ជាតិ
ប៉ៃលិន៖ ភ្នំយ៉ាតត្រូវបានបង្កើតជាតំបន់បេតិកភណ្ឌវប្បធម៌ធម្មជាតិ
× រាជរដ្ឋាភិបាលកម្ពុជា បានសម្រេចបង្កើតភ្នំយ៉ាត ជាតំបន់បេតិកភណ្ឌវប្បធម៌ធម្មជាតិ ដើម្បីការពារតួនាទីប្រព័ន្ធអេកូឡូស៊ី។ តំបន់បេតិកភណ្ឌវប្បធម៌ធម្មជាតិភ្នំយ៉ាត មានផ្ទៃដីប្រមាណ ៣១, ៩៥១ក្រឡា លាតសន្ធឹងលើភូមិសាស្ត្រសង្កាត់ប៉ៃលិន ខេត្តប៉ៃលិន។
រដ្ឋាភិបាលកម្ពុជា បានសម្រេចបង្កើតភ្នំយ៉ាត ទៅជាតំបន់បេតិកភណ្ឌវប្បធម៌ធម្មជាតិ តាមសំណើរបស់ក្រសួងបរិស្ថាន។ តំបន់នេះ លាតសន្ធឹងលើភូមិសាស្ត្រ សង្កាត់ប៉ៃលិន ខេត្តប៉ៃលិន ដែលមានផ្ទៃដីប្រមាណជិត ៣១, ៩៥១ ម៉ែត្រក្រឡា។ តាមហ្វេសប៊ុកក្រសួងបរិស្ថាន ការដាក់បញ្ចូលតំបន់ភ្នំយ៉ាត ទៅជាតំបន់បេតិកភណ្ឌវប្បធម៌ធម្មជាតិនេះ គឺជាការការពារសោភ័ណភាព ទេសភាពធម្មជាតិ និងតម្លៃធម្មជាតិ នៃតំបន់នេះ សម្រាប់បម្រើដល់ការកម្សាន្ត ការទស្សនា ការអប់រំ ការសិក្សាស្រាវជ្រាវ វិទ្យាសាស្ត្រ និងជំនឿ ដែលគ្រប់សកម្មភាពទាំងនេះ ពុំបង្កការគំរាមកំហែងដល់បរិស្ថាន ធម្មជាតិ និងវប្បធម៌នៅក្នុងមូលដ្ឋាន។
ការបញ្ចូលតំបន់បេតិកភណ្ឌវប្បធម៌ធម្មជាតិថ្មីនេះ ក៏នឹងផ្តល់សេវាកម្មធម្មជាតិ សម្រាប់ការប្រើប្រាស់ប្រកបដោយនិរន្តរភាព ក៏ដូចជាការលើកកម្ពស់ការចូលរួមរបស់សហគមន៍មូលដ្ឋាន និងការរួមចំណែករបស់សារធារណជន ក្នុងការគ្រប់គ្រង ការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់។
បូកទាំងតំបន់បេតិកភណ្ឌភ្នំយ៉ាតនេះ កម្ពុជាមានតំបន់ការពារធម្មជាតិចំនួន៤៦កន្លែង និងរបៀងអភិរក្សជីវចម្រុះចំនួន៣តំបន់ គ្របដណ្តប់លើផ្ទៃដីសរុបជាង ៧,៣លានហិកតា៕
Tag:
ប៉ៃលិន
ភ្នំយ៉ាត
ក្រសួងបរិស្ថាន
© រក្សាសិទ្ធិដោយ thmeythmey.com