រដ្ឋាភិបាលជប៉ុនប្រកាសថា ខ្លួនគ្មានគម្រោងសាងសង់រោងចក្រនុយក្លេអ៊ែរបន្ថែមឡើយ

អន្តរជាតិ

រដ្ឋាភិបាលជប៉ុនប្រកាសថា ខ្លួនគ្មានគម្រោងសាងសង់រោងចក្រនុយក្លេអ៊ែរបន្ថែមឡើយ

13, Jun 2017 , 8:59 am

រូបភាព

ដោយ:

រដ្ឋមន្ត្រីពាណិជ្ជកម្មជប៉ុនបានបដិសេដសេចក្តីរាយការណ៍របស់ទីភ្នាក់ងារព័ត៌មានសេដ្ឋកិច្ចជប៉ុន ដោយលោកបញ្ជាក់ថា ជប៉ុនគ្មានគម្រោងសាងសង់រោងចក្រនុយក្លេអ៊ែ ឬផ្លាស់ប្តូរឧបករណ៍រ៉េអាក់ទ័រថ្មីនោះទេ។ មូលហេតុគឺថាការសាងសង់រោងចក្រថ្មីអាចនឹងធ្វើសាធារណជនជប៉ុនប្រឆាំងព្រោះពួកគេបារម្ភពីការផ្ទុះរោងចក្រថាមពលនុយក្លេអ៊ែរដូចពេលមុន។

យោងតាមសេចក្ដីរាយការណ៍របស់ភ្នាក់ងារព័ត៌មានសេដ្ឋកិច្ចជប៉ុន Nikkei business daily រដ្ឋមន្ត្រីពាណិជ្ជកម្មជប៉ុន Hiroshige Seko នឹងបង្កើតក្រុមបច្ចេកទេសនៅដើមខែមិថុនាដើម្បីត្រួតពិនិត្យទ្បើងវិញនូវគម្រោងផលិតថាមពល ក៏ដូចជាសង់រោងចក្រថាមពលនុយក្លេអ៊ែរថ្មី ឬក៏អាចផ្លាស់ប្ដូរឧបករណ៍រ៉េអាក់ទ័រទាំងអស់ដែលនៅសល់ផង។

រដ្ឋាភិបាលជប៉ុននឺងបន្តអនុវត្តផែនការឆ្នាំ២០១៤ ដែលសំដៅដល់ការកាត់បន្ថយការពឹងផ្អែកលើថាមពលនុយក្លេអ៊ែរដោយរក្សាថាមពលនេះនៅសល់ត្រឹមមួយភាគតូចនៃថាមពលដែលត្រូវប្រើប្រាស់ចម្រុះ។ ទោះបីជាដូច្នេះក៏ដោយការរក្សានូវថាមពលនុយក្លេអ៊ែរនៅត្រឹមកម្រិតមួយភាគតូចនៃថាមពលចម្រុះក៏តម្រូវឲ្យមានការសាងសង់រ៉េអាក់ទ័រថ្មីបន្ថែមដែរ។

ប៉ុន្តែយោងតាមទីភ្នាក់ងារព័ត៌មាន Reuters រដ្ឋមន្ត្រីពាណិជ្ជកម្មរូបនេះ បានទាត់ចោលសេចក្ដីរាយការណ៍ខាងលើ ហើយលោកបានបញ្ជាក់ថា ជប៉ុនគ្មានគម្រោងសាងសង់រោងចក្រថាមពលនុយក្លេអ៊ែរឬផ្លាស់ប្តូររ៉េអាក់ទ័រដែរ។ លោកបានបញ្ជាក់ដូច្នេះ៖ «នៅពេលនេះយើងមិនបានគិតគូរពីការសាងសង់ឬផ្លាស់ប្ដូរសូម្បីតែបន្តិច»។

លោកបានបន្តទៀតថា រដ្ឋាភិបានអាចនឹងត្រូវប្រឈមមុខនឹងការប្រឆាំងពីសំណាក់សាធារណជនជប៉ុន បើសិនជារដ្ឋាភិបាលចេញគោលការណ៍សាងសង់ម៉ាស៊ីនរ៉េអាក់ទ័រថ្មី។ មូលហេតុសំខាន់នោះគឺ ប្រជាពលរដ្ឋជប៉ុនភ័យខ្លាចថា គ្រោះមហន្តរាយអាចកើតមានឡើងទៀតដូចការផ្ទុះរោងចក្រថាមពលនុយក្លេអ៊ែរក្នុងតំបន់ Fukushimaឆ្នាំ២០១១។ វាជាឧប្បត្តិហេតុផ្ទុះរោងចក្រនុយក្លេអ៊ែរធ្ងន់ធ្ងរបំផុតនៅលើលោកចាប់តាំងពីមានការករណីផ្ទុះរោងចក្រថាមពលនុយក្លេអ៊ែរ Chernobyl នៅអ៊ុយក្រែនឆ្នាំ ១៩៨៦ នោះ។

ដោយឡែក ផែនការអនាគតរបស់ក្រសួងឧស្សាហកម្មដែលចង់ផ្គត់ផ្គង់ថាមពលនុយក្លេអ៊ែរមួយភាគប្រាំដល់សេវាអគ្គីសនីក្នុងស្រុកនៅក្នុងឆ្នាំ ២០៣០ ក៏រងការរិះគន់នៅទូទាំងប្រទេសដែរបន្ទាប់ពីរដ្ឋាភិបាលដាក់ចេញសេចក្ដីសម្រេចក្នុងឆ្នាំ២០១៥៕