កីឡាអន្តរជាតិ
អន្តរជាតិ
Tevez ថាលីកបាល់ទាត់ចិន ដើរក្រោយលីកអឺរ៉ុប៥០ឆ្នាំ
× Carlos Tevez ខ្សែប្រយុទ្ធក្រុម Shanghai Shenhua ថាលីកលំដាប់កំពូលនៅចិន Chinese Super League បច្ចុប្បន្ន មានកម្រិតទាបនៅឡើយ ដែលនៅដាច់ឆ្ងាយពីលីកនៅតំបន់អឺរ៉ុបរហូត៥០ឆ្នាំឯណោះ។
ខ្សែប្រយុទ្ធអន្តរជាតិអាហ្សង់ទីន វ័យ៣៣ឆ្នាំរូបនេះ បានប្រាប់ទូរទស្សន៍អេស្ប៉ាញ Movistar ថា៖« ខ្ញុំមិនគិតថាក្រុមនៅលីកំពូលចិននេះនឹងអាចប្រជែងជាមួយក្រុមនៅអឺរ៉ុបបាននោះទេ។ ខ្ញុំគិតថាកម្រិតរបស់ពួកគេ នៅក្រោយក្រុមនៅតំបន់អឺរ៉ុបរហូតដល់ទៅ៥០ឆ្នាំឯណោះ»។
លើសពីនេះទៅទៀតនោះ អតីតខ្សែប្រយុទ្ធរបស់ Juventus និង Man City នេះ គិតថាទោះបីមានកីឡាករល្អៗមកចូមរួមក៏ដោយ ក៏បាល់ទាត់ទីនេះនៅតែខុសគ្នាឆ្ងាយពីក្រុមនៅតំបន់អឺរ៉ុបដដែល។
អតីតសមាជិកក្រុមបិសាចក្រហម Man Utd នេះ បានផ្លាស់ពីក្រុម Boca Juniors ទៅចូលរួមជាមួយក្រុមក្នុងលីកកំពូលចិន Shanghai Shenhua កាលពីខែធ្នូឆ្នាំមុន ដោយទទួលបានថ្លៃឈ្នួលឯតទត្តកម្មរហូតដល់៤១លានដុល្លារក្នុងមួយឆ្នាំ ឬជិត៨សែនដុល្លារក្នុងមួយសប្តាហិ៍ និង៤៨០០ដុល្លារក្នុង១ម៉ោង។
ថ្មីៗនេះ Tevez ក៏បានពិភាក្សាជុំវិញការចាកចេញដើម្បីរកក្លិបថ្មីទៀត ស្របពេលកិច្ចសន្យា១ឆ្នាំជាមួយ Shanghai Shenhua ត្រូវបញ្ចប់នាពេលឆាប់ៗនេះ៕
Tag:
បាល់ទាត់
Carlos Tevez
Shanghai Shenhua
© រក្សាសិទ្ធិដោយ thmeythmey.com