កីឡាជាតិ
ជាតិ
ចាន់ វឌ្ឍនាកា ចាត់ទុកភាសាជាឧបសគ្គរារាំងសម្រាប់ការបង្ហាញខ្លួនក្នុងក្រុម Fujieda MYFC
× បញ្ហាភាសានៅតែជាឧបសគ្គសម្រាប់ខ្សែប្រយុទ្ធវ័យក្មេងដ៏មានប្រជាប្រិយភាពរបស់កម្ពុជា ចាន់ វឌ្ឍនាកា ក្នុងការចូលរួមជាមួយក្រុម Fujieda MYFC របស់ជប៉ុន ទោះបីបច្ចុប្បន្នកីឡាកររូបនេះអាចសម្របខ្លួនជាមួយអាកាសធាតុ និងការហ្វឹកហាត់ក៏ដោយ។ បញ្ហានេះក៏អាចជាកត្តាមួយធ្វើឲ្យ វឌ្ឍនាកា មិនសូវមានឱកាសបង្ហាញខ្លួនក្នុងក្រុមលីកលំដាប់ទី៣របស់ជប៉ុនមួយនេះផងដែរ។
ខ្សែប្រយុទ្ធដ៏មានប្រជាប្រិយរបស់កម្ពុជា ចាន់ វឌ្ឍនាកា បានចាត់ទុកភាសាជាឧបសគ្គចម្បងសម្រាប់ខ្លួននាពេលបច្ចុប្បន្នក្នុងការចូលរួមជាមួយក្លិប Fujieda MYFC របស់ជប៉ុន ទោះបីកីឡាកររូបនេះបានចូលរួមជាមួយក្លិបក្របខណ្ឌលីកលំដាប់ទី៣របស់ជប៉ុនមួយនេះអស់រយៈពេលជាច្រើនខែក៏ដោយ។ បញ្ហាភាសា ក៏អាចជាឧបសគ្គសម្រាប់ការមិនសូវមានឱកាសបង្ហាញខ្លួននៅលើទីលានរបស់ វឌ្ឍនាកា ផងដែរ។
«អ្វីដែលយើងអាចធ្វើបាននោះគឺការលេងជាក្រុមនិងការបង្កើនកម្លាំង តែអ្វីដែលយើងនៅខ្វះខាត គឺភាសាតែម្តង តែបើការហ្វឹកហាត់មិនបញ្ហានោះទេ ព្រោះមានអ្នកបកប្រែ តែបើពេលប្រកួតយើងត្រូវទំនាក់ទំនងដោយផ្ទាល់ដើម្បីយល់គ្នាភ្លាមៗ»។ នេះជាលើកឡើងរបស់កីឡាករ ចាន់ វឌ្ឍនាកា។
ទោះបីកីឡាករ ចាន់ វឌ្ឍនាកា មិនសូវបានបង្ហាញខ្លួននៅលើទីលានក្នុងក្រុម Fujieda MYFC នាប្រកួតដណ្តើមពានរង្វាន់ក្របខណ្ឌលីកលំដាប់ទី៣របស់ជប៉ុនក៏ដោយ ប៉ុន្តែខ្សែប្រយុទ្ធដ៏ឆ្នើមរបស់បឹងកេតរូបនេះ នៅតែមានជំនឿចិត្តថា នឹងអាចបង្ហាញវត្តមានក្នុងក្រុមនេះក្នុងរយៈពេលដ៏ខ្លីខាងមុខ។ អ្វីដែលធ្វើឲ្យ វឌ្ឍនាកា មានក្តីរំពឹងបែបនេះ ដោយសារការរីកចម្រើនផ្នែកបច្ចេកទេស និងកម្លាំង ជាពិសេសការសម្របខ្លួនជាមួយអាហារ អាកាសធាតុ និងការយល់ពីទម្រង់លេងនៅក្នុងក្រុម ហើយបច្ចុប្បន្នរូបគេកំពុងសិក្សាភាសាជប៉ុន។
កីឡាករ ចាន់ វឌ្ឍនាកា បានមកដល់កម្ពុជាកាលពីថ្ងៃអាទិត្យទី៤ ខែមិថុនា ដើម្បីចូលរួមជាមួយក្រុមជម្រើសជាតិកម្ពុជាតទល់ជាមួយក្រុមជម្រើសជាតិឥណ្ឌូនេស៊ី នាល្ងាចថ្ងៃទី៨ ខែមិថុនា នៅពហុកីឡដ្ឋានជាតិ មុនបន្តជួបក្នុងជំនួបផ្លូវការជាមួយក្រុមអាហ្វហ្គានីស្ថានក្នុងវគ្គជម្រុះពានរង្វាន់ AFC Asian Cup 2019 នៅថ្ងៃទី១៣ ខែមិថុនា នៅពហុកីឡដ្ឋានជាតិ៕
Tag:
បាល់ទាត់
ចាន់ វឌ្ឍនាកា
Fujieda MYFC
© រក្សាសិទ្ធិដោយ thmeythmey.com