អន្តរជាតិ
ស្ថាប័ន FBI រង្គោះរង្គើ ដោយសារ ត្រាំ បណ្តេញ Comey ពីតំណែង
× នាយកការិយាល័យស៊ើបអង្កេតសហព័ន្ធ (FBI) លោក James Comey ត្រូវបានប្រធានាធិបតី ដូណាល់ ត្រាំ បណ្ដេញចេញពីតំណែង ដែលជារឿងគួរឲ្យភ្ញាក់ផ្អើលបំផុត។ មិនមានមូលហេតុច្បាស់លាស់នេះការបញ្ចប់តំណែងលោក Comey ត្រូវបានបញ្ចេញឡើយ ប៉ុន្តែអាចទាក់ទងនឹងការស៊ើបអង្កេតការលូកលាន់កិច្ចការបោះឆ្នោតពីសំណាក់រុស្ស៊ី។ គេក៏មិនទាន់ដឹងថាលោក ត្រាំ ជ្រើសរើសនរណាជានាយក FBI ថ្មីដែរ។
ការិយាល័យស៊ើបអង្កេតសហព័ន្ធ (FBI) កំពុងស្ថិតក្នុងស្ថានភាពរង្គោះរង្គើខ្លាំង ដោយសារការបញ្ចប់តំណែងលោក James Comey ជានាយកការិយាល័យនេះ។ បុគ្គលិក FBI ពិតជាភ្ញាក់ផ្អើលខ្លាំងដោយសាររឿងនេះ ដ្បិតលោក ដូណាល់ ត្រាំ សម្រេចចិត្តបណ្ដេញលោក Comey ដោយភ្លាមៗពេក។ ចំណែកឯក្រុមប្រជាធិបតេយ្យ ក៏បានរិះគន់ខ្លាំងៗលើការសម្រេចចិត្តនេះដែរ។
បើទោះជាក្នុងលិខិតបញ្ចប់តំណែងបានលើកឡើងថានេះជាការស្ដារទំនុកចិត្តប្រជាជនឡើងវិញក្ដី មូលហេតុសំខាន់នៃការបណ្ដេញចេញនេះ ទំនងជាមានជាប់ពាក់ព័ន្ធនឹងការស៊ើបអង្កេតជុំវិញការលូកដៃមកចូលការបោះឆ្នោតពីសំណាក់រុស្ស៊ី។ លោក Comey ដែលត្រូវបានតែងតាំងដោយលោក បារ៉ាក់ អូបាម៉ា គឺកំពុងដឹកនាំការស៊ើបអង្កេតយុទ្ធនាការរបស់លោក ត្រាំ ថាមានជាប់ទាក់ទងជាមួយរុស្ស៊ីក្នុងការបោះឆ្នោតឆ្នាំ២០១៦ ឬយ៉ាងណា។
ក្រុមប្រជាធិបតេយ្យបានហៅការបញ្ចប់តំណែងនេះ ជាការបិទបាំងការស៊ើបអង្កេតការរៀបចំលទ្ធផលបោះឆ្នោតដែលដឹកនាំដោយលោក Comey ផ្ទាល់។ បើតាមទីភ្នាក់ងារព័ត៌មាន Reuters អ្វីដែលគួរឲ្យកត់សម្គាល់នោះ លោក ត្រាំ បានសម្រេចចិត្តបែបនេះ ដោយមិនផ្ដល់ដំណឹងមុនឡើយ សូម្បីតែលោក Comey ក៏ភ្ញាក់ផ្អើលផងដែរ។ មន្ត្រី FBI ត្រូវបានកោះប្រជុំបន្ទាន់ភ្លាមៗក្រោយចេញដំណឹងបញ្ចប់តំណែងនេះ និងកំពុងរង់ចាំមេដឹកនាំថ្មី។
តាមពិតទៅ អាណត្តិលោក Comey នៅសល់ជាង ៦ឆ្នាំទៀតឯណោះ។ លោក គឺជាមន្ត្រីអនុវត្តច្បាប់ទី៣ ដែលត្រូវលោក ត្រាំ បណ្ដេញចេញ ចាប់តាំងពីលោកចូលកាន់តំណែងនៅថ្ងៃទី២០ ខែមករា។ មន្ត្រី២ នាក់ទៀតដែលត្រូវបណ្ដេញចេញដែរនោះ គឺលោក Preet Bharara រដ្ឋអាជ្ញាតំបន់នៅសង្កាត់ខាងត្បូងនៃទីក្រុង New York និងលោកស្រី Sally Yates អតីតរដ្ឋមន្ត្រីស្ដីទីក្រសួងយុត្តិធម៌។
ក្នុងលិខិតបញ្ចប់តំណែង លោក ត្រាំ និយាយថា លោកសម្រេចចិត្តបែបនេះបន្ទាប់ពីទទួលការផ្ដល់យោបល់ពីរដ្ឋមន្ត្រីយុត្តិធម៌ Jeff Sessions និងអនុរដ្ឋមន្ត្រី Rod Rosenstein។ ប៉ុន្តែលោកមិនទាន់សម្រេចចិត្តរកអ្នកជំនួសតំណែងលោក Comey នៅឡើយ។ យ៉ាងណាក្ដី បេក្ខជនណាក៏ដោយ ដែលត្រូវបានលោក ត្រាំ ជ្រើសរើស នឹងត្រូវរង់ចាំការសម្រេចចិត្តពីសំណាក់ព្រឹទ្ធសភាសិន មុនចូលកាន់តំណែង ដែលគេរំពឹងថា ក្រុមប្រជាធិបតេយ្យ នឹងបង្កព្យុះភ្លៀងមិនខានឡើយ៕
Tag:
អាមេរិក
FBI
James Comey
© រក្សាសិទ្ធិដោយ thmeythmey.com