អន្តរជាតិ
ឥណ្ឌូណេស៊ី៖ បណ្តាញក្រុមភេរវជនរដ្ឋឥស្លាម ១២០០នាក់កំពុងធ្វើសកម្មភាពនៅហ្វីលីពីន ឥណ្ឌូណេស៊ី-បណ្តាញក្រុមភេរវជនរដ្ឋឥស្លាម-១២០០នាក់ធ្វើសកម្មភាពនៅហ្វីលីពីន
× ឥណ្ឌូណេស៊ីបានបញ្ជាក់ថា ក្រុមភេរវជនដែ្ហឬក្រុមរដ្ឋឥស្លាមមានប្រហែល ១២០០នាក់កំពុងធ្វើសកម្មភាពនៅក្នុងប្រទេសហ្វីលីពីន។ ក្នុងចំណោមក្រុមភេរវជនទាំងនោះមាន ៤០នាក់មកពីឥណ្ឌូណេស៊ីថែមទៀតផង។ ការបង្ហាញពីទិន្នន័យនៃចំនួនក្រុមភេរវជនដែស្ហយ៉ាងច្រើននៅហ្វីលីពីននេះ បង្ហាញឲ្យឃើញកាន់ថា តំបន់អាស៊ានប្រឈមមុខគ្រោះថ្នាក់ខ្លាំង។
ថ្លែងក្នុងវេទិកាសន្តិសុខ Shangri-La នៅសិង្ហបុរី រដ្ឋមន្ត្រីការពារជាតិឥណ្ឌូណេស៊ីលោក Ryamizard Ryacudu បានបញ្ជាក់ថា ក្រុមសកម្មប្រយុទ្ធដែស្ហ ឬក្រុមភេរវជនរដ្ឋឥស្លាមប្រហែល ១២០០ នាក់កំពុងធ្វើសកម្មភាពនៅហ្វីលីពីនទាំងមូល។ លោកក៏បានឆ្លៀតឱកាសនោះអំពាវនាវឲ្យបណ្តាភាគីពាក់ព័ន្ធធ្វើយ៉ាងណាពង្រឹងកិច្ចសហប្រតិបត្តិការឲ្យបានពេញលេញនិងឆាប់រហ័សដើម្បីកម្ចាត់ក្រុមភេរវជននេះ។
យោងតាមទីភ្នាក់ងារព័ត៌មាន AFP លោកបានថ្លែងដូច្នេះថា៖«ខ្ញុំត្រូវបានគេប្រាប់យប់មិញថា បណ្តាញក្រុមភេរវជនរដ្ឋឥស្លាមប្រហែល ១២០០នាក់កំពុថងស្ថិតនៅហ្វីលីពីន ហើយប្រហែល ៤០នាក់មកពីឥណ្ឌូណេស៊ី»។
ការប្រកាសពីចំនួនក្រុមសកម្មប្រយុទ្ធក្រុមរដ្ឋឥស្លាមនៅក្នុងទឹកដីហ្វីលីពីននេះកើតឡើងស្របពេលដែលទាហានហ្វីលីពីនកំពុងបន្តប្រយុទ្ធដើម្បីដណ្តើមយកក្រុង Marawi ពីក្រុមភេរវជនវិញ។ ការប្រយុទ្ធគ្នាចាប់ផ្តើមតាំងតែពីថ្ងៃអង្គារសប្តាហ៍មុន ហើយបន្តអូសបន្លាយដល់ពេលនេះព្រោះក្រុមភេរវជន Maute ដែលជាបណ្តាញក្រុមដែស្ហប្រហែល៥០នាក់នៅមិនទាន់ដាក់អាវុធចុះនៅឡើយ។ការប្រយុទ្ធគ្នានេះបានសម្លាប់មនុស្សអស់ ១៧៧នាក់ហើយក្នុងនោះមានក្រុមភេរវជន១២០នាក់។
ដោយឡែកក្នុងវេទិកាសន្តិសុខប្រចាំឆ្នាំនៅសិង្ហបុរីនេះដែរ ការគំរាមកំហែងដោយចលនាភេរវកម្មជាពិសេសការត្រឡប់មកវិញរបស់ប្រជាជនដែលចេញទៅច្បាំងនៅក្នុងសង្គ្រាមជីហាតនៅស៊ីរីនិងអ៊ីរ៉ាក់បានក្លាយជាប្រធានបទស្នូល។
រដ្ឋមន្ត្រីការពារជាតិឥណ្ឌូណេស៊ីខាងលើក៏បានឆ្លៀតឱកាសអំពាវនាវឲ្យមានការដាក់ចេញវិធានការតឹងរ៉ឹងនិងគ្រប់ជ្រុងជ្រោយមួយដើម្បីប្រឆាំងក្រុមភេរវជននេះ។
«យើងត្រូវតែស្វែងរកវិធានការជាដុំកំភួនមួយ ប៉ុន្តែយើងក៏ត្រូវប្រុងប្រយ័ត្ន។ ពួកគេប្រៀបដូចជាកាំភ្លើងយន្តដូច្នេះដែរ។អ្វីដែលពួកគេចង់ធ្វើគឺសម្លាប់មនុស្ស។ ដូច្នេះហើយវាជាទំនួលខុសត្រូវរបស់យើងដែលត្រូវស្វែងយល់ពីបញ្ហារួមគ្នានិងរួបរួមគ្នារិះរកវិធីប្រឆាំងក្រុមភេរវជនមកពីបរទេសនេះ»។
អនុរដ្ឋមន្ត្រីការពារជាតិហ្វីលីពីនលោក Ricardo David បានលើកឡើងក្នុងវេទិការួមគ្នានេះថា ក្រុមភេរវជនមានគ្នាចំនួន ១២០០នាក់នេះជាអ្វីដែលលោកមិនធ្លាប់បានដឹង។
«ខ្ញុំមិនបានដឹងសោះ។ ទិន្នន័យដែលខ្ញុំបានដឹងគឺ ក្រុមភេរវជនមានគ្នាពី ២៥០ ទៅ ៤០០នាក់ប៉ុណ្ណោះ»។ នេះជាការបញ្ជាក់របស់លោក Ricardo។
ប៉ុន្តែលោកទទួលស្គាល់ថា ក្រុមភេរវជនដែស្ហដែលមកពីប្រទេសដទៃពិតជាមានមែននៅហ្វីលីពីន។ ពួកគេមានគ្នាប្រហែល ៤០នាក់ក្នុងចំណោមក្រុមភេរវជនដែលបានដណ្តើមកាន់កាប់ទីក្រុង Marawi កន្លងមកនិងត្រូវបានសម្លាប់ដោយទាហានរដ្ឋាភិបាល៕
Tag:
ហ្វីលីពីន
Marawi
Shangri-La Dialogue
Ryamizard Ryacudu
© រក្សាសិទ្ធិដោយ thmeythmey.com