ជាតិ
សាលារាជធានី ដាក់សេវាជិះកង់ balance wheel សម្រាប់ភ្ញៀវទេសចរកម្សាន្តជុំវិញវត្តភ្នំ
× ភ្នំពេញ៖ សាលារាជធានីភ្នំពេញ បានដាក់សេវាជិះឧបករណ៍ទំនើបថ្មី ដែលមានឈ្មោះថា Balance Wheel សម្រាប់ភ្ញៀវទេសចរជិះកម្សាន្ត នៅតំបន់រមណីយដ្ឋានវត្តភ្នំ។ ឧបករណ៍ Balance Wheel ដែលបម្រើសេវាកម្មជិះកម្សាន្តនេះ ត្រូវបានសាលារាជធានី រៀបចំដាក់សាកល្បងចំនួន១០គ្រឿង។ ហើយឧបករណ៍ Balance Wheel ប្រើដោយកម្លាំងអគ្គិសនី។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានឲ្យដឹងថា ការដាក់ឧបករណ៍ជិះកម្សាន្ត Balance Wheel នេះ ក្រោមហេតុផលទី១ គឺជួយសម្រួលដល់កងកម្លាំងសន្តិសុខ សម្រាប់ជិះត្រួតពិនិត្យសណ្ដាប់ធ្នាប់ អនាម័យនៅតំបន់វត្តភ្នំ។ រីឯហេតុផលទី២នោះ សម្រាប់ភ្ញៀវទេសចរជាតិ និងអន្តរជាតិ ជិះកម្សាន្តនៅរមណីយដ្ឋានប្រវត្តិសាស្ត្រនេះ។
ថ្លែងប្រាប់សារព័ត៌មានថ្មីៗ លោក មាសភក្តី បានបញ្ជាក់ថា៖«ភ្ញៀវទេសចរជាតិ និងអន្តរជាតិ អាចប្រើប្រាស់សេវាជិះកង់នេះ ដោយពួកគេត្រូវថវិកា២ម៉ឺនរៀល ក្នុងការជិះកម្សាន្តរយៈពេលមួយម៉ោង និងតម្លៃ១ម៉ឺនរៀល សម្រាប់រយៈពេលកន្លះម៉ោង។ ហើយថវិកាដែលយើងប្រមូលបានពីសេវាជិះឧបករណ៍ Balance Wheel យើងនឹងដាក់បញ្ជូលជាថវិការដ្ឋទាំងអស់ ប្រៀបដូចយើងលក់សំបុត្រដើម្បីយកថវិកាចូលរដ្ឋអ៊ីចឹងដែរ»។
លោក មាសភក្តី រំពឹងថា ឧបករណ៍ balance wheel នេះ នឹងក្លាយជាចំណែកមួយ ក្នុងការទាក់ទាញភ្ញៀវទេសចរ មកកម្សាន្តនៅរមណីយដ្ឋានវត្តភ្នំឲ្យកាន់តែច្រើនឡើងថែមទៀត ខណៈដែលតំបន់នេះ ត្រូវបានរដ្ឋាភិបាលរៀបចំជាទីកន្លែងដ៏ស្រស់បំព្រង ស្របតាមអត្ថន័យទីតាំងប្រវត្តិសាស្ត្រខ្មែរ៕
Tag:
សាលារាជធានី
កង់
វត្តភ្នំ
© រក្សាសិទ្ធិដោយ thmeythmey.com