អន្តរជាតិ
រដ្ឋបាល់កង់ ម៉ុងតេណេហ្គ្រោ ក្លាយជាសមាជិកទី ២៩ របស់បក្សសម្ព័ន្ធយោធាណាតូ
× ម៉ុងតេណេហ្គ្រោ ក្លាយជាសមាជិកទី ២៩ របស់បក្សសម្ព័ន្ធយោធាណាតូហើយនៅដើមសប្តាហ៍នេះ។ ការក្លាយជាសមាជិកថ្មីនេះនៃបក្សសម្ព័ន្ធនេះនៅតែជារឿងចម្រូងចម្រាសក្នុងប្រទេសម៉ុងតេណេក្រូផ្ទាល់តែម្តង ហើយអ្នកនយោបាយនិងប្រជាជនម៉ុងតេណេក្រូជាច្រើនបានប្រឆាំងការសម្រេចចិត្តនេះដែរ។
នៅថ្ងៃចន្ទទី ៥មិថុនា រដ្ឋបាល់កង់ ម៉ុងតេណេហ្គ្រោ បានក្លាយខ្លួនជាសមាជិកបក្សសម្ព័ន្ធយោធាណាតូជាផ្លូវការ។ ពិធីប្រកាសជាសមាជិកនេះធ្វើឡើងនៅក្រសួងការបរទេសអាមេរិក ដោយមានការចូលរួមពីសំណាក់រដ្ឋមន្ត្រីការបរទេស ម៉ុងតេណេហ្គ្រោ លោក Srđan Darmanović, អនុរដ្ឋមន្ត្រីការបរទេសអាមេរិក Thomas Shannon និងអគ្គលេខាធិការបក្សសម្ព័ន្ធណាតូលោក Jens Stoltenberg។
យោងតាមសារព័ត៌មានរុស្ស៊ី RT ពិធីប្រកាសសមាជិកភាពរបស់ម៉ុងតេណេក្រូក្នុងបក្សសម្ព័ន្ធយោធាណាតូនេះនឹងត្រូវរៀបចំឡើងជាថ្មីនៅក្រុងព្រុចសែលថ្ងៃ ៧មិថុនា ដោយមានការលើកទង់ម៉ុងតេណេក្រូនៅទីស្នាក់ការកណ្តាលណាតូផងដែរ។
ក្រសួងការបរទេសអាមេរិកបានបញ្ជាក់ពាក់ព័ន្ធការចូលរួមរបស់ ម៉ុងតេណេហ្គ្រោ ដូច្នេះថា៖« ម៉ុងតេណេហ្គ្រោ ចូលជាសមាជិកណាតូនឹងគាំទ្រដល់ដំណើរការសមាហរណកម្ម, ការកែទម្រង់ប្រជាធិបតេយ្យ, ពាណិជ្ជកម្ម, សន្តិសុខ និងរក្សាស្ថិរភាពជាមួយប្រទេសជិតខាង។ ម៉ុងតេណេហ្គ្រោ ចូលរួមជាមួយណាតូក៏បង្ហាញឲ្យឃើញថា ទ្វាររបស់ណាតូនៅតែបើកចំហរសម្រាប់ប្រទេសទាំងអស់ដែលចង់ចូលរួមនិងអាចកែទម្រង់ខ្លួនឯងឲ្យបានប្រសើរដើម្បីបំពេញតាមលក្ខខណ្ឌណាតូបាន។ ហើយវាក៏បង្ហាញឲ្យឃើញពីឆន្ទៈរបស់ប្រទេសទាំងនោះក្នុងការប្រឈមបញ្ហា និងទទួលយកទំនួលខុសត្រូវ ក៏ដូចជាទាញប្រយោជន៍ពីភាពជាសមាជិកនេះដែរ»។
យ៉ាងណាមិញ ការចូលរួមជាសមាជិកអង្គការណាតូនេះ បានក្លាយជារឿងចម្រូងចម្រាសនៅក្នុងប្រទេស ម៉ុងតេណេហ្គ្រោ ផ្ទាល់។ ប្រជាជននិងអ្នកនយោបាយខ្លះបាននាំគ្នាបាតុកម្មនិងពហិកាបង្ហាញការប្រឆាំងផងដែរ។
ក្នុងពេលបោះឆ្នោតអនុម័តឲ្យម៉ុងតេណេក្រូចូលជាសមាជិកណាតូកាលពីខែមេសា សមាជិកបក្សប្រឆាំង ៣៥រូបដែលជិតស្មើពាក់កណ្តាលនៃសមាជិកសភាទាំងមូលបាននាំគ្នាពហិកាចូលរួមបោះឆ្នោត។ ហើយចលនាបាតុកម្មនិងតវ៉ាកើតឡើងផុសផុលនៅពេលដែលសមាជិកសភាម៉ុងតេណេក្រូបោះឆ្នោតទទួលយកសមាជិកភាពក្នុងអង្គការណាតូនេះដែរ។ គេឃើញមានបាតុករជាច្រើននាក់ប្រមូលផ្តុំគ្នានៅក្បែរវិមានសភាលើកបដាប្រឆាំងដោយហៅអង្គការណាតូថា «ក្បត់ជាតិ» និងជា «ចោរ»ជាដើម ហើយពួកគេស្រែកខ្លាំងៗថា ៖«ណាតូជាឃាតករមានបាតដៃប្រឡាក់សុទ្ធតែឈាម»។
គេចាំច្បាស់ថា បាតុករនេះនាំគ្នាតវ៉ាបង្ហាញការមិនពេញចិត្តចំពោះបក្សសម្ព័ន្ធយោធាណាតូដោយសារពួកគេនៅចាំបានការអន្តរាគមន៍ទម្លាក់គ្រាប់បែករបស់ណាតូនៅអតីតរដ្ឋយូហ្កោស្លាវ៉ាទសវត្សរ៍ឆ្នាំ ១៩៩០នោះ។ មនុស្សរាប់ពាន់នាក់រួមទាំងប្រជាជន ម៉ុងតេណេហ្គ្រោ ផងនោះបានស្លាប់បាត់បង់ជីវិតដោយសារការទម្លាក់គ្រាប់បែកនេះដូចគ្នា។
តាមពិតទៅ ម៉ុងតេណេហ្គ្រោ ជារដ្ឋតូចមួយនៅតំបន់បាល់កង់ ហើយការចូលរួមជាមួយបក្សសម្ព័ន្ធយោធាណាតូនេះក៏មិនរួមចំណែកអ្វីដែលដុំកំភួនដែរ។ ម៉ុងតេណេក្រូមានទ័ព ១៩៥០នាក់, ឧទ្ធម្ភាគចក្រ ១៣គ្រឿង,នាវាចម្បាំងពីរគ្រឿងនិងនាវាល្បាតចំនួន ៣គ្រឿង។ ចំណែកថវិកាការពារជាតិប្រទេសនេះមានទំហំត្រឹម ៥០លានដុល្លារប៉ុណ្ណោះ៕
Tag:
ម៉ុងតេណេហ្គ្រោ
ណាតូ
Srđan Darmanović
Thomas Shannon
Jens Stoltenberg
© រក្សាសិទ្ធិដោយ thmeythmey.com