វិមានប្រធានាធិបតីប្រកាសថា លោក ឌូទើតេ នៅមានជីវិតទេ ក្រោយបាត់មុខអស់ច្រើនថ្ងៃ

អន្តរជាតិ

វិមានប្រធានាធិបតីប្រកាសថា លោក ឌូទើតេ នៅមានជីវិតទេ ក្រោយបាត់មុខអស់ច្រើនថ្ងៃ

27, Jun 2017 , 8:39 pm

រូបភាព

ប្រធានាធិបតី រ៉ូឌ្រីហ្គោ ឌូទើតេ នៅលើយន្តហោះថ្ងៃទី២០ ខែមិថុនា ដែលការបង្ហាញខ្លួនចុងក្រោយ (រូបភាពពីហ្វេសប៊ុក Presidential Communication)

ដោយ: ថ្មីៗ

វិមានប្រធានាធិបតីហ្វីលីពីនបានចេញមកប្រកាសថា ប្រធានាធិបតី រ៉ូឌ្រីហ្គោ ឌូទើតេ មានសុខភាពល្អប្រសើរធម្មតា និងមិនមានជម្ងឺអ្វីឡើយ ខណៈលោកមិនបានបង្ហាញវត្តមានជាសាធារណៈអស់ពេលជិតមួយសប្ដាហ៍ដែលធ្វើឲ្យមានការសង្ស័យថាសុខភាពលោកធ្លាក់ចុះ។ អ្នកនាំពាក្យប្រធានាធិបតី លោក Ernesto Abella បានប្រាប់ក្រុមអ្នកសារព័ត៌មានថា លោក ឌូទើតេ បាត់មុខច្រើនថ្ងៃ ព្រោះលោកមានកិច្ចការដែលត្រូវធ្វើ ហើយមិនមានបញ្ហាអ្វីកើតឡើងចំពោះលោកឡើយ។

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានបាត់មុខអស់ពេល៦ថ្ងៃហើយ។ ការមិនបង្ហាញខ្លួនជាសាធារណៈ ឬក៏ចូលរួមក្នុងកម្មវិធីនានានោះ បង្កជាការសង្ស័យថាលោកមានបញ្ហាសុខភាព ហើយនេះជារឿងចម្លែកណាស់សម្រាប់លោក ឌូទើតេ ដែលតែងចេញមុខរាល់ថ្ងៃ ហើយចូលចិត្តថ្លែងសុន្ទរកថារាប់ម៉ោង ក៏ដូចជាចូលចិត្តធ្វើសន្និសីទកាសែតនៅពេលទាបភ្លឺជាដើម។ ចំណែករដ្ឋាភិបាលហ្វីលីពីនក៏រងការសង្ស័យថាព្យាយាមលាក់បាំងបញ្ហាសុខភាពរបស់លោក ឌូទើតេ ទៀតផង។

ក្នុងសន្និសីទកាសែតនៅថ្ងៃទី២៧ ខែមិថុនា លោក Ernesto Abella អ្នកនាំពាក្យប្រធានាធិបតីនិយាយថា លោក ឌូទើតេ រវល់ជាមួយការងាររបស់លោក ហើយការបាត់មុខនេះមិនជាប់ទាក់ទងបញ្ហាសុខភាពអ្វីឡើយ។ លោក Abella បាននិយាយច្បាស់ៗថា លោក ឌូទើតេ នៅមានជីវិតនៅឡើយទេ និងមានសុខភាពល្អទៀតផង។ លោកបន្តថា ប្រធានាធិបតីរូបនេះបានតាមដានរាល់ស្ថានការណ៍ទាំងអស់ ហើយលោកក៏បានអានកាសែត ចុះហត្ថលេខាលើឯកសារផ្សេងដូចធម្មតា។

នេះជាលើកទីពីរដែលលោក ឌូទើតេ មានរហស្សនាមថាប្រធានាធិបតីមាត់អត់គម្រប ដែលមិនចេញមុខជាសាធារណៈ។ លោក ឌូទើតេ ដែលមានវ័យ៧២ឆ្នាំទៅហើយនោះ បានបាត់មុខអស់ពេល៦ថ្ងៃចាប់ពីថ្ងៃទី១២ ដល់ថ្ងៃទី១៧ ខែមិថុនា មុននឹងបង្ហាញខ្លួនម្ដងពេល ទៅសួរសុខទុក្ខប្រជាជនភៀសខ្លួននៅទីក្រុង Iligan នៅថ្ងៃទី២០ ខែមិថុនា។ ចាប់ពីពេលនោះមក លោក ឌូទើតេ មិនបង្ហាញខ្លួនអ្វីសោះឡើយ។

បើតាមទីភ្នាក់ងារព័ត៌មាន Reuters លោក ឌូទើតេ ដែលកាន់តំណែងប្រធានាធិបតីជិតបានមួយឆ្នាំហើយនោះ មានបញ្ហាខ្នង និងការស្លាប់មួយចំហៀងខ្លួន ដោយសារតែការប៉ះពាល់ប្រព័ន្ធប្រសាទក្រោយជួបគ្រោះថ្នាក់ចរាចរណ៍ ក៏ដូចជាមានបញ្ហាបំពង់កផងដែរ។ ក្រៅពីនោះ លោក ឌូទើតេ ក៏មានជម្ងឺម្យ៉ាងដែលបង្កជាការស្ទះសសៃឈាម ព្រោះតែការជក់បារីខ្លាំងពេកពេលលោកនៅក្មេង។

លោក ឌូទើតេ កាន់តំណែងគ្រប់មួយឆ្នាំនៅថ្ងៃទី៣០ ខែមិថុនា ខាងមុខនេះ ហើយលោកគឺជាប្រធានាធិបតីចាស់ជាងគេរបស់ហ្វីលីពីន។ រយៈជិតមួយឆ្នាំនេះ លោកតែងចេញមុខក្នុងកម្មវិធីនានាមិនសូវលោះពេលឡើយ ហើយធ្វើដំណើរក្រៅប្រទេសញឹកញាប់ ប៉ុន្តែលោកក៏ធ្លាប់បានត្អូញត្អែរពីកម្មវិធីដ៏មមាញឹករបស់លោក។ ដោយសារអាយុច្រើនទៅហើយ លោក ឌូទើតេ ក៏ធ្លាប់អវត្តមានក្នុងកិច្ចប្រជុំអន្តរជាតិធំៗដែរ៕