អន្តរជាតិ
ទៅដល់អាមេរិកភ្លាម លោក ត្រាំ ព្រលះប្រព័ន្ធផ្សព្វផ្សាយមុនគេ
×
អំឡុងពេលទស្សនកិច្ច ៩ថ្ងៃនៅមជ្ឈិមបូព៌ា និងអឺរ៉ុប ប្រធានាធិបតីអាមេរិក ដូណាល់ ត្រាំ មិនបានបង្ហោះសារអ្វីតាមបណ្ដាញសង្គម Twitter ឡើយ ព្រោះទំនងជារវល់ខ្លាំងនឹងកម្មវិធីដ៏មមាញឹក។ ស្រាប់តែទៅដល់អាមេរិកវិញភ្លាម លោក ត្រាំ ក៏បានបង្ហោះសារជាច្រើនលើគណនី Twitter របស់លោក ដោយបានវាយប្រហារបណ្ដាញសារព័ត៌មាន ដែលបានផ្សាយពីព័ត៌មានទាក់ទងករណីកូនប្រសាររបស់លោកក្នុងសំណុំរឿងជាមួយរុស្ស៊ី ដោយស្រង់ប្រភពមិនច្បាស់លាស់។
ប្រធានាធិបតី ដូណាល់ ត្រាំ បានត្រឡប់ដល់សេតវិមានវិញនៅថ្ងៃទី២៧ ខែឧសភា បន្ទាប់ពីបញ្ចប់ទស្សនកិច្ចនៅក្រៅប្រទេសលើកដំបូង។ នៅក្រៅប្រទេសប៉ុន្មានថ្ងៃនេះ លោក ត្រាំ មិនបាននិយាយអ្វីទាល់តែសោះទាក់ទងបញ្ហាក្នុងស្រុកដែលកំពុងក្ដៅគគុក ជាពិសេសព័ត៌មានពាក់ព័ន្ធនឹងកូនប្រសារ Jared Kushner ដែលត្រូវចោទប្រកាន់ថាបានលួចទាក់ទងជាមួយរុស្ស៊ីដើម្បីបង្កើតប្រព័ន្ធទូរសព្ទសម្ងាត់ មុនពេលលោក ត្រាំ ចូលកាន់តំណែង។
បន្ទាប់ពីអាក់ខានជាច្រើនថ្ងៃមកនោះ លោក ត្រាំ ដែលគេឲ្យរហស្សនាមថា «Twitter-in-chief» ក៏បានប្រើគណនី Twitter របស់លោក រិះគន់ប្រព័ន្ធផ្សព្វផ្សាយ និងបានទាត់ចោលព័ត៌មានលេចធ្លាយពីសេតវិមានជាព័ត៌មានក្លែងក្លាយទៀតផង។ ព្រឹកថ្ងៃទី២៨ ខែឧសភា លោក ត្រាំ បានបង្ហោះសារមួយថា៖ «តាមគំនិតរបស់ខ្ញុំ ព័ត៌មានជាច្រើនដែលធ្លាយចេញពីសេតវិមាន គឺជារឿងកុហកដែលបង្កើតដោយប្រព័ន្ធផ្សព្វផ្សាយក្លែងក្លាយ»។
បន្ទាប់មកទៀត ប្រធានាធិបតីទី៤៥ របស់អាមេរិករូបនេះ ក៏បានរិះគន់បណ្ដាញសារព័ត៌មានដែលស្រង់ប្រភពមិនច្បាស់លាស់ ហើយមិនដាក់ឈ្មោះប្រភពទៅទៀត។ លោកនិយាយថា នៅពេលសារព័ត៌មានប្រើប្រាស់ពាក្យ «ប្រភព» ដោយមិនបង្ហាញឈ្មោះ វាមានលទ្ធភាពច្រើនដែល «ប្រភព» ទាំងនោះមិនមែនជាការពិតឡើយ តែត្រូវបានបង្កើតឡើងដោយអ្នកសរសេរព័ត៌មានក្លែងក្លាយទាំងនោះទៅវិញទេ។
នៅយប់ថ្ងៃទី២៨ ខែឧសភា លោក ត្រាំ ដែលជាប្រធានាធិបតីមានសាវតារមកពីអ្នកជំនួញគ្មានបទពិសោធន៍នយោបាយ ក៏ឆ្លៀតបង្ហោះសារវាយប្រហារប្រព័ន្ធផ្សព្វផ្សាយបន្តទៀត។ ដោយមិននិយាយចំឈ្មោះសារព័ត៌មានណាមួយ លោក ត្រាំ បានចោទប្រកាន់ពួកគេថាបានព្យាយាមយ៉ាងខ្លាំងក្នុងការបង្កាច់បង្ខូចបន្ទាបបន្ថោកការប្រើប្រាស់បណ្ដាញសង្គមរបស់លោក ព្រោះពួកគេមិនចង់ឲ្យប្រជាជនអាមេរិកទទួលបានព័ត៌មានពិត។
ការប្រើប្រាស់បណ្ដាញសង្គម Twitter ដើម្បីវាយប្រហារប្រព័ន្ធផ្សព្វផ្សាយនៅពេលនេះ ធ្វើឡើងក្រោយរឿងអាស្រូវរុស្ស៊ីលូកលាន់កិច្ចការបោះឆ្នោតអាមេរិក បានរាលដាលលោក Kushner កូនប្រសារលោក ត្រាំ ។ មន្ត្រីអាមេរិក បានប្រាប់ទីភ្នាក់ងារព័ត៌មាន Reuters ថា Kushner បានទាក់ទងជាមួយទូតរុស្ស៊ីដោយសម្ងាត់ចំនួនបីដងក្នុងពេលឃោសនារកសំឡេងឆ្នោត។ គេចោទថា រុស្ស៊ី បានជួយឲ្យលោក ត្រាំ ឈ្នះឆ្នោតតាមរយៈការលួចយកទិន្នន័យ និងការបង្កើតព័ត៌មានក្លែងក្លាយជាដើម៕
Tag:
អាមេរិក
ដូណាល់ ត្រាំ
ប្រព័ន្ធផ្សព្វផ្សាយ
© រក្សាសិទ្ធិដោយ thmeythmey.com