ការវាយប្រហារភេរវកម្មអុកឡុកអង់គ្លេសជាថ្មីបង្កឲ្យមនុស្ស ៦នាក់ស្លាប់និងរបួសរាប់សិបនាក់

អន្តរជាតិ

ការវាយប្រហារភេរវកម្មអុកឡុកអង់គ្លេសជាថ្មីបង្កឲ្យមនុស្ស ៦នាក់ស្លាប់និងរបួសរាប់សិបនាក់

04, Jun 2017 , 2:08 pm

រូបភាព

រូបភាព CNN

ដោយ: ថ្មីៗ

ជនរងគ្រោះប្រាំមួយនាក់បានស្លាប់ និងជនបង្កហេតុបីនាក់ផ្សេងទៀតត្រូវបានប៉ូលិសបាញ់សម្លាប់ក្នុងករណីវាយប្រហារភេរវកម្មជាបន្តបន្ទាប់នៅកណ្តាលទីក្រុងឡុងដ៏ចក្រភពអង់គ្លេសនៅនារាត្រីថ្ងៃ ៣ មិថុនា។ ប៉ូលិសអង់គ្លេសបានបញ្ជាក់ថា ក្រុមភេរវជននោះដែលត្រូវប៉ូលិសបាញ់សម្លាប់នោះពាក់អាវសម្រាប់ធ្វើអត្តឃាតក្លែងក្លាយថែមទៀត។

មនុស្សប្រាំមួយនាក់ស្លាប់ និង ច្រើនជាង៣០នាក់ផ្សេងទៀងរងរបួសនៅក្នុងករណីវាយប្រហារភេរវកម្មបន្តបន្ទាប់នៅយប់ថ្ងៃទី ៣ ខែមិថុនា នៅកណ្តាលក្រុងឡុងដ៍។ ក្រៅពីជនរងគ្រោះ ក្រុមប្រដាប់អាវុធបីនាក់ក៏ត្រូវបានប៉ូលិសបាញ់សម្លាប់ផងដែរក្រោយការវាយប្រហារនេះ។

មនុស្សស្លាប់និងរបួសនេះកើតឡើងដោយសារការបើកឡានកិនមនុស្សលើស្ពានក្រុងឡុងដ៏ និងមានការវាយប្រហារលើអ្នកដំណើរដោយប្រើប្រាស់កាំបិតនៅផ្សារ Borough ថែមទៀតផង។

យោងតាមទីភ្នាក់ងារព័ត៌មាន AFP មន្ត្រីប៉ូលិសជាន់ខ្ពស់និងប្រធានអង្គភាពប្រឆាំងភេរវកម្ម លោក Mark Rowleyបានអះអាងថា៖« នៅជំហាននេះ យើងជឿជាក់ថា មនុស្សប្រាំមួយនាក់បានស្លាប់បន្ថែមពីលើជនប្រដាប់អាវុធដែលប៉ូលិសបាញ់សម្លាប់»។

យោងតាមព័ត៌មានក្នុងតំបន់ ខ្មាន់កាំភ្លើងទាំងបីនាក់នោះត្រូវបានប៉ូលិសបាញ់សម្លាប់ បន្ទាប់ពីពួកគេបានប្រើប្រាស់កាំបិតកាប់ចាក់លើមនុស្សជាច្រើននាក់នៅផ្សារ Borough នៅក្នុងក្រុងឡុងដ៍។ ហើយមន្ត្រីប៉ូលិសក៏ទទួលស្គាល់ថា គេសម្រេចបាញ់ក្រុមប្រដាប់អាវុធទាំងនោះ ក្រោយពេលទទួលបានព័ត៌មានពាក់ព័ន្ធការកាប់ប្រហារលើអ្នកដំណើរនិងមានការបើករថយន្តបុកនិងកិនអ្នកដំណើរលើស្ពានក្រុងឡុងដ៍ដែរ។

«ជនសង្ស័យទាំងបីដែលត្រូវបានប៉ូលិសបាញ់នោះពាក់អាវបង្កប់គ្រឿងផ្ទុះសម្រាប់ធ្វើអត្តឃាត ប៉ុន្តែអាវទាំងនោះជាអាចក្លែងក្លាយប៉ុណ្ណោះ»។ នេះជាការបញ្ជាក់របស់លោក Rowley។

ចំណែកក្រៅពីអ្នកស្លាប់ មនុស្សច្រើនជាង ៣០នាក់ផ្សេងទៀតរងរបួសដោយសារករណីវាយប្រហារបន្តបន្ទាប់គ្នានេះដែរ។ ពួកគេត្រូវបានបញ្ជូនទៅកាន់មន្ទីរពេទដើម្បីទទួលការព្យាបាលរួចរាល់ដែរ។

អភិបាលក្រុងឡុងដ៏ Sadiq Khan បានថ្កោលទោសការវាយប្រហារនេះ ដោយហៅថា ជាសកម្មភាពព្រៃផ្សៃ និងកំសាកបំផុតមួយ។ លោកបានបញ្ជាក់ដូច្នេះ៖ «វាជាការវាយប្រហារដោយមានការរៀបចំទុកមុន និងកំសាកបំផុតមួយប្រឆាំងប្រជាជនក្រុងឡុងដ៏ដែលមិនដឹងអី និងអ្នកទេសចរដែលកំពុងដើរកម្សាន្តយ៉ាងសប្បាយរីករាយនាពេលរាត្រី។ ទោះអំណះអំណាងអ្វីក៏ដោយក៏មិនអាចការពារប្រព្រឹត្តអំពើព្រៃផ្សៃនេះបានដែរ»។

ការវាយប្រហារនេះក៏កើតឡើងប៉ុន្មានថ្ងៃប៉ុណ្ណោះមុនការបោះឆ្នោតសភាមុនអាណត្តិមកដល់។
ការបោះឆ្នោតសភាអង់គ្លេសនេះនឹងត្រូវរៀបចំឡើងនៅថ្ងៃ ៨ខែមិថុខាងមុខ ប៉ុន្តែរបាយការណ៍ស្ទង់មតិបង្ហាញថា គណបក្សអភិរក្សនិយមរបស់នាយករដ្ឋមន្ត្រី Theresa May ធ្លាក់ប្រជាប្រិយភាពខ្លាំងគួរឲ្យកត់សម្គាល់។

ដោយឡែក ការវាយប្រហារជាថ្មីនេះកើតឡើង ក្រោយការវាយប្រហារភេរវកម្មលើស្ពាន Westminster កាលពីខែមីនា ដែលបណ្តាលឲ្យមនុស្ស ប្រាំនាក់ស្លាប់និងច្រើនជាង ៥០នាក់ផ្សេងទៀតរងរបួស៕