អន្តរជាតិ
ឆ្មា និងឆ្កែ ដែលចាស់ជាងគេនៅក្រុងកេប៊ិច ទទួលបានពានរង្វាន់
× សមាគមពេទ្យសត្វក្រុងកេប៊ិច (AMVQ) ប្រទេសកាណាដា កាលពីពេលថ្មីៗកន្លងមកនេះ បានរៀបចំពិធីប្រគល់រង្វាន់ដល់សត្វឆ្មា និងឆ្កែ ដែលមានអាយុវែងជាងគេបំផុត។ តាមការផ្សាយរបស់ La Presse Canadienne ម្ចាស់ពានរង្វាន់គឺឆ្មាឈ្មោះ Hortense អាយុ២១ឆ្នាំ និងឆ្កែឈ្មោះ Cachou អាយុ១៧ឆ្នាំ។
Hortense ជាឆ្មាពូជ Scottish Fold ដែលរស់នៅជាមួយម្ចាស់ក្នុងតំបន់ Piedmont។ វាត្រូវបានសមាគម AMVQ រកឃើញថា ជាឆ្មាដែលចាស់ជាងគេនៅកេប៊ិច ដោយឈានរហូតដល់២១ឆ្នាំ។ រីឯ Cachou អាយុ១៧ឆ្នាំ ជាឆ្កែពូជ Yorkshire Terrier ដែលរស់នៅតំបន់ Saint Felix de Valois។
អ្នកស្រី Valerie Trudel ប្រធានសមាគម AMVQ បានបញ្ជាក់ថា សត្វដែលឈ្នះរង្វាន់ទាំងពីរ ក៏មិនប្រាកដថា ពួកវាមានវ័យចំណាស់ជាងគេនៅទីក្រុងកេប៊ិច នោះឡើយ ប៉ុន្តែដោយសារតែពួកគេមានការចិញ្ចឹមបីបាច់ និងការអះអាងពីអាយុបានត្រឹមត្រូវពិតប្រាកដ។
អ្នកស្រី បានលើកឡើងថា៖ «ពិតណាស់ អាចមានឆ្កែ ឬឆ្មា ដែលមានអាយុច្រើនជាងនេះ ប៉ុន្តែយើងមិនឃើញមានការបញ្ជាក់ឲ្យបានត្រឹមត្រូវនោះឡើយ»។ ប្រធានសមាគមពេទ្យសត្វរូបនេះ បានវាយតម្លៃផងដែរថា បើ Hortense ជាមនុស្ស វាអាចមានអាយុរហូតដល់ទៅ១២០ឆ្នាំ រីឯ Cachou អាចឡើងដល់ក្នុងរង្វង់១០០ឆ្នាំផងដែរ។
អ្នកស្រី Suzuanne Janlin ដែលជាម្ចាស់ឆ្មា បានបញ្ជាក់ថា Hortense ជាសត្វដែលពិការភ្នែក ប៉ុន្តែវាមានសុខភាពរឹងមាំ ដោយលោតចុះឡើងលើគ្រែ។ ជាពិសេសឆ្មាមួយក្បាលនេះ ទទួលបានការថែទាំយ៉ាងត្រឹមត្រូវ។ ជាមួយគ្នានេះ អ្នកស្រី Josee Bibeau ដែលជាម្ចាស់របស់ Cachou បានលើកឡើងថា វាជាអនុស្សាវរីយ៍ដ៏អស្ចារ្យមួយ ដែលអ្នកស្រីបាននាំឆ្កែជាទីស្រឡាញ់របស់ខ្លួនឡើងទទួលពានរង្វាន់។
ក្រោយការទទួលបានរង្វាន់ជាសត្វឆ្មា និងឆ្កែ ដែលមានវ័យចំណាស់ជាងគេនៅកេប៊ិច Hortense និង Cachou ក៏ត្រូវបាននាំទៅកាន់ទីក្រុងម៉ុងរ៉េអាល់ ដើម្បីចូលរួមក្នុងសន្និបាតពេទ្យសត្វប្រចាំឆ្នាំលើកទី២៨ ដែលរៀបចំនៅមជ្ឈមណ្ឌលសន្និបាតក្រុងម៉ុងរ៉េអាល់ Palais des congres ផងដែរ៕
Tag:
សមាគមពេទ្យសត្វ
ឆ្កែ
ឆ្មា
© រក្សាសិទ្ធិដោយ thmeythmey.com