អន្តរជាតិ
ឧទ្ទាមឃើដ នៅតែជារបាំងឧបសគ្គនៃទំនាក់ទំនងអាមេរិកនិងតួកគី
× ប្រធានាធិបតីអាមេរិក ដូណាល់ ត្រាំ បានទទួលជួបជាមួយប្រធានាធិបតីតួកគី រ៉េស៊ីប តៃយីប អ៊ែរដូហ្កាន់ (Recep Tayyip Erdogan) ដើម្បីពង្រឹងទំនាក់ទំនងទ្វេភាគីឡើងវិញ ក្រោយរកាំររកូសមួយដោយសាររដ្ឋប្រហារនៅតួកគី និងការផ្ដល់ជំនួយរបស់អាមេរិកដល់ក្រុមឧទ្ទាម ឃើដ នៅស៊ីរី។ លោក ត្រាំ និងលោក អ៊ែរដូហ្កាន់ ប្រឹងញញឹមដាក់គ្នា ជាសញ្ញានៃការវិលត្រឡប់រកប្រក្រតីឡើងវិញក្នុងទំនាក់ទំនងសមាជិកណាតូទាំងពីរ ទោះជាមានបញ្ហាច្រើននៅមិនទាន់ដោះស្រាយដាច់ស្រេចក្ដី។
មេដឹកនាំអាមេរិក និងតួកគី បានសរសើរគ្នាទៅវិញទៅមក ក្រោយជំនួបទ្វេភាគីនៅឯសេតវិមាននៅថ្ងៃទី១៦ ខែឧសភា ដែលឡោមព័ទ្ធដោយបញ្ហាមិនចុះសម្រុងជាច្រើន។ ប្រធានាធិបតី ដូណាល់ ត្រាំ និងប្រធានាធិបតីតួកគី តៃយីប អ៊ែរដូហ្កាន់ បានប្ដេជ្ញាពង្រឹងទំនាក់ទំនងទ្វេភាគីឲ្យកាន់ស៊ីជម្រៅ ខណៈលោក ត្រាំ ធានាជួយការពារសន្តិសុខរបស់តួកគីក្នុងនាមជាសមាជិកណាតូ ក៏ដូចជាការសហការគ្នាប្រឆាំងភេរវកម្មដែរ។
យ៉ាងណាមិញ ក្នុងជំនួបលើកដំបូងនៅសេតវិមានជាមួយសមភាគីតួកគី លោក ត្រាំ មិនបាននិយាយអ្វីសោះទាក់ទងការបង្ក្រាបចលនារដ្ឋប្រហារនៅតួកគី តែលោកបានចាត់ទុកប្រធានាធិបតីតួកគី អ៊ែរដូហ្កាន់ ជាសម្ព័ន្ធមិត្តសំខាន់ក្នុងការប្រយុទ្ធប្រឆាំងភេរវកម្ម។ ប៉ុន្តែលោក អ៊ែរដូហ្កាន់ បែរជាលើកឡើងត្រង់ៗប្រាប់លោក ត្រាំ ពីការជំទាស់របស់តួកគី ជុំវិញការបំពាក់អាវុធឲ្យក្រុមឃើដស៊ីរី YPG ដែលតួកគីចាត់ទុកជាក្រុមភេរវកម្ម។
បើតាមសារព័ត៌មាន ABC News លោក អ៊ែរដូហ្កាន់ បានលើកឡើងថា តួកគីមិនទទួលយកក្រុមឃើដជាដៃគូនៅក្នុងតំបន់ឡើយ ព្រោះវាមិនស្របនឹងអ្វីដែលបានឯកភាពគ្នាឡើយ។ លោកបន្តថា តួកគី ប្ដេជ្ញាចិត្តរួចហើយក្នុងកម្ទេចរាល់ក្រុមភេរវកម្មទាំងអស់ មិនថាក្រុមដែស្ហ ឬរដ្ឋឥស្លាម, ក្រុមឃើដស៊ីរី YPG ឬក្រុមឃើដតួកគី PKK ឡើយ។
ដោយមិនចាំបាច់រាប់បញ្ចូលក្រុមរដ្ឋឥស្លាម តួកគី និងអាមេរិក សុទ្ធតែយល់ព្រមគ្នារួចហើយដោយចាត់ទុកក្រុមឧទ្ទាមឃើដតួកគី PKK ជាក្រុមភេរវកម្ម។ ប៉ុន្តែក្រុងអង់ការ៉ា និងក្រុងវ៉ាស៊ីនតោន នៅតែខ្វែងគំនិតគ្នាលើតួនាទីរបស់ក្រុមឃើដស៊ីរី។ ក្រុមឧទ្ទាមឃើដស៊ីរី ដែលជាកម្លាំងប្រយុទ្ធនៃកងកម្លាំងប្រជាធិបតេយ្យស៊ីរី បានដើរតួសំខាន់ក្នុងការប្រយុទ្ធប្រឆាំងក្រុមរដ្ឋឥស្លាម ហើយត្រូវបានគាំទ្រដោយអាមេរិក និងសម្ព័ន្ធមិត្តលោកខាងលិច។
ចុងក្រោយនេះ រដ្ឋបាលប្រធានាធិបតី ត្រាំ បានសម្រេចផ្គត់ផ្គង់អាវុធឲ្យក្រុមឃើដស៊ីរី ដើម្បីត្រៀមរំដោះទីក្រុង Raqqa ដែលកំពុងគ្រប់គ្រងដោយក្រុមរដ្ឋឥស្លាម។ រឿងនេះហើយដែលធ្វើឲ្យតួកគីមិនសប្បាយចិត្ត ព្រោះខ្លាចក្រែងក្រុមឧទ្ទាមមួយនេះមានសមត្ថភាពកាន់តែខ្លាំង ហើយអាចវាយដណ្ដើមត្រួតត្រាទឹកដី បង្កើតជារដ្ឋឯករាជ្យជាមួយក្រុមឧទ្ទាមឃើដតួកគី ដែលកំពុងអុកឡុកតួកគីស្រាប់។ យ៉ាងណាក្ដី គេមិនឃើញសញ្ញាបង្ហាញថាអាមេរិកបោះបង់ពួក YPG ឡើយ៕
Tag:
អាមេរិក
តួកគី
ឃើដ
ភេរវកម្ម
© រក្សាសិទ្ធិដោយ thmeythmey.com