អន្តរជាតិ
ចិន គាំទ្រសង្គ្រាមគ្រឿងញៀនហ្វីលីពីន ខណៈពេលប្រទេសផ្សេងរិះគន់កប់មាត់ តំណាងរបស់ចិននិយាយគាំទ្រហ្វីលីពីនក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ (រូបភាព Rappler)
× ក្នុងកិច្ចប្រជុំត្រួតពិនិត្យរបាយការណ៍សិទ្ធិមនុស្សសកលនៅស្នាក់ការអង្គការសហប្រជាជាតិក្នុងទីក្រុងហ្សឺណែវ ចិន បានចេញមុខសរសើរហ្វីលីពីនជុំវិញការការពារ និងការលើកកម្ពស់សិទ្ធិមនុស្ស ខណៈសមាជិកផ្សេងទៀតបានរិះគន់ធ្ងន់ៗលើការសម្លាប់មនុស្សក្រៅប្រព័ន្ធតុលាការក្នុងយុទ្ធនាការបង្ក្រាបគ្រឿងញៀន។ ក្រៅពីការលើកសរសើរ ចិន ក៏ប្រាប់ឲ្យសហគមន៍អន្តរជាតិគោរពអធិបតេយ្យហ្វីលីពីនផងដែរ។
សង្គ្រាមបោសសម្អាតគ្រឿងញៀននៅហ្វីលីពីនក្រោមការដឹកនាំរបស់ប្រធានាធិបតី រ៉ូឌ្រីហ្គោ ឌូទើតេ (Rodrigo Duterte) នៅតែប្រធានក្ដៅដដែល។ នៅថ្ងៃទី៨ ខែឧសភា តំណាងរដ្ឋាភិបាលហ្វីលីពីន បានការពាររបាយការណ៍សិទ្ធិមនុស្សរបស់ខ្លួនចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិក្នុងទីក្រុងហ្សឺណែវ។ ការការពាររបាយការណ៍ដែលតែងធ្វើឡើងរៀងរាល់៤ឆ្នាំម្ដង ធ្វើឡើងក្រោមការរិះគន់យ៉ាងខ្លាំងដោយសារការសម្លាប់មនុស្សរាប់ពាន់នាក់ក្នុងយុទ្ធនាការសម្អាតគ្រឿងញៀននេះ។
ខណៈដែលប្រទេសចំនួន៤៥ បង្ហាញការព្រួយបារម្ភជុំវិញការសម្លាប់មនុស្សនេះ តំណាងរបស់ចិនបែរជាចេញមកអបអរហ្វីលីពីនលើការប្រឹងប្រែងដោយឥតឈប់ឈរក្នុងការលើកកម្ពស់សិទ្ធិមនុស្សទៅវិញ។ បន្ថែមពីលើនោះ ចិន ដែលកំពុងជិតស្និទ្ធខ្លាំងជាមួយហ្វីលីពីន ក៏គាំទ្រយុទ្ធនាការបោសសម្អាតគ្រឿងញៀនរបស់ប្រធានាធិបតី ឌូទើតេ បើទោះជារដ្ឋាភិបាលហ្វីលីពីនធ្លាប់ប្រកាសថា មានជនជាតិចិនជាប់ពាក់ព័ន្ធក្នុងរឿងគ្រឿងញៀនក្ដី។
ក្នុងកិច្ចប្រជុំ សមាជិកក្រុមប្រឹក្សាសិទ្ធិមនុស្ស បានផ្ដល់យោបល់រៀងៗខ្លួនជាបន្តបន្ទាប់លើសំណុំរឿងសិទ្ធិមនុស្សរបស់ហ្វីលីពីន ហើយភាគច្រើនសុទ្ធតែព្រួយបារម្ភលើការស្លាប់របស់មនុស្សរាប់ពាន់នាក់។ សារព័ត៌មាន Rappler ផ្សាយថា ពេលដល់វេនរបស់ខ្លួន ចិន បែរជាបានបង្ហាញជំហរខុសពីសមាជិកដទៃទៀត ដោយបានលើកសរសើរហ្វីលីពីន និងបានស្នើឲ្យប្រទេសផ្សេងគោរពអធិបតេយ្យ និងបន្តគាំទ្រហ្វីលីពីនក្នុងសង្គ្រាមគ្រឿងញៀននេះ។
ដោយឡែកតំណាងហ្វីលីពីនវិញ បានប្រាប់សមាជិកក្រុមប្រឹក្សាសិទ្ធិមនុស្សថា នៅហ្វីលីពីនគ្មានការសម្លាប់ថ្មីៗទៀតកើតឡើងឡើយ។ សមាជិកព្រឹទ្ធសភា Alan Peter Cayetano សហប្រធានប្រតិភូហ្វីលីពីន និងជាសម្ព័ន្ធមិត្តលោក ឌូទើតេ ក៏បានរិះគន់ចំៗលើប្រព័ន្ធផ្សព្វផ្សាយលោកខាងលិច ដែលរាយការណ៍ព័ត៌មានមិនត្រឹមត្រូវ ព្រោះយកព័ត៌មានក្លែងក្លាយពីក្រុមប្រឆាំងប្រធានាធិបតី ឌូទើតេ ទៅវិញ។
អាចនិយាយបានថា នេះជាមិនមែនជាគួរឲ្យភ្ញាក់ផ្អើល ព្រោះអីទំនាក់ទំនងចិននិងហ្វីលីពីន កំពុងស្អិតល្មួតខ្លាំងនាពេលចប្ចុប្បន្ន។ ការនិយាយលើកសរសើរហ្វីលីពីនពេលនេះ អាចជាយុទ្ធសាស្ត្ររបស់ចិន ដើម្បីកុំឲ្យហ្វីលីពីនលើកបញ្ហាសមុទ្រចិនខាងត្បូងមកនិយាយ ហើយផ្ដោតតែទំនាក់ទំនងសេដ្ឋកិច្ចវិញ។ ទំនាក់ទំនងនេះ កាន់តែល្អប្រសើរក្នុងសម័យដឹកនាំរបស់លោក ឌូទើតេ ដែលព្យាយាមស្ដារទំនាក់ទំនងជាមួយចិន ហើយសុខចិត្តទុករឿងជម្លោះសមុទ្រចិនខាងត្បូងដោយឡែក៕
Tag:
ចិន
ហ្វីលីពីន
សិទ្ធិមនុស្ស
© រក្សាសិទ្ធិដោយ thmeythmey.com