កូរ៉េខាងជើង ត្រៀមកញ្ចប់កាដូដ៏ភ្ញាក់ផ្អើលឲ្យអាមេរិក

អន្តរជាតិ

កូរ៉េខាងជើង ត្រៀមកញ្ចប់កាដូដ៏ភ្ញាក់ផ្អើលឲ្យអាមេរិក

30, May 2017 , 2:35 pm

រូបភាព

ដោយ: តន ចាន់រិទ្ធារ៉ា

កូរ៉េខាងជើងបានសាកល្បងមីស៊ីលមួយទៀតទី២៩ ខែឧសភា ដែលជាមីស៊ីលស្តុតរយៈចម្ងាយខ្លី ប្រើបច្ចេកវិទ្យាបាលីស្ទិក និងមានបំពាក់ប្រព័ន្ធនាំទៅរកគោលដៅផង។ មេដឹកនាំវ័យក្មេង គីម ជុងអ៊ុន ត្រួតពិនិត្យការសាកល្បងនេះដោយផ្ទាល់ ទាំងដឹងថាសហគមន៍អន្តរជាតិថ្កោលទោសក៏ដោយចុះ។ លោក គីម ជុងអ៊ុន ក៏បញ្ជាឲ្យអភិវឌ្ឍអាវុធយុទ្ធភណ្ឌឲ្យកាន់តែខ្លាំងបន្ថែមទៀត ដើម្បីត្រៀមទប់ទល់ការឈ្លានពានរបស់អាមេរិក។

កូរ៉េខាងជើង ហាក់មិនអើពើ ឬញញើតសូម្បីតែបន្តិចការព្រមានរបស់សហគមន៍អន្តរជាតិជុំវិញកម្មវិធីនុយក្លេអ៊ែររបស់ខ្លួន។ ម្ដងហើយម្ដងទៀត រដ្ឋកុម្មុយនីស្តឯកោមួយនេះ បានបាញ់មីស៊ីលយ៉ាងញឹកញាប់មានទាំងមីស៊ីលរយៈចម្ងាយមធ្យម និងរយៈចម្ងាយខ្លីជាដើម ហើយពេលខ្លះមានទាំងបាញ់មីស៊ីលបាលីស្ទិកដែលគេហាមឃាត់ទៅទៀត។ មេដឹកនាំកូរ៉េខាងជើង លោក គីម ជុងអ៊ុន ក៏តែងបង្ហាញវត្តមានក្នុងការបាញ់មីស៊ីលកន្លងមក ក៏ដូចជាលើកចុងក្រោយថ្ងៃទី២៩ ខែឧសភាជាដើម។

មីស៊ីលដែលបាញ់នៅដើមសប្ដាហ៍នេះ គឺជាមីស៊ីលចម្ងាយខ្លីដែលមានបំពាក់បច្ចេកវិទ្យាបាញ់ជាបន្តបន្ទាប់ដោយស្វ័យប្រវត្តិ។ មីស៊ីលរយៈចម្ងាយខ្លីនេះ បានធ្លាក់ចូលតំបន់សេដ្ឋកិច្ចផ្ដាច់មុខរបស់ជប៉ុន ដែលធ្វើឲ្យជប៉ុនខឹងយ៉ាងខ្លាំង។ សារព័ត៌មានរដ្ឋកូរ៉េខាងជើង KCNA បានស្រង់សម្ដីលោក គីម ជុងអ៊ុន ថា កូរ៉េខាងជើងនឹងបន្តអភិវឌ្ឍមីស៊ីលរបស់ខ្លួនទៀត ទៅតាមដំណាក់ផ្សេងៗ និងតាមកម្មវិធីដែលកំណត់ ដើម្បីឆ្លើយនឹងការឈ្លានពានរបស់អាមេរិក។

បើតាមទីភ្នាក់ងារព័ត៌មាន Reuters មេដឹកនាំកូរ៉េខាងជើងវ័យក្មេងរូបនេះ ក៏ព្រមានដែរថា កម្មវិធីនុយក្លេអ៊ែររបស់ខ្លួន នឹងដើរមួយជំហានយក្សទៅមុខ ហើយលោកចាត់ទុកជាការជឿនលឿននៃកម្មវិធីអាវុធនេះ ជាកញ្ចប់កាដូដ៏ភ្ញាក់ផ្អើលសម្រាប់អាមេរិក។ តាំងពីដើមមក លោក គីម ជុងអ៊ុន បានបន្ទន់អាកប្បកិរិយារបស់ខ្លួនដាក់អាមេរិកឡើយ បើទោះជាអាមេរិកប្រើធម៌ក្ដៅផង ធម៌ត្រជាក់ផងក្ដី។ ប្រធានាធិបតី ដូណាល់ ត្រាំ ថែមទាំងចង់ជួបលោក គីម ជុងអ៊ុន ថែមទៀត។

អ្វីដែលគួរឲ្យចាប់អារម្មណ៍ ភ្លាមៗបន្ទាប់ការបាញ់មីស៊ីលនៅថ្ងៃទី២៩ ខែឧសភា កូរ៉េខាងត្បូង ក៏ធ្វើសមយុទ្ធជាមួយកងទ័ពអាមេរិកដោយមានវត្តមានយន្តហោះទម្លាក់គ្រាប់បែកយុទ្ធសាស្ត្រ B-1B ទៀតផង។ ដោយឡែកកងទ័ពជើងទឹកអាមេរិកក៏ប្រកាសដែរថា នាវាដឹកយន្តហោះ USS Carl Vinson និងនាវាដឹកយន្តហោះ USS Ronald Reagan ដែលធ្វើដំណើរមកពីជប៉ុន ក៏គ្រោងធ្វើសមយុទ្ធក្បែរឧបទ្វីបកូរ៉េដែរ។

ក្រុងព្យុងយ៉ាង ចាត់ទុកវត្តមានយន្តហោះទម្លាក់គ្រាប់បែកនេះ ជាសមយុទ្ធទម្លាក់គ្រាប់នុយក្លេអ៊ែរនៅឧបទ្វីបកូរ៉េ និងជាការរៀបចំធ្វើសង្គ្រាមប្រឆាំងខ្លួនផងដែរ។ ដោយសារហេតុនេះ ទើបកូរ៉េខាងជើងប្រឹងប្រែងអភិវឌ្ឍមីស៊ីលរបស់ខ្លួនដើម្បីទុកការពារខ្លួនផង និងទុកគំរាមអាមេរិកផង។ មកទល់ពេលនេះ គេជឿថា កូរ៉េខាងជើងស្ថិតក្នុងដំណាក់កាលចុងក្រោយនៃការអភិវឌ្ឍមីស៊ីលបាលីស្ទិករយៈចម្ងាយឆ្ងាយ ហើយអាចបាញ់ដល់អាមេរិកទៅទៀត៕