

ប្រព័ន្ធការពារមីស៊ីល THAAD ដែលត្រូវបានដំឡើងនៅកូរ៉េខាងត្បូង (រូបភាព Reuters)

ដោយ: តន ចាន់រិទ្ធារ៉ា

កូរ៉េខាងត្បូង បានទាត់ចោលការចរចាណាមួយជុំវិញការបង់ប្រាក់សម្រាប់ប្រព័ន្ធការពារមីស៊ីល THAAD ដែលផ្នែកសំខាន់មួយចំនួននៃប្រព័ន្ធការពារនេះ ត្រូវបានដំឡើងរួចហើយ ដើម្បីត្រៀមទប់ទល់មីស៊ីលកូរ៉េខាងជើង។ ការទាត់ចោលនេះ ធ្វើឡើងក្រោយប្រធានាធិបតីអាមេរិក ដូណាល់ ត្រាំ បានទាមទារឲ្យកូរ៉េខាងត្បូងចេញថ្លៃប្រព័ន្ធការពារនេះ ដែលមានតម្លៃ ១ពាន់លានដុល្លារឯណោះ។ ម្យ៉ាងកូរ៉េខាងត្បូង ក៏ប្រកាសហើយថា ខ្លួនមិនបង់ប្រាក់តាមការទាមទារឡើយ។

ខណៈដែលប្រព័ន្ធការពារ THAAD ត្រូវបានដំឡើងរួចស្រេចនៅកូរ៉េខាងត្បូង ប្រធានាធិបតី ដូណាល់ ត្រាំ ស្រាប់តែចេញមុខទាមទារឲ្យសម្ព័ន្ធមិត្តរបស់ខ្លួនបង់ប្រាក់ថ្លៃចំណាយលើប្រព័ន្ធការពារនេះទៅវិញ។ ភ្លាមៗនោះ កូរ៉េខាងត្បូង ក៏ចេញមកបដិសេធសំណើរបស់ប្រធានាធិបតីអាមេរិក ដោយបានលើកឡើងពីកិច្ចព្រមព្រៀងរួមគ្នាដែលតម្រូវឲ្យអាមេរិកជាទទួលខុសត្រូវលើការចំណាយថ្លៃអាវុធទាំងអស់លើទឹកដីកូរ៉េខាងត្បូង។

មិនតែប៉ុណ្ណោះ កូរ៉េខាងត្បូង ក៏មិនចង់ចរចាអ្វីទៀតដែរលើបញ្ហាលុយនេះ។ អ្នកនាំពាក្យក្រសួងការពារជាតិកូរ៉េខាងត្បូងនិយាយថា កិច្ចព្រមព្រៀងទ្វេភាគីស្ដីពីការពង្រាយប្រព័ន្ធការពារមីស៊ីល ចូលជាធរមានទៅហើយ ឯកិច្ចព្រមព្រៀងស្ដីពីវត្តមានកងទ័ពអាមេរិកនៅកូរ៉េខាងត្បូង ក៏មាននិយាយពីរឿងនេះដែរ។ បើតាមកិច្ចព្រមព្រៀងនេះ កងទ័ពអាមេរិកនៅកូរ៉េខាងត្បូង ជាអ្នកទទួលបន្ទុកលើចំណាយលើអាវុធរបស់ខ្លួន ចំណែកកូរ៉េខាងត្បូងមានភារៈផ្ដល់ទីតាំង និងការសម្របសម្រួលមួយចំនួន។

យ៉ាងណាក្ដី បើទោះជាមានកិច្ចព្រមព្រៀងទៅហើយ បញ្ហាថាអ្នកណាជាអ្នកទទួលបន្ទុកថ្លៃចំណាយប្រព័ន្ធការពារ THAAD នៅតែមិនច្បាស់លាស់ដដែល ដ្បិតលោក ត្រាំ នៅតែទាមទារឲ្យកូរ៉េខាងត្បូងទទួលខុសត្រូវលើថ្លៃចំណាយដែលមានដល់ទៅ ១ពាន់លានដុល្លារ។ លើសពីនេះ រដ្ឋបាលអាមេរិក ទំនងចង់សើរើឡើងវិញកិច្ចព្រមព្រៀងស្ដីពីការពង្រាយ THAAD នេះដែលសម្រេចបានទាំងចម្រូងចម្រាស់កាលពីឆ្នាំ២០១៦ ។

ទីប្រឹក្សាសន្តិសុខជាតិអាមេរិក H. R. McMaster បានប្រាប់ទូរទស្សន៍ Fox News ថា រដ្ឋាភិបាលអាមេរិក នឹងគោរពកិច្ចព្រមព្រៀងដែលមានជាធរមាន រហូតដល់មានការចរចាឡើងវិញ ព្រោះលោក ត្រាំ ចង់ឲ្យមានការបែងចែកអម្រែកហិរញ្ញវត្ថុស្មើគ្នា។ ប៉ុន្តែខាងកូរ៉េខាងត្បូងឆ្លើយវិញថា បើចង់សើរើកិច្ចព្រមព្រៀងឆ្នាំ២០១៦ ក៏ត្រូវតែសើរើកិច្ចព្រមព្រៀងស្ដីពីវត្តមានទ័ពអាមេរិកនៅកូរ៉េខាងត្បូងដូចគ្នាដែរ។

បើតាមទីភ្នាក់ងារព័ត៌មាន Yonhap សម្ព័ន្ធមិត្តទាំង២នេះ ក៏មានផែនការចាប់ផ្ដើមការចរចាដោយឡែកមួយទៀតនៅឆ្នាំក្រោយ ជុំវិញថ្លៃចំណាយលើវត្តមានទាហានអាមេរិកនៅកូរ៉េខាងត្បូងជិត៣ម៉ឺននាក់។ បើតាមកិច្ចព្រមព្រៀងរបស់ប្រទេសទាំង២ ដែលផុតនៅឆ្នាំ២០១៨ កូរ៉េខាងត្បូងត្រូវចំណាយដល់ទៅ៨០៧លានដុល្លារក្នុងមួយឆ្នាំសម្រាប់កងទ័ពអាមេរិក ហើយបើអាមេរិកនៅតែទាមទារឲ្យកូរ៉េខាងត្បូងបង់ប្រាក់ថ្លៃ THAAD ទៀតនោះ សម្ព័ន្ធភាពនេះទំនងជាមានបញ្ហាមិនខាន៕