ជាតិ
ពលរដ្ឋនៅប៊ូឌីញ ៨៣ភាគរយហើយ បានចុះកិច្ចសន្យាលក់ទិញបន្ទប់
× ភ្នំពេញ៖ គិតត្រឹមថ្ងៃទី២០ ខែឧសភា មានពលរដ្ឋរស់នៅអគារប៊ូឌីញ «ស» ចំនួន៤០៩គ្រួសារហើយបានចុះកិច្ចសន្យាលក់ទិញបន្ទប់ជាផ្លូវការ។ ចំនួននេះ ស្មើនឹង៨៣ភាគរយ នៃពលរដ្ឋសរុបដែលកំពុងរស់នៅអគារប៊ូឌីញ។ ជាមួយគ្នានេះ មានពលរដ្ឋចំនួន២៧គ្រួសារទៀត បានណាត់ពេលជួបជាមួយក្រុមការងារចុះកិច្ចសន្យាលក់ទិញ ដែលចំនួនបន្ថែមនេះ ធ្វើឲ្យមានកំណើនពលរដ្ឋព្រមទទួលសំណងមានដល់៨៨ភាគរយ។
ក្នុងចំណោមពលរដ្ឋនៅអាគារប៊ូឌីញចំនួន ៤៩៣គ្រួសារ មានពលរដ្ឋចំនួន៤០៩គ្រួសារ ឬបន្ទប់ ស្មើនឹង៨៣ភាគរយ បានមកចុះកិច្ចសន្យាលក់ទិញ ដើម្បីទទួលបានសំណងពីក្រុមហ៊ុន។ សេចក្តីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ទៀតថា មានពលរដ្ឋចំនួន២៧បន្ទប់ទៀត បានណាត់ពេលជួបជាមួយក្រុមការងារចុះកិច្ចសន្យាលក់ទិញ។ ចំនួនបន្ថែមនេះ ធ្វើឲ្យចំនួនពលរដ្ឋ កើនឡើងរហូតដល់៤៣៦គ្រួសារ ស្មើនឹង៨៨ភាគរយ។
ក្នុងសេចក្តីជូនដំណឹងដដែល ក្រសួងដែនដីបានអំពាវនាវដល់ពលរដ្ឋខាងលើ ឲ្យរួសរាន់មកចុះកិច្ចសន្យាលក់ ទិញបន្ទប់ស្នាក់នៅរបស់ខ្លួន នៅទីស្តីការក្រសួងរៀបចំដែនដី នគរូបនីយកម្ម និងសំណង់ ដែលធ្វើជារាល់ថ្ងៃ រួមទាំងថ្ងៃឈប់សម្រាកផង។
សូមបញ្ជាក់ថា អគារប៊ូឌីញដែលមានវ័យចំណាស់ និងមានសភាពទ្រុឌទ្រោមនៅកណ្តាលរាជធានីភ្នំពេញ ត្រូវបានក្រុមហ៊ុនជប៉ុនមួយឈ្មោះ អារ៉ាកាវ៉ា ទិញពីពលរដ្ឋក្នុងតម្លៃ១៤០០ដុល្លារអាមេរិក ក្នុងមួយម៉ែត្រការ៉េ។ ទីតាំងអគារប៊ូឌីញនេះ នឹងត្រូវសង់ជាអគារពាណិជ្ជកម្មកម្ពស់៣០ជាន់ ដែលគ្រោងចំណាយទឹកប្រាក់ចន្លោះពី៧០លាន ទៅ៨០លានដុល្លារអាមេរិក៕
© រក្សាសិទ្ធិដោយ thmeythmey.com