ឌូទើតេ ថាហ្វីលីពីនមិនត្រូវការអាវុធមួយទឹកពីអាមេរិកឬប្រទេសណាផ្សេងឡើយ

អន្តរជាតិ

ឌូទើតេ ថាហ្វីលីពីនមិនត្រូវការអាវុធមួយទឹកពីអាមេរិកឬប្រទេសណាផ្សេងឡើយ

03, Jun 2017 , 4:16 pm

រូបភាព

ដោយ: ថ្មីៗ

ថ្ងៃសុក្រទី ២ មិថុនាក្នុងជំនួបជាមួយកងពលតូចកាំភ្លើងធំប្រចាំ ខេត្តZamboanga Sibugay លោក រ៉ូឌ្រីហ្គោ ឌូទើតេ បានលើកឡើងថា ហ្វីលីពីនមិនត្រូវការអាវុធមួយទឹកពីអាមេរិកនិងប្រទេសផ្សេងទៀតឡើយ។ ក្រោមអាណត្តិរបស់លោក អាវុធដែលនាំចូលសម្រាប់កងទ័ពហ្វីលីពីនប្រើប្រាស់គឺត្រូវតែអាវុធថ្មីនិងទំនើបផងដែរ។

ស្របពេលដែលហ្វីលីពីនប្រឈមមុខជាមួយក្រុមភេរវជនរដ្ឋឥស្លាមឬក្រុមដែស្ហ (Daesh) ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ ប្រកាសថារដ្ឋបាលរបស់លោកមិនត្រូវការសម្ភារៈយោធាមួយទឹកៗពីប្រទេសដទៃទៀតឡើយរួមទាំងសហរដ្ឋអាមេរិកផង។

យោងតាមសារព័ត៌មាន GMA លោក ឌូទើតេ បានអះអាងថា ក្រោមការដឹកនាមរបស់លោក កងទ័ពហ្វីលីពីនមិនត្រូវការអាវុធជជុសពីប្រទេសដៃឡើយ។ ហ្វីលីពីនត្រូវការតែជាអាវុធថ្មីនិងទំនើប ទោះបីជាត្រូវចំណាយលុយទ្វេដងក៏ដោយចុះ។

ប្រធានាធិបតីហ្វីលីពីនរូបនេះបានសង្កត់ធ្ងន់ថា លោកនឹងស្វះស្វែងនាំចូលអាវុធជាពិសេសកាំភ្លើងពីប្រទេសចំនួនពីរ ប៉ុន្តែលោកមិនបានបញ្ជាក់ឲ្យច្បាស់ទេថា ប្រទេសទាំងពីរនោះមានប្រទេសណាខ្លះនោះឡើយ។

ប៉ុន្តែគេដឹងច្បាស់ថា ប្រទេសទាំងពីរនោះគ្មានប្រទេសណាក្រៅពីរុស្ស៊ីនិងចិនឡើយព្រោះប្រធានាធិបតីប្រឹងប្រែងពង្រឹងទំនាក់ទំនងជាមួយប្រទេសទាំងពីរនេះខ្លាំងជាងគេ។ ម្យ៉ាង លោក ឌូទើតេ ទើបត្រឡប់មកពីរុស្ស៊ីវិញថ្មីនេះផង ហើយលោកក៏បានស្នើសុំទិញអាវុធទំនើបពីរុស្ស៊ីមកកម្ចាត់ក្រុមភេរវជនផងដែរ។

ក្រៅពីអួតថាលោកមិនត្រូវការទិញអាវុធមួយទឹកៗដើម្បីឲ្យកងទ័ពហ្វីលីពីនប្រើប្រាស់លោក ឌូទើតេ ក៏បានប្រកាសផងដែរថា កងទ័ពរបស់លោកកម្ចាត់ក្រុមភេរវជនឲ្យអស់ទោះបីជាត្រូវចំណាយពេលវេលាយូរ និងត្រូវចំណាយជីវិតកងទ័ពច្រើនប៉ុណ្ណាក៏ដោយចុះ។

បច្ចុប្បន្ននេះកងកម្លាំងហ្វីលីពីននៅតែបន្តប្រយុទ្ធដណ្តើមក្រុង Marawi ពីក្រុមភេរវជន Maute និងរំដោះប្រជាជនប្រហែលមួយពាន់នាក់ដែលនៅជាប់ក្នុងតំបន់ដែលក្រុមភេរវជននេះកាន់កាប់ផងដែរ។ ប្រធានាធិបតីហ្វីលីពីលោក រ៉ូឌ្រីហ្គោ ឌូទើតេ បានប្រកាសប្រើប្រាស់ច្បាប់អាជ្ញាសឹកនៅថ្ងៃអង្គារទី ២៣ ឧសភាក្រោយការប៉ះទង្គិចគ្នានេះ។ លោកធ្លាប់លើកឡើងថា រដ្ឋាភិបាលលោកអាចនឹងអនុវត្តច្បាប់អាជ្ញាសឹកក្នុងរយៈពេលវែងក្នុងករណីដែលចាំបាច់ដើម្បីឆ្លើយតបបញ្ហាសន្តិសុខបង្កដោយក្រុមភេរវជន៕