អធិការបតីអាល្លឺម៉ង់ថា អឺរ៉ុបមិនអាចពឹងលើសម្ព័ន្ធមិត្តអាមេរិកទាំងស្រុងដូចមុនឡើយ

អន្តរជាតិ

អធិការបតីអាល្លឺម៉ង់ថា អឺរ៉ុបមិនអាចពឹងលើសម្ព័ន្ធមិត្តអាមេរិកទាំងស្រុងដូចមុនឡើយ

29, May 2017 , 3:19 pm

រូបភាព

អធិការបតីអាល្លឺម៉ង់ អែនជេឡា មើហ្គែល ជួបជាមួយប្រធានាធិបតីអាមេរិក ដូណាល់ ត្រាំ មុនជំនួប G7 នៅអ៊ីតាលី (រូបភាព Reuters)

ដោយ: តន ចាន់រិទ្ធារ៉ា

អធិការបតីអាល្លឺម៉ង់ លោកស្រី អែនជេឡា មឹហ្គែល (Angela Merkel) និយាយថា អឺរ៉ុបមិនអាចពឹងផ្អែកលើសម្ព័ន្ធមិត្តរបស់ខ្លួនបានដូចមុនទៀតឡើយ តែអឺរ៉ុបត្រូវឈរដោយខ្លួនឯង និងរួបរួមគ្នាដោះស្រាយបញ្ហាប្រឈមទាំងឡាយដែលកំពុងកើតឡើង។ លោកស្រី មឺហ្គែល ថ្លែងដូចនេះតែមួយថ្ងៃប៉ុណ្ណោះ ក្រោយកិច្ចប្រជុំមហាអំណាចសេដ្ឋកិច្ចទាំង៧ (G7) បានបញ្ចប់ដោយសោះកក្រោះ ដោយសារតែការខ្វែងគំនិតគ្នារវាងអាមេរិក និងសម្ព័ន្ធមិត្តអឺរ៉ុបលើបញ្ហាប្រែប្រួលអាកាសធាតុ។

ទំនាក់ទំនងប្រពៃណីរវាងអាមេរិក និងអឺរ៉ុប ទំនងដើរមកដល់ដំណាក់កាលថ្មីមួយទៀត ក្រោយសម្ព័ន្ធមិត្តទាំងពីរទាស់ទែងខ្វែងគំនិតគ្នាលើបញ្ហាជាច្រើន។ រដ្ឋបាលអាមេរិកក្រោមអាណត្តិប្រធានាធិបតី ដូណាល់ ត្រាំ កំពុងធ្វើឲ្យអឺរ៉ុបស្រឡាំងកាំងខ្លាំង ដោយសារគោលនយោបាយមិនច្បាស់លាស់ជាមួយសម្ព័ន្ធមិត្តរបស់ខ្លួន។ លោក ត្រាំ នៅតែប្រកាន់យកគំនិត American First ជាធំ ហើយមិនសូវខ្វល់ពីអ្នកដទៃឡើយ ដែលរឿងនេះធ្វើសម្ព័ន្ធមិត្តនៅអឺរ៉ុបមិនសប្បាយចិត្តឡើយ។

កិច្ចប្រជុំមហាអំណាចសេដ្ឋកិច្ចជឿនលឿនទាំង៧ នៅអ៊ីតាលី បានបង្ហាញយ៉ាងច្បាស់ពីភាពមិនចុះសម្រុងរវាងអាមេរិក និងសម្ព័ន្ធមិត្តរបស់ខ្លួន ជាពិសេសអឺរ៉ុប។ លោក ត្រាំ មិនទាន់ផ្ដល់ចម្លើយឲ្យសមាជិកផ្សេងឡើយជុំវិញបំណងដកខ្លួនពីកិច្ចព្រមព្រៀងបម្រែបម្រួលអាកាសធាតុ ដែលសម្រេចបាននៅទីក្រុងប៉ារីស ក្នុងឆ្នាំ២០១៥ ។ ប្រធានាធិបតីអាមេរិក សុំជំពាក់ចម្លើយសិន ហើយលោកនឹងប្រាប់ពីជំហររបស់អាមេរិក ពេលលោកត្រឡប់ទៅអាមេរិកវិញ។

ដោយសារជំហរបែបនេះ អធិការបតីអាល្លឺម៉ង់ អែនជេឡា មើហ្គែល បាននិយាយរបៀបដៀមដាមដាក់អាមេរិកថា អឺរ៉ុបមិនអាចពឹងលើអ្នកណាបានឡើយ តែត្រូវចេះរស់ដោយខ្លួនឯង។ បើតាមទីភ្នាក់ងារព័ត៌មាន Reuters ថ្លែងក្នុងពេលឃោសនារបស់បក្ស CDU នៅថ្ងៃទី២៨ ខែឧសភា លោកស្រី មើហ្គែល និយាយថា ឆ្លងកាត់រយៈពេលពីរបីថ្ងៃនេះ ពេលវេលាដែលអឺរ៉ុបអាចពឹងពាក់លើអ្នកដទៃបាន ដូចជាត្រូវចប់ហើយ។

ដោយសារមិនអាចពឹងអាស្រ័យលើសម្ព័ន្ធមិត្តបានដូចមុន អធិការបតីអាល្លឺម៉ង់ក៏ប្រាប់ឲ្យអឺរ៉ុបត្រូវចាប់ដៃគ្នាជាធ្លុងមួយ និងត្រូវពឹងផ្អែកលើវាសនាខ្លួនដើម្បីបន្តដំណើរទៅមុខ។ យ៉ាងណាមិញ នេះមិនមែនមានន័យថា អឺរ៉ុបលែងរាប់រកសម្ព័ន្ធមិត្តរបស់ខ្លួនទេ។ អឺរ៉ុប នឹងបន្តសម្ព័ន្ធភាពជាមួយអាមេរិក ជាមួយចក្រភពអង់គ្លេសដែលសម្រេចចិត្តចាកចេញ ក៏ដូចជាជាមួយប្រទេសដទៃទៀតដើម្បីប្រយោជន៍របស់ខ្លួនសូម្បីតែរុស្ស៊ីក៏ដោយ។

ការដកខ្លួនចេញពីកិច្ចព្រមព្រៀងបម្រែបម្រួលអាកាសធាតុ រួមនឹងការទារថ្លៃចំណាយសម្រាប់សម្ព័ន្ធយោធាណាតូ គឺជាបញ្ហាពីរដែលធ្វើឲ្យទស្សនកិច្ចលោក ត្រាំ នៅអឺរ៉ុបមិនសូវសមប្រកប។ លោក ត្រាំ បានរិះគន់សមាជិកសម្ព័ន្ធយោធា ដែលមិនព្រមអនុវត្តតាមកិច្ចរបស់ខ្លួនក្នុងការបង្កើនថ្លៃចំណាយសម្រាប់អង្គការយោធានេះឲ្យបានពីរភាគរយនៃផលិតផលក្នុងស្រុករបស់ខ្លួន។ ប្រធានាធិបតីអាមេរិក ចាត់ទុកបញ្ហាជារឿងអយុត្តិធម៌ណាស់សម្រាប់ប្រជាជនអាមេរិក៕